ເຕັກ​ໂນ​ໂລ​ຊີ​ຈີນ​ໄລ່​​ແທ່ນ​ທີ່ ​ສ.​ເກົາຫຼີ

ຈີນ​ເລັ່ງພັດທະນາ​​ເຕັກ​ໂນ​ໂລ​ຊີ​ໃຫ້​ສອດຄ່ອງ​ກັບ​ສັງຄົມ​ໃນ​ອະ​ນະ​ຄົດ ​ຈາກ​ທີ່​ເຄີຍ​ຢູ່​ນອກ​ສາຍຕາ​ປະ​ເທດ​ທີ່​ກ້າວ​ລ້ຳ​ດ້ານ​ເຕັກ​ໂນ​ໂລ​ຊີ ມາ​ມື້​ນີ້​ຕ້ອງ​ຮູ້ສຶກ​ກັງວົນ ​ໂດຍ​ສະ​ເພາະ ສ.​ເກົາຫຼີ.

ຫຼ້າ​ສຸດ​ ສະ​ຖາ​ບັນ​ປະ​ເມີນ​ຜົນ​ດ້ານ​ເຕັກ​ໂນ​ໂລ​ຊີ​ອຸດສາຫະກຳ (KITECH)ຂອງ ສ​.​ເກົາຫຼີ​ ຈັດ​ທຳລາຍ​ງານ​ກ່ຽວ​ກັບ​ການ​ວັດ​ຊ່ອງ​ວ່າງ​ການ​ພັດທະນາ​ເຕັກ​ໂນ​ໂລ​ຊີ​ຂອງ 2 ປະ​ເທດ​ໃນ 24 ອຸດສາຫະກຳ​ຕົ້ນຕໍ ປາກົດ​ວ່າ ການ​ພັດທະນາ​ດ້ານ​ເຕັກ​ໂນ​ໂລ​ຊີ​ຂອງ​ຈີນ​ຕາມ​ຫຼັງ​ສ.​ເກົາຫຼີສະ​ເລ່ຍຢູ່​ທີ່ 0,9 ປີ​ເທົ່າ​ນັ້ນ ຊຶ່ງ​ຈີນ​ຕາມ​ຫຼັງ​ສ.​ເກົາຫຼີ​ພຽງ​ບໍ່​ເທົ່າ​ໃດ​ກ້າວ ​ແລະ ພ້ອມ​ທີ່​ຈະ​ຂຶ້ນ​ມາ​ແຊງ​ໜ້າໄດ້​ສະ​ເໝີ.

ສ.​ເກົາຫຼີ ​ຖື​ເປັນ​ປະ​ເທດ​ເຈົ້າ​ແຫ່ງ​ເຕັກ​ໂນ​ໂລ​ຊີ​ມາ​ໂດຍ​ຕະຫຼອດ ​ແລະ ມີ​ເຄືອ​ຂ່າຍ​ອິນ​ເຕີ​ເນັດ​ໄວ​ທີ່​ສຸດ​ໃນ​ໂລກ ຊຶ່ງ ສ.ເກົາຫຼີ ​ວາງ​ແຜນ​ຈະ​ພັດທະນາ​ເຕັກ​ໂນ​ໂລ​ຊີ​ໃໝ່​ໄວໆ​ນີ້ ​ເພື່ອ​ຂັບ​ເຄື່ອນ​ເສດຖະກິດ​ປະ​ເທດ​ໃນ​ອີກ 5 ປີ​ຕໍ່ໜ້າ ​ແຕ່​ນັກ​ວິ​ເຄາະ​ຫຼາຍ​ທ່ານ​ລະບຸ​ວ່າ ພຽງ​​ແຕ່​ເພິ່ງ​ພາ​ແຜນ​ຍຸດ​ທະ​ສາດ​ດັ່ງກ່າ​ວຄົງ​ບໍ່ພໍ​ທີ່​ຈະ​ແລ່ນ​ໜີ​ຈີນ​ໄດ້.

ຂະນະ​ທີ່​ໜັງສື​ພິມບລູມ​ເບີກ​ລາຍ​ງານ​ອ້າງ​ຂໍ້​ມູນ​ຈາກ​ສະ​ຖາ​ບັນ​ວິ​ໄຈ​ເພື່ອ​ເສດຖະສາດອຸດສາຫະກຳ ​ແລະ ການ​ຄ້າ (KIET) ສ.ເກົາຫຼີ​ ລະບຸ​ວ່າ ​ໃນ​ອີກ  5 ປີ​ຕໍ່ໜ້າ ຊ່ອງ​ວ່າງ​ຂອງ​ເຕັກ​ໂນ​ໂລ​ຊີ ​ສ.​ເກົາຫຼີ ​ແລະ ຈີນ​ຈະ​ເຫຼືອ​ໜ້ອຍ​ຫຼາຍ​ໃນ​ເກືອບ​ທຸກ​ອຸດສາຫະກຳ ລວມທັງ​ສະມາດ​ໂຟນລະດັບ​ໄຮ​ເອນ, ​ເມມ​ໂມຣີຊີບ​ຕະຫຼອດ​ຮອດ​ສະມາດ​ໂຟນເອເລັກ​ໂຕຣ​ນິກ.

ຈາກຜົນ​ການ​ວິ​ໄຈ​ພົບ​ວ່າ ປະຈຸ​ບັນ​ຄວາມ​ກ້າວໜ້າ​ຂອງ​ເຕັກ​ໂນ​ໂລ​ຊີ​ການ​ສື່ສານ​ເຄື່ອນ​ທີ່ ​ແລະ ​ເຕັກ​ໂນ​ໂລ​ຊີ​ອິນ​ເຕີ​ເນັດ ອອຟຕິງ (IoT) ຂອງ​ຈີນ​ຕາມ​ຫຼັງ ​ສ.ເກົາຫຼີ​ຢູ່ 0,8 ປີ, ອຸປະກອນ​ດ້ານ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ 0,6 ປີ, ຊອຟ​ແວ 0,5 ປີ, ປະລິນຍາ​ປະ​ດິດ 0,4 ປີ ​ແລະ ​ເນັດ​ເວີກ​ພຽງ 0,2 ປີ​ ແລະ ມີ​ພຽງ 2 ອຸດສາຫະກຳ​ເທົ່າ​ນັ້ນ​ທີ່ ​ສ.​ເກົາຫຼີ​ລ້ຳ​ໜ້າ​ຄື ​ເຕັກ​ໂນ​ໂລ​ຊີ​ດ້ານ​ໜ້າ​ຈໍ​ໂທລະພາບ ​ແລະ ອຸປະກອນ ​ເຊ​ມິ​ຄອນ​ດັກ​ເຕີ ​ໂດຍ​ກ້າວໜ້າ​ກວ່າ​ຈີນ 1,2 ປີ.

ທ່ານ ຄິມ ຮະ​ຍອນ​ວຸດ ນັກ​ເສດຖະສາດ​ຂອງ​ສະ​ຖາ​ບັນ​ວິ​ໄຈ​​ເອສ​ເຄ ​ໃນ​ນະຄອນຫຼວງ​ເຊ​ອູ​ລ​ລະບຸ​ວ່າ ຈາກ​ຜົນ​ວິ​ໄຈ​ທີ່​ມີ​ພຽງ 2 ອຸດສາຫະກຳ​ເທົ່າ​ນັ້ນ ທີ່​ນຳ​ໜ້າ​ຈີນ ດັ່ງ​ນັ້ນ​ ລັດຖະບານ​ສ.​ເກົາຫຼີ​ບໍ່​ຄວນ​ຢູ່​ເສີຍ ຄວນ​ອອກ​ແຜນ​ພັດທະນາ​ຢ່າງ​ຕໍ່​ເນື່ອງ, ຈະ​ແຈ້ງ ​ແລະ ລະບຸ​ການ​ປະຕິ​ຮູບ​ທີ່​ຈຳ​ເປັນ​ເພື່ອ​ເຄື່ອນ​ປະ​ເທດ​ໄປ​ຂ້າງ​ໜ້າ ​ແລະ ​ໃນ​ມື້​ທີ່​ຊຳ​ຊຸງ​ທີ່​ປຽບ​ສະ​ເໝືອນ​ກະດູກ​ສັນຫຼັງ​ແຫ່ງ​ ສ.ເກົາຫຼີ​ ມີ​ບັນຫາປະທານ​ບໍລິ​ສັດ ລີ​ແຈ​ຍອງ​ຖືກ​ຈັບ​ຂໍ້​ຫາ​​ສໍ້​ໂກງ ຂະນະ​ທີ່​ເຕັກ​ໂນ​ໂລ​ຊີ​ການ​ຕໍ່​ເຮືອ​ທີ່​ຮຸ່ງ​ເຮືອງ ​ແລະ ​ເປັນ​ອຸດສາຫະກຳ​ດັ້ງ​ເດີມ​ຂອງ ​ສ.​ເກົາຫຼີງຽບເຫງົາ ​ແລະ ບໍລິສັດຊອບ​ປີ້ງ​ໃຫຍ່​ຄື ຮັນ​ຈິນ ກໍ່​ເຂົ້າ​ສູ່​ພາວະ​ລົ້ມ​ລະລາຍ ຂະນະທີ່​ຈີນ​ຄ່ອຍໆ​ຂຶ້ນ​ມາ​ໃນ​​ໂລກ​ເຕັກ​ໂນ​ໂລ​ຊີ ​ແລະ ສ້າງ​ຈຸດ​ຢືນ​ໃໝ່ ບໍ່​ແມ່ນ​ເປັນ​ປະ​ເທດ​ທີ່​ຄອຍ​ລອກ​ຮຽນ​ແບບ​ສິນຄ້າ​ຂອງ​ປະ​ເທດ​ອື່ນ​ຄື​ອະດີດ​ແລ້ວ.

ຈີນ​ຊຸກຍູ້​ນະ​ໂຍບາຍ​ເມດ ອິນ​ໄຊ​ນາ 2025 ຕັ້ງ​ໃຈ​ຢ່າງ​ແຮງ​ກ້າ​ທີ່​ຈະ​ຊຸກຍູ້ເສດຖະກິດ​ຈີນ​ທີ່​ໃຫຍ່​ເປັນອັນ​ດັບ 2 ຂອງ​ໂລກ​ໃຫ້​ປ່ຽນ​ຈາກ​ອຸດສາຫະກຳ​ໃຊ້​ແຮງ​ງານ​ໜັກ​ເປັນ​ອຸດສາຫະກຳ​ເຕັກ​ໂນ​ໂລ​ຊີ​ເຊັ່ນ: ອຸດສາຫະກຳ​ຫຸ່ນ​ຍົນ, ການບິນ ​ແລະ ອະ​ວະ​ກາດ.

ປັດຈຸບັນ​ ມີ​ບໍລິສັດ​ເຕັກ​ໂນ​ໂລ​ຊີ​ຈີນ​ຫຼວງ​ຫຼາຍ​ທີ່​ໂດດ​ເດັ່ນ​ໃນ​ລະດັບ​ໂລກ ບໍ່​ວ່າ​ຈະ​ເປັນ​ສະມາດ​ໂຟນຍີ່​ຫໍ້ “ຫົວ​ເວີ່ຍ” ທີ່​ໄດ້​ຮັບ​ການ​ຍອມ​ຮັບ​ທົ່ວ​ໂລກ ຫຼື ​ແພ​ລດຟອມອີ​ຄອມ​ເມີ, ​ເຕັກ​ໂນ​ໂລ​ຊີ​ການ​ເງິນ, ​ແອັບ​ພລິ​ເຄຊັນ ນອກຈາກ​ນີ້​ ຈີນ​ຍັງ​ມີ​ຈຳນວນ​ປະຊາກອນ​ຫຼາຍ​ທີ່​ສຸດ​ໃນ​ໂລກ ນັ້ນ​ໝາຍ​ເຖິງ​ກຳລັງ​ຜູ້​ບໍລິ​ໂພ​ກທີ່​ພ້ອມ​ໃຊ້​ເຕັກ​ໂລ​ຊີ​ຢ່າງ​ເຕັມ​ຄວາມ​ສາມາດ.

ທ່ານ ​ໂຊ ຊອນ ຜູ້ອຳນວຍການ​ຝ່າຍ​ວິ​ໄຈ​ອຸດສາຫະກຳ​ຈີນ (KIET) ກ່າວ​ວ່າ: ການ​ພັດທະນາ​ດ້ານ​ອຸດສາຫະກຳຂອງ​ຈີນ​ໄດ້​ປ່ຽນ​ໂຄງ​ສ້າງ​ຂອງ​ຫ່ວງ​ໂຊ້ຄຸນຄ່າ​ຂອງ ສ.ເກົາຫຼີ ​ແລະ ຈີນ ການ​ແຂ່ງຂັນ​ດ້ານ​ເຕັກ​ໂນ​ໂລ​ຊີ​ຂອງ​ສອງ​ປະ​ເທດ​ນີ້​ໃກ້​ຄຽງ​ກັນ​ຫຼາຍ ດັ່ງ​ນັ້ນ ​​ແທນ​ທີ່​ສ.ເກົາຫຼີ​ຈະ​ພັດ​ທະນາ​ໂຄງ​ສ້າງ​​​ແບບ​ທີ່​ຜ່ານ​ມາ ​ເພື່ອ​ເພີ່ມ​ມູນ​ຄ່າ ​ແລະ ສ້າງ​ຜະລິດ​ຕະພັນ​ເຕັກ​ໂນ​ໂລ​ຊີ​ຊັ້ນ​ສູງ ຊຶ່ງສ.​ເກົາຫຼີ​ຈະ​ຕ້ອງ​ລົງທຶນ​ຫຼາຍ​ຂຶ້ນ​ເພື່ອ​ທີ່​ຈະ​ພັດທະນາ​ຜະລິດ​ຕະພັນ​ໃຫ້​ສາມາດ​ແຂ່ງຂັນ​ກັບ​ຈີນ​ໄດ້.

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.