ເຊີນທ່ຽວບຸນປີໃໜ່ລາວທີ່ຫຼວງພະບາງເມືຶອງມໍລະດົກໂລກ

ປີ​ໃໝ່​ລາວ​ທີ່​ຈະ​ມາ​ເຖິງ​ນີ້​ໃຜ​ທີ່​ກຳ­ລັງ​ວາງ​ແຜນ​ໄປ​ທ່ຽວ​ກັບ​ໝູ່​ເພື່ອນ, ຄອບ­ຄົວ ເພື່ອ​ສຳ­ຜັດ​ກັບ​ບັນ­ຍາ­ກາດ ແບບ​ລາວໆ​ຢ່າ​ລືມ​ຫຼວງ​ພະ​ບາງ​ເມືອງ ແຫ່ງ​ວັດ­ທະ­ນະ­ທຳ ແລະ​ທຳ​ມະ​ຊາດທີ່ຍັງ​ຮັກ­ສາ​ເອ­ກະ­ລັກ​ຄວາມ​ເປັນ​ລາວ.

ສຳ­ລັບ​ການ​ຫຼິ້ນ​ບຸນ­ປີ­ໃໝ່​ລາວ​ທີ່ແຂວງ​ຫຼວງ​ພະ​ບາງ​ປີ​ນີ້​ຈະ​ໄດ້​ຈັດ​ຂຶ້ນ ເປັນ​ເວ­ລາ 11 ມື້, ເລີ່ມ​ແຕ່​ວັນ​ທີ 10-20 ເມ­ສາ ຕາມ​ຮີດ­ຄອງ​ປະ­ເພ­ນີ​ທີ່​ບັນ​ພະ​ບຸລຸດ​ໄດ້​ປະ­ຕິ­ບັດ​ສືບ​ທອດ​ຕໍ່​ກັນ​ມາ​ຈົນ​ເຖິງທຸກ​ວັນ​ນີ້ ແລະ​ຍັງ​ຈະ​ພ້ອມ​ກັນ​ຍົກ​ສູງສືບ​ສານ​ວັດ­ທະ­ນະ­ທຳ​ນີ້​ໄປ​ຕະ­ຫຼອດການ.

ມື້​ເລີ່ມ​ຕົ້ນ​ແມ່ນວັນ​ຈັນ​ກົງ​ກັບ​ວັນ​ທີ 10 ເມ­ສາ ຈະ​ມີ​ການ​ທ່ຽວ​ຊົມ​ຊື້-ຂາຍສິນ­ຄ້າ​ທີ່​ຕະ­ຫຼາດ­ນັດ​ເດີ່ນ​ທາດ­ຫຼວງ. ຕອນ​ຄ່ຳ​ແມ່ນ​ຮັບ​ຊົມ​ການ­ສະ­ແດງ​ສິລະ​ປະ-ວັນ­ນະ­ຄະ­ດີ​ຈາກ​ສິ­ລະ​ປິນ​ທີ່​ມີສື່​ສຽງ​ຂອງ​ລາວ ວັນ​ອັງ­ຄານ​ວັນ​ທີ 11-12 ເມ­ສາ​ຕອນ​ຄ່ຳ​ເວ­ລາ 19:30-23:00 ຊົມ​ງານ​ປະ​ກວດ​ນາງ​ສັງ­ຂານ ຢູ່​ທີ່​ເດີ່ນ​ທາດ­ຫຼວງ, ວັນ​ພະ­ຫັດ, ວັນ​ທີ 13 ເມ­ສາ​ຕອນ​ເຊົ້າ​ແມ່ນ​ຈະ​ມີ​ພິ­ທີ​ຊ້າງຮຽງ​ເກີຍ​ຢູ່​ຂ້າງ​ຫໍ​ພິ​ພິ​ຕະ​ພັນ ​ພ້ອມ​ນີ້ ຈະ​ມີ​ການ​ປະ​ກວດ​ອາ­ຫານ​ພື້ນ­ເມືອງ, ຜະ­ລິດ​ຕະ​ພັນ​ຫັດ­ຖະ­ກຳ​ພື້ນ­ເມືອງ​ຈາກ ພາຍ​ໃນ ແລະ​ຕ່າງ­ປະ­ເທດ​ວັນ​ສຸກ, ວັນ ທີ 14 ເມ­ສາ ຕອນ​ເຊົ້າ​ເວ­ລາ 7:00 ໂມງ, ໂລະ​ລາດ ຫຼື ລົງ​ຕະ­ຫຼາດ­ນັດ​ແບບມວນ​ຊົນ ຈາກ​ນັ້ນ​ຈະ​ໄດ້​ຮັບ​ຊົມ​ການແຂ່ງ­ຂັນ​ກີ­ລາ​ພື້ນ­ເມືອງຢູ່​ທີ່​ເດີ່ນ​ທາດຫຼວງ ແລະ​ຕາມ​ມາ​ດ້ວຍ​ພິ­ທີ​ອັນ​ເຊີນ​ພະພຸດ​ທະ​ຮູບ​ລົງ​ຫົດ­ສົງຕາມ​ປະ­ເພ­ນີ ແລະ ລົງ​ຕົບ​ພະ­ທາດ​ດອນ​ຊາຍ​ມຸງ­ຄຸນ​ທີ່​ຝາກຊຽງ​ແມນ ເມືອງ​ຈອມ​ເພັດ ເພື່ອ​ເປັນ​ສີ​ລິມຸງ­ຄຸນ ໃຫ້​ແກ່​ຜູ້​ທີ່​ເຂົ້າ​ຮ່ວມ​ບຸນ​ປະ­ເພ­ນີ ໃນ​ຕອນ​ແລງ​ຂອງ​ວັນ​ດຽວ​ກັນ.

ສຳ­ລັບ​ວັນ​ເສົາ​ວັນ​ທີ 15 ເມ­ສາ ເປັນມື້​ສັງ­ຂານ​ເນົາ​ຕອນ​ເຊົ້າ​ເວ­ລາ 8:00 ໂມງ​ການ​ນຳ​ຂັ້ນ​ຕ່າງໆ​ໄປ​ທ່ຽວ​ຊົມ ບ້ານວັັດ​ທະ­ນະ​ທຳ​ເຜົ່າ​ລື້​ຜາ​ນົມ, ກ່ອນ​ກ້າວ​ສູ່​ພິ­ທີ​ແຫ່​ຫວໍ່​ກິດ­ຈະ­ກຳ​ທີ່​ສັງ­ຄົມ​ຄອງ​ຄອຍ​ມາ​ຕະ­ຫຼອດ​ໜຶ່ງ​ປີ​ໃນ​ຕອນ­ສວາຍ​ເວ­ລາ 13:00-17:00 ໂມງ ໂດຍ​ແຕ່​ລະ​ປີ​ຈະ ແຫ່​ຫວໍ່​ຕາມ​ເສັ້ນ­ທາງ​ກາງ​ເມືອງ​ຖະ­ໜົນສີ​ສະ­ຫວ່າງ​ວົງ ແຕ່​ວັດ​ທາດ​ນ້ອຍ​ຫາ​ວັດ ຊຽງ​ທອງ​ເປັນ​ຂະ​ບວນ​ຍາວ​ຍຽດສອງຝາກ​ທາງ​ເຕັມ​ໄປ​ດ້ວຍ​ພໍ່​ແມ່​ປະ­ຊາ­ຊົນ ຕະ­ຫຼອດ​ຮອດ​ນັກ​ທ່ອງ​ທ່ຽວ​ຈາກ​ທັງພາຍ​ໃນ ແລະ​ຕ່າງ­ປະ­ເທດ​ຮ່ວມ​ຮັບ​ຊົມ ແລະ​ຫຼິ້ນ​ຫົດ​ນ້ຳ​ເຊິ່ງ​ກັນ ແລະ​ກັນ​ຕະຫຼອດ​ທາງເຮັດ​ໃຫ້​ບັນ­ຍາ­ກາດ​ມື້​ນັ້ນ​ມີຄວາມ​ຄຶກ­ຄື້ນ​ມ່ວນ­ຊື່ນ​ຊຸ່ມ​ເຢັນ​ໄປ​ດ້ວຍສາຍ​ນ້ຳ.

ວັນ​ອາ­ທິດວັນ​ທີ 16 ເມ­ສາ ມື້​ສັງ ຂານ​ຂຶ້ນ​ປີ​ໃໝ່ ໃນ​ຕອນ​ເຂົ້າ​ເວ­ລາ 5:30 ໂມງ ບັນ­ດາ​ການ​ນຳ​ພັກ-ລັດ​ຂັ້ນ​ຕ່າງໆ, ປະ­ຊາ­ຊົນ​ບັນ­ດາ­ເຜົ່າ, ແຂກ​ທັງ​ພາຍ​ໃນ ແລະ​ຕ່າງ­ປະ­ເທດ​ຮ່ວມ​ກັນ​ໃສ​ບາດ​ຢູ່ ໜ້າ​ວັດ​ແສນ, ຂຶ້ນ​ບູ­ຊາ​ພະ­ທາດ​ຈອມ​ສີ (ພະ­ທາດ​ສັກ­ສິດ​ມິ່ງ­ຂວັນ​ເມືອງ​ຂອງ ຊາວ​ເມືອງ​ຫຼວງ​ພະ​ບາງ), ຕອນ​ສວຍ ເວ­ລາ 13:00-17:00 ໂມງ (ແຫ່​ຫວໍ່ ລ່ອງ) ຊົມ​ຂະ​ບວນ​ແຫ່​ຫວໍ່​ຢູ່​ເສັ້ນ­ທາງ ກາງ​ເມືອງຖະ­ໜົນ​ສີ​ສະ­ຫວ່າງ​ວົງ​ແຕ່ວັດ​ຊຽງ​ທອງ​ຫາ​ວັດ​ທາດ​ນ້ອຍ, ຕອນຄ່ຳ​ເວ­ລາ 19:00 ໂມງ, ຊົມ​ຂະ​ບວນ​ແຫ່ພະ­ຍາ​ນາກ, ໂຄມ­ໄຟ​ແຕ່​ພະ­ທາດ​ຈອມສີ​ລົງ​ມາ​ເຂົ້າ​ສູ່​ໜອງ​ໃນ​ຫໍ​ພິ​ພິ​ຕະ​ພັນ (ພະ­ລາດ​ຊະ​ວັງ​ເກົ່າ) ແລະ​ຊົມ​ການ​ສະແດງ​ລະ­ຄອນ​ພະ​ລັກ-ພະ​ລາມ, ຟ້ອນ​ຍັກ, ຟ້ອນ​ລີງ, ຟ້ອນ​ນາງ​ແກ້ວ.

ວັນ​ທີ 17 ເມ­ສາ ຕອນ​ເຊົ້າ​ເວ­ລາ 7:00 ໂມງ, ເຕົ້າ­ໂຮມ​ພະ​ພິ​ຂຸ​ສົງ, ການນຳ​ພັກ-ລັດ, ເຖົ້າ​ແກ່​ຜູ້​ຊົງ​ຄຸນ​ວຸດ​ທິ, ມວນ​ຊົນ​ທັງ​ແຂກ​ພາຍ​ໃນ ແລະ​ຕ່າງ​ປະເທດ ຢູ່​ຫໍ​ພະ​ບາງ​ເພື່ອ​ລາດ​ທະ​ນາ​ອັງ ເຊີນ ແຫ່​ພະ​ບາງ​ມາ​ປະ­ດິດ­ສະ­ຖານ​ຢູ່​ວັດໃໝ່ ສຸ­ວັນ­ນະ​ພູມ​ມາ​ລາມ ແລະ​ຈັດ​ຕັ້ງພິ­ທີ​ຫົດ­ສົງ​ຕາມ​ປະ­ເພ­ນີ, ຈາກ​ນັ້ນ ຕອນສວາຍ​ການ​ນຳ​ພັກ-ລັດ, ນາງ​ສັງ­ຂານ ທັງ 7 ໄປ​ສົງ​ນ້ຳ​ພະ​ພຸດ​ທະ​ຮູບ​ຢູ່​ຖ້ຳ​ຕິ່ງ ຕາມ​ຮີດ­ຄອງ​ປະ­ເພ­ນີ, ຕອນ​ຄ່ຳ​ແມ່ນສືບ­ຕໍ່​ສົງ​ນ້ຳ​ພະ​ບາງ ແລະ​ຊົມ​ການ​ສະແດງ​ສິ­ລະ​ປະ​ວັນ­ນະ­ຄະ­ດີ​ຈາກ​ໂຮງ​ລະຄອນ ພະ​ລັກ​ພະ​ລາມ ແຂວງ​ຫຼວງພະ​ບາງ ທີ່​ເດີ່ນ​ວັດ​ໃໝ່​ສຸ­ວັນ­ນະ​ພູມ​ມາ​ລາມ, ວັນ​ທີ 18-19 ເມ­ສາ ເລີ່ມ​ແຕ່​ເວ­ລາ 8:00-23:00 ໂມງ, ສືບ­ຕໍ່​ສົງ​ນ້ຳ​ພະບາງ​ພະ​ມິ່ງ​ບ້ານ​ຂວັນ​ເມືອງ, ຊົມ​ການສະ­ແດງ​ສິ­ລະ​ປະ​ວັນ­ນະ­ຄະ­ດີ​ຈາກ​ໂຮງ ລະ­ຄອນ​ພະ​ລັກ-ພະ​ລາມ, ວັນ​ທີ 20 ເມ­ສາ ຕອນ​ເຊົ້າ​ເວ­ລາ 8:00 ໂມງ, ເຕົ້າ­ໂຮມ​ພະ​ພິ​ຂຸ​ສົງ, ການ​ນຳ​ພັກ-ລັດ, ເຖົ້າ​ແກ່​ຜູ້​ຊົມ​ຄຸນ​ວຸດ​ທີ, ມວນ​ຊົນ​ແຂກທັງ​ພາຍ​ໃນ ແລະ​ຕ່າງ­ປະ­ເທດ​ຢູ່​ວັດ​ໃໝ່ ສຸ­ວັນ­ນະ​ພູມ​ມາ​ລາມ ເພື່ອ​ອາ​ລາດ​ຊະນາ​ອັງ​ເຊີນ​ພະ​ບາງ ກັບ​ຄືນ​ໄປ​ປະ­ດິດ​ສະຖານ​ໄວ້​ຫໍ​ພະ​ບາງ ເປັນ​ອັນ­ວ່າ​ສຳ­ເລັດການ​ຫຼິ້ນ​ບຸນ­ປີ­ໃໝ່​ລາວ​ທີ່​ແຂວງ​ຫຼວງ​ພະ​ບາງ.

ສະ­ນັ້ນ​ຈິ່ງ​ຂໍ​ເຊີນ­ຊວນ​ບັນ­ດາ​ແຂກຈາກ​ທັງ​ພາຍ​ໃນ ແລະ​ຕ່າງ­ປະ­ເທດ ເຂົ້າຮ່ວມ​ມ່ວນ­ຊື່ນ​ສະ­ຫຼອງ​ປີ​ໃໝ່​ລາວ​ນຳຊາວ​ຫຼວງ​ພະ​ບາງ​ຫົດ​ນ້ຳ​ອວຍ­ພອນ ເຊິ່ງ​ກັນ ແລະ​ກັນ ສ້າງ​ສີ­ສັນ​ສືບ​ສານ ວັດ­ທະ­ນະ­ທຳ​ອັນ​ດີ­ງາມ​ຂອງ​ຊາວ​ລາວ ເຮົາ​ເວົ້າ​ລວມ, ເວົ້າ​ສະ­ເພາະ​ກໍ​ຄື​ຊາວຫຼວງ​ພະ​ບາງ​ໄວ້​ໃຫ້​ຢືນ​ຍົງ​ຕະ­ຫຼອດ​ໄປ ແລະ​ເຊື່ອ​ວ່າ​ບັນ­ດາ​ທ່ານ​ທີ່​ໄດ້​ໄປ​ຫຼິ້ນ​ບຸນປີ​ໃໝ່​ລາວ​ທີ່​ຫຼວງ​ພະ​ບາງ​ແລ້ວ​ຈະ​ບໍ່​ຜິດຫວັງ​ແນ່­ນອນ ນອກ­ຈາກ​ຈະ​ມ່ວນ­ຊື່ນກັບ​ການ​ຫຼິ້ນ​ແລ້ວ​ຍັງ​ໄດ້​ພາບ​ປະ​ທັບ​ໃຈຕິດ​ກ້ອງ​ໄປ​ນຳ​ອີກ​ເວ­ລາ​ກັບ​ບ້ານ​ຕື່ມ​ອີກ.

ໂດຍ: ສີສຸວັນ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.