ເປີດ​ນຳ​ໃຊ້​ໂຮງ­ງານ ​ປະ­ສົມ​ເບ​ຕົງ​ແອ​ຈະ­ເລີນ

    ວັນ​ທີ 5 ມີ­ນາ 2016 ໄດ້​ມີ​ພິ­ທີເປີດ​ໂຮງ­ງານ​ປະ­ສົມ​ເບ​ຕົງ​ແອ​ຈະ­ເລີນ ໂດຍ​ມີ​ທ່ານ ເພັດ​ຖາ­ວອນ ພິ­ລາ​ວັນ ເຈົ້າ ແຂວງໆ​ຫຼວງ​ນ້ຳ​ທາ, ທ່ານ ນາງ ວຽງພອນ ເຮືອງ​ແພງ​ອ່ອນ ເຈົ້າ­ເມືອງໆ​ຫຼວງນ້ຳ​ທາ, ມີ​ພະ­ແນກ­ການ​ອ້ອມ​ຂ້າງ​ແຂວງ-ເມືອງ, ວິ​ສາ​ຫະ​ກິດ, ນັກ­ທຸ­ລະ­ກິດ ແລະ ຫ້າງ​ຮ້ານ​ຕ່າງໆ​ຕະ­ຫຼອດ​ຮອດ​ພະ­ນັກງານ​ວິ­ຊາ​ການ​ພາຍ​ໃນ​ບໍ­ລິ­ສັດ​ເຂົ້າ​ຮ່ວມ.

    ທ່ານ ວິ­ໄລ​ກອນ ແກ້ວ​ນະ­ຄອນ ອຳນວຍ​ການ​ບໍ­ລິ­ສັດ​ແອ​ຈະ­ເລີນໄດ້​ລາຍງານ​ການ​ສ້າງ­ຕັ້ງ​ໂຮງ­ງານ​ປະ­ສົມ​ເບ​ຕົງ ແມ່ນ​ເປັນ​ໂຮງ­ງານ​ແຫ່ງ​ທຳ​ອິດ​ຂອງ ແຂວງ​ຫຼວງ​ນ້ຳ​ທາທີ່​ໄດ້​ມາດ­ຕະ­ຖານເຕັກ­ນິກ​ສາ­ກົນເປົ້າ​ໝາຍ​ແມ່ນ​ອຳ­ນວຍ ຄວາມ​ສະ­ດວກ​ໃຫ້​ແກ່​ການ​ພັດ­ທະ­ນາ​ພື້ນຖານ​ເສດ­ຖະ­ກິດ-ສັງ­ຄົມ​ເວົ້າ​ສະ­ເພາະ​ກໍ​ຄື​ການ​ກໍ່­ສ້າງ​ເຄ­ຫາ​ສະ­ຖານ​ຕ່າງໆ​ໃຫ້​ມີ​ຄວາມ​ສະ­ດວກ, ທັງ​ເຮັດ​ໃຫ້​ຄ່າ​ໃຊ້​ຈ່າຍຂອງ​ຜູ້​ກໍ່­ສ້າງ​ຫຼຸດ​ລົງທັງ​ປະ­ຢັດ​ແຮງງານ​ຄົນ​ໜ້ອຍ​ລົງພ້ອມ​ທັງ​ຕອບ​ສະ­ໜອງ​ຄວາມ​ຮຽກ­ຮ້ອງຕ້ອງ­ການ​ຂອງ​ຜູ້​ຊົມ­ໃຊ້​ໄດ້​ທັນ​ເວ­ລາ, ເປົ້າ​ໝາຍ​ການ​ຕະ­ຫຼາດ​ແມ່ນ​ບໍ­ລິ­ການພາຍ​ໃນ​ເມືອງ​ຫຼວງ​ນ້ຳ​ທາ​ເທ­ສະ​ບານ ແຂວງ, ເມືອງ​ວຽງ​ພູ​ຄາ, ເມືອງ​ສິງ ລາຄາ​ການ­ຈຳ­ໜ່າຍ​ມີ​ຫີນ-ຊາຍ​ນ້ຳ​ທາ, ຫີນ-ຊາຍ​ນ້ຳ­ຂອງ​ແລະ​ຫີນ​ຂົບ​ແມ່ນ​ມີ​ຫຼາຍ​ປະ­ເພດ​ແຕກ​ຕ່າງ​ກັນໂດຍ​ມີ​ລາ­ຄາ ເລີ່ມ​ຕົ້ນ 6-8 ແສນ​ກີບ​ຕໍ່ 1 ແມັດ​ກ້ອນ​ຢູ່​ພາຍ​ໃນ​ເທ­ສະ​ບານ​ເມືອງ​ຫຼວງ​ນ້ຳ​ທາ​ສ່ວນ​ອີກ 4 ຕົວ​ເມືອງ​ແມ່ນ​ຂາຍ​ໃນ​ລາ­ຄາ​ທີ່​ແຕກ​ຕ່າງ​ກັນ​ແລ້ວ­ແຕ່​ໄລ­ຍະ​ທາງ​ຈະ​ໃກ້​ຫຼື​ໄກ.

ໂຮງ­ງານ​ປະ­ສົມ​ເບ​ຕົງ​ແອ​ຈະ­ເລີນຕັ້ງ​ຢູ່​ເສັ້ນ­ທາງ R3 ເຂດ​ບ້ານ​ໂພນ​ໄຊ​ສະຫວ່າງ ເມືອງ​ຫຼວງ​ນ້ຳ​ທາ ແຂວງ​ຫຼວງ ນ້ຳ​ທາ ພາຍ­ຫຼັງ​ທີ່​ໄດ້​ເລີ່ມ​ລົງ­ມື​ກໍ່­ສ້າງມາ​ແຕ່​ວັນ​ທີ 28 ມັງ­ກອນ 2015 ແລະ ໄດ້​ສຳ­ເລັດ​ໃນ​ວັນ​ທີ 15 ກຸມ­ພາ 2016 ລວມ​ມູນ​ຄ່າ​ທັງ​ໝົດ 5,15 ຕື້​ກວ່າ​ກີບ ແລະ​ມີ​ທຶນ​ໝຸນ​ວຽນ 1 ຕື້​ກີບ, ໂຄງ​ປະກອບ​ຂອງ​ໂຮງ­ງານ​ເບ​ຕົງ​ມີ ການ​ສ້າງ­ຕັ້ງຫ້ອງ­ການ​ອາ­ຄານ​ວິນ​ລາ 1 ຫຼັງ​ຂະ­ໜາດ 9×10 ແມັດ ສະ­ຖານ­ທີ່​ຈອດ​ລົດ​ຂະ­ໜາດ 22×12 ແມັດ ຕິດ​ຕັ້ງ​ລະ­ບົບ​ໄຟ­ຟ້າ​ແຮງກາງ 22 ກິ​ໂລ​ໂວນ 1 ເຄື່ອງ, ຕິດ​ຕັ້ງເຄື່ອງ​ຈັກ​ການ​ປະ­ສົມ​ເບ​ຕົງ​ຈຳ­ນວນ 1 ຊຸດ ແລະ​ເຄື່ອງ​ຈັກ​ຄວບ​ຄຸມ​ຕ່າງໆ ພ້ອມທັງ​ປະ­ກອບ​ລົດ​ຕັກ​ຫີນ-ຊາຍ 1 ຄັນ, ລົດບັນ­ທຸກ​ຊີ­ມັງ​ສົ່ງ​ໃຫ້​ລູກ​ຄ້າ (ລົດ​ໂມ້) ຈຳ­ນວນ 2 ຄັນ, ຈັດ​ວາງ​ສະ­ຖານ­ທີ່​ສະຕັອກ​ຫີນ-ຊາຍ​ຢູ່​ໂຮງ­ງານ 1.000 ແມັດ​ກ້ອນ, ສະ​ຕັອກ​ຊີ­ມັງ​ກາ​ຊ້າງ​ນຳ​ເຂົ້າຈາກ​ປະ­ເທດ​ໄທ​ຈຳ­ນວນ 80 ໂຕນ, ກຳລັງ​ແຮງ​ຂອງ​ໂຮງ­ງານ​ຜະ­ລິດ​ໄດ້ 200 ແມັດ​ກ້ອນ​ຕໍ່​ມື້ ແລະ​ປະ­ກອບ​ວິ­ຊາ​ການ, ນາຍ​ຊ່າງ, ພະ­ນັກ­ງານ​ຂັບ​ລົດ​ລວມ​ທັງ ໝົດ 15 ຄົນ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.