ເຊດຖາເຟດມາກ ອີກຄວາມຕັ້ງໃຈຜະລິດຜັກປອດສານພິດຮັບໃຊ້ສັງຄົມ

    ເຊດ​ຖາ​ເຟດ​ມາກແມ່ນ​ຮ້ານ​ໜຶ່ງ​ທີ່​ມີ​ຄວາມ​ຕັ້ງ­ໃຈ​ໃນ​ການຜະ­ລິດ​ພືດ​ຜັກ​ທີ່​ປອດ​ສານ­ພິດ ຊຶ່ງເປັນ​ຜັກ​ໄຮ​ໂດ​ໂຄ​ນິກ ແລະ​ພືດ​ກະສິ​ກຳ​ອີນ​ຊີເພື່ອ​ຕອບ​ສະ­ໜອງ​ຕາມ ຄວາມ​ຕ້ອງ­ການ​ຂອງ​ຕະ­ຫຼາດກໍຄື​ມວນ​ຊົນ​ພາຍ​ໃນ​ນະ­ຄອນ­ຫຼວງວຽງ​ຈັນ​ໃຫ້​ນັບ​ມື້​ເພີ່ມ​ຫຼາຍ​ຂຶ້ນ.

    ນາງ ອາ​ນຸດ​ສະ​ລາ ມາ­ລາ​ບັນດິດ ຮອງ​ອຳ­ນວຍ​ການ​ຮ້ານ​ເຊດຖາ​ເຟດ​ມາກ ໃຫ້​ສຳ­ພາດ​ວ່າ: ເຊດຖາ​ເຟດ​ມາກ ເປັນ​ອີກ​ຮ້ານ​ໜຶ່ງ​ທີ່ຕັ້ງ​ຢູ່​ໃນ​ສວນ​ເຊດ​ຖາ​ວັງ​ໂສ, ເບື້ອງ ຕົ້ນ​ສວນ​ດັ່ງ­ກ່າວ​ຜູ້​ຄົນ​ຈະ​ບໍ່​ຮູ້­ຈັກຫຼາຍ​ປານ­ໃດ​ພາຍ­ຫຼັງ​ທີ່​ນະ­ຄອນຫຼວງ​ໄດ້​ຈັດ​ງານ​ສະ­ເຫຼີມ­ສະ­ຫຼອງ ການ​ສ້າງ­ຕັ້ງ​ຄົບ­ຮອບ 450 ປີ ສວນ​ແຫ່ງ​ນີ້ ຈິ່ງ​ກາຍ­ເປັນ​ທີ່​ນິ­ຍົມຂອງ​ມວນ​ຊົນ ສະ­ນັ້ນ ແມ່​ເພິ່ນ​ກໍເລີຍ​ມາ​ຕັ້ງ​ຮ້ານ​ຂາຍ­ເຄື່ອງ​ທີ່​ລະນຶກ​ຂຶ້ນ, ຜ່ານ​ໄປ​ໄລ­ຍະ​ໜຶ່ງ​ຈິ່ງ​ຫັນມາ​ເປີດ​ຮ້ານ​ຂາຍ​ຜ້າ­ໄໝ ແລະ ເຮັດ​ຮ້ານ​ກາ­ເຟ ໄປ​ນຳ​ຈົນ​ມາ​ເຖິງ ຮ້ານ​ເຊດ​ຖາ​ເຟດ​ມາກ ທີ່​ເກີດ​ຈາກ ຄອບ­ຄົວ​ມັກ​ບໍ­ລິ­ໂພກ​ພືດ​ຜັກ​ທີ່​ມັນປອດ​ສານ­ພິດ ແລະ​ໃນ​ເບື້ອງ​ຕົ້ນນັ້ນ​ແມ່​ຂອງ​ເພິ່ນ​ໄດ້​ເລີ່ມ​ສຶກ​ສາກ່ຽວ​ກັບ​ການ​ປູກ​ຜັກ​ໄຮ​ໂດ​ໂຄ​ນິກ ເພື່ອ​ຫວັງ​ຮັບ​ໃຊ້​ພາຍ​ໃນ​ຄອບ­ຄົວ, ແຕ່​ພາຍ­ຫຼັງ​ທີ່​ປູກ​ແລ້ວ​ເຫັນ​ວ່າ​ຜູ້ ຄົນ​ໄດ້​ໃຫ້​ຄວາມ​ສົນ­ໃຈ, ເນື່ອງ​ຈາ​ກວ່າ​ພືດ​ຜັກ​ທີ່​ປູກ​ນັ້ນ​ບໍ່​ໄດ້​ໃຊ້​ສານ​ເຄ​ມີ, ສະ­ນັ້ນ ຕົກ​ມາ​ໃນ​ປີ 2014 ຈິ່ງ​ເລີ່ມ​ຂະ­ຫຍາຍ​ເນື້ອ­ທີ່ ໃນ​ການ​ປູກ ເພື່ອ​ໃຫ້​ຕອບ​ສະ­ໜອງ ໄດ້​ຕາມ​ຄວາມ​ຕ້ອງ­ການ​ຂອງ​ຕະຫຼາດ​ພາຍ​ໃນ​ແລ້ວ​ຈິ່ງ​ໄດ້​ຕັ້ງ​ຮ້ານເຊດ​ຖາ​ເຟດ​ມາກ​ຂຶ້ນ​ໃນ​ປີ​ດຽວ​ກັນ, ຈາກ​ນັ້ນ ມາ​ຮອດ​ປີ 2015 ການປູກ​ຜັກ​ດັ່ງ­ກ່າວ ກໍ​ເລີ່ມ​ຕີ​ຕະ­ຫຼາດຈຳ­ພວກ​ຮ້ານ​ອາ­ຫານ​ພາຍ​ໃນ ແລະກຸ່ມ​ຄົນ​ທົ່ວ​ໄປ​ໄດ້​ດີ​ສົມ­ຄວນ.

4e73393c2eff6cb8430b92276847f700_L copy

ແຕ່​ດ້ວຍ​ທີ່​ວ່າ­ການ​ປູກ​ຜັກ​ໄຮ ໂດ​ໂຄ​ນິກ ນັ້ນ​ຈະ​ໃຊ້​ນ້ຳ​ເພື່ອ​ເປັນຕົວ​ຫຼໍ່­ລ້ຽງ​ໃຫ້​ຜັກ​ເຕີບ​ໂຕ ໂດຍ​ໃຊ້ໄລ­ຍະ​ເວ­ລາ​ໃນ​ການ​ປູກ​ທັງ​ໝົດ 40 ວັນ ແລະ​ໜານ​ໜຶ່ງ​ຈະ​ໃຫ້​ຜົນຜະ­ລິດ​ຈຳ­ນວນ 60 ກິ​ໂລກ​ຣາມ, ດ້ວຍ​ເຫດ​ນີ້ ຈິ່ງ​ເຮັດ​ໃຫ້​ລາ­ຄາ​ສູງ ກວ່າ​ການ​ປູກ​ຜັກ​ທົ່ວ​ໄປ, ເຖິງ​ຢ່າງໃດ​ກໍ​ຕາມ​ການ​ປູກ​ຜັກ​ດັ່ງ­ກ່າວ​ກໍຍັງ​ໄດ້​ຮັບ​ຄວາມ​ສົນ­ໃຈ​ສູງ​ຈາກ ມວນ​ຊົນ, ເມື່ອ​ເປັນ​ແນວ​ນັ້ນ ແມ່ຂອງ​ເພິ່ນ​ຈິ່ງ​ໄດ້​ຫັນ​ເອົາ​ເນື້ອ­ທີ່ ທີ່​ມີ​ແລ້ວ​ນັ້ນ​ມາ​ເປັນ​ຈຸດ​ຂະ­ຫຍາຍ​ໃຫ້​ແກ່​ການ​ປູກ​ຜັກ​ສະ­ໜອງ​ຕະ­ຫຼາດ ໂດຍ​ເນັ້ນການ​ປູກ​ໃນ 2 ຮູບ​ແບບ ເຊັ່ນ: ການ​ປູກ​ແບບ​ໄຮ​ໂດ​ໂຄ​ນິກ ຄຽງ​ຄູ່​ກັບ​ການ​ປູກ​ແບບ​ກະ­ສິ­ກຳ ອິນ​ຊີ​ທີ່​ນຳ​ໃຊ້​ພື້ນ​ທີ່​ຈຳ­ນວນ 42 ເຮັກ­ຕາ ແລະ​ໃນ​ການ​ປູກ​ນັ້ນ ກໍ​ໄດ້​ສະ­ຫຼັບ​ກັບ​ການ​ປູກ​ຕົ້ນ­ໄມ້​ໃຫ້​ໝາກ, ການ​ລ້ຽງ­ສັດ ແລະ​ການ​ປູກ​ຫຍ້າ ປູກ​ພືດ​ໄປ​ພ້ອມໆ​ກັນ, ຊຶ່ງ​ເນື້ອ­ທີ່ ທັງ​ໝົດ​ແມ່ນ​ຕັ້ງ​ຢູ່​ບ້ານ​ທ່າ​ງ່ອນ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງຈັນ, ເພື່ອ​ໃຫ້​ລູກ​ຄ້າ​ສາ­ມາດ​ເລືອກ​ຊື້​ໄດ້​ຕາມ­ໃຈ.

ປະ­ຈຸ​ບັນ ທຸ­ລະ​ກິດ​ຂອງ​ຄອບ­ຄົວ​ເພິ່ນ​ຈະ​ມີ​ຮ້ານ​ຂາຍ­ເຄື່ອງ​ທີ່​ລະ ນຶກ, ຂາຍ​ຜ້າ­ໄໝ, ຂາຍ​ກາ­ເຟ ແລ້ວ ກໍ​ຍັງ​ມີ​ຮ້ານ​ເຊດ​ຖາ​ເຟດ​ມາກ ເປັນ ຜູ້​ຈຳ­ໜ່າຍ​ຜັກ​ເພື່ອ​ສຸ­ຂະ­ພາບ ແລະ  ຍັງ​ໄດ້​ສົ່ງ​ຕາມ​ຮ້ານ​ອາ­ຫານ​ຫຼາຍໆແຫ່ງ​ພາຍ​ໃນ​ນະ­ຄອນ­ຫຼວງ​ວຽງຈັນ, ຫາກ​ທ່ານ​ໃດ ຫຼື ຮ້ານ​ອາຫານ​ໃດ​ຕ້ອງ­ການ​ພືດ​ຜັກ​ຕ່າງໆ ເປັນ­ຕົ້ນ​ຜັກ​ສະ​ລັດ, ຜັກ­ຫອມ​ລາບ, ປ້ອມ, ຜັກ­ຫອມ​ບົ່ວ, ໝາກ​ເລັ່ນ, ໝາກ​ເພັດ ແລະ​ອື່ນໆ ກໍ​ສາ­ມາດ​ພົວພັນ​ຫາ​ເພິ່ນ​ໄດ້.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.