ເພື່ອລາຍຮັບບັນລຸເປົ້າ ລັດຖະບານຕັ້ງຜູ້ຊີ້ນຳຊຸກຍູ້ຈັດເກັບ 5 ແຂວງໃຫຍ່ໃນທົ່ວປະເທດ

ລັດຖະບານແຫ່ງ ສປປ ລາວ ກໍຄືກະຊວງການເງິນຜູ້ເປັນຫົວຈັກຫຼັກແຫຼ່ງຈັດຕັ້ງປະຕິບັດແຜນງົບປະມານແຫ່ງຊາດໄດ້ແຕ່ງຕັ້ງຄະນະຮັບຜິດຊອບຊີ້ນຳຊຸກຍູ້ການຈັດເກັບລາຍຮັບຢູ່ 5 ແຂວງໃຫຍ່ໃນຂອບເຂດທົ່ວປະເທດ ຊຶ່ງໃນນັ້ນ ປະກອບດ້ວຍບັນດາຮອງລັດຖະມົນຕີ ພາຍໃນກະຊວງການເງິນເປັນຫົວໜ້າແຕ່ລະຄະນະ ທັງນີ້ກໍ ເພື່ອເຮັດໃຫ້ການປະຕິບັດແຜນງົບປະມານປີ 2017 ບັນລຸໄດ້ຕາມແຜນການທີ່ລັດວາງໄວ້.

ອີງຕາມຂໍ້ຕົກລົງທີ່ອອກໂດຍທ່ານ ສົມດີ ດວງດີ ຮອງນາຍົກລັດຖະມົນຕີລັດຖະມົນຕີກະຊວງການເງິນ ສະບັບເລກທີ 0606/ກງ, ລົງວັນທີ 7 ມີນາ 2017 ການແຕ່ງຕັ້ງຄະນະຊີ້ນຳຄັ້ງນີ້ ລວມມີ 3 ຈຸ ຊຶ່ງຈຸທີ 1 ຊີ້ນຳ, ກວດກາ ແລະຊຸກຍູ້ຕິດຕາມການເກັບລາຍຮັບຢູ່ນະຄອນຫຼວງວຽງຈັນ ໂດຍແມ່ນທ່ານ ອາດສະພັງທອງ ສີພັນດອນ ຮອງລັດຖະມົນຕີກະຊວງການເງິນເປັນຫົວໜ້າຄະນະ, ຈຸທີ 2 ຊີ້ນຳ, ກວດກາ ແລະຊຸກຍູ້ຕິດຕາມການເກັບລາຍຮັບຢູ່ແຂວງຫຼວງພະບາງແມ່ນທ່ານນາງ ທິບພະກອນ ຈັນທະວົງສາ ຮອງລັດຖະມົນຕີກະຊວງການເງິນເປັນຫົວໜ້າຄະນະສ່ວນຈຸທີ 3 ຊີ້ນຳ, ກວດກາ ແລະຊຸກຍູ້ຕິດຕາມການເກັບລາຍຮັບຢູ່ແຂວງຄຳມ່ວນ, ສະຫວັນນະເຂດ ແລະຈຳປາສັກ ໂດຍແມ່ນທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ ເປັນຫົວໜ້າຄະນະຊີ້ນຳຊຸກຍູ້.

ໂດຍຄະນະທີ່ຖືກແຕ່ງຕັ້ງຈະໄດ້ສົມທົບກັບຄະນະຮັບຜິດຊອບທີ່ຖືກແຕ່ງຕັ້ງຂອງສູນກາງ ແລະທ້ອງຖິ່ນໃນການ ຈັດຕັ້ງຜັນຂະຫຍາຍການເກັບຖານຂໍ້ມູນຕາມຄຳສັ່ງເລກທີ 40/ນຍ, ຮ່ວມກັບອົງການປົກຄອງນະຄອນຫຼວງ, ແຂວງ, ເມືອງ…ໄປສູ່ພາກປະຕິບັດຕົວ ຈິງໂດຍອີງໃສ່ຖານລາຍຮັບທີ່ຖືບັນຊີເຂົ້າຢູ່ໃນລະບົບອາກອນມູນຄ່າເພີ່ມ, ຖານມອບເໝົາທີ່ມີເງື່ອນໄຂເຂົ້າຢູ່ໃນລະບົບອາກອນມູນຄ່າເພີ່ມ, ກວດກາການໄລ່ລຽງອາກອນແບບໄວໃນບັນດາຫົວໜ່ວຍທຸລະກິດ, ປັບປຸງບັນດາກົນໄກການແຈ້ງມອບ,ຊຸກຍູ້ວິທີການກວດກາຄືນຫຼັງແຈ້ງມອບ, ໄລ່ລ່ຽງອາກອນກຳໄລປະຈຳປີທີ່ບໍ່ແຈ້ງ ຫຼື ມາແຈ້ງ ແຕ່ຍັງຄ້າງມອບໃຫ້ທັນຕາມກົດໝາຍກຳນົດ.

ພ້ອມດຽວກັນນັ້ນກໍກຳນົດເປົ້າໝາຍຫົວໜ່ວຍທຸລະກິດໂດຍສະເພາະຂະແໜງການຜະລິດ, ນ້ຳມັນເຊື້ອໄຟ, ພາຫະນະ ແລະອື່ນໆ ກວດກາຄືນຄວາມຮັບຜິດຊອບຂອງພະນັກງານ, ເຈົ້າໜ້າທີ່ສ່ວຍອາກອນຕໍ່ແບບແຜນການຈັດຕັ້ງປະຕິບັດເກັບລາຍຮັບ, ການປະຕິບັດລະບຽບກົດໝາຍຂອງຂະແໜງການເງິນ, ກຳສະພາບພະນັກງານໃນການປະຕິບັດໜ້າທີ່ ທັງນີ້ ເພື່ອໃຫ້ສາມາດເກັບລາຍຮັບສ່ວຍສາອາກອນໃຫ້ວ່ອງໄວ ແລະທັນເວລາ.

ແນວໃດກໍດີ ໃນວັນທີ 13 ມີນາຜ່ານມາ ທີ່ກະຊວງການເງິນນະຄອນຫຼວງວຽງຈັນ, ຄະນະຮັບຜິດຊອບຊີ້ນໍາຊຸກຍູ້ການເກັບລາຍຮັບ 5 ແຂວງດັ່ງກ່າວ ກໍໄດ້ມີການຈັດກອງປະຊຸມປຶກສາຫາລືກະກຽມຄວາມພ້ອມເຄື່ອນໄຫວວຽກງານຊຸກຍູ້ການເກັບລາຍຮັບຕົວຈິງ ໂດຍເປັນປະທານກອງປະຊຸມຂອງທ່ານ ອາດສະພັງທອງ ສີພັນດອນ ຮອງລັດຖະມົນຕີກະຊວງການເງິນ ພ້ອມນີ້ກໍມີບັນດາຫົວໜ້າ ແລະຄະນະຮັບຜິດຊອບຊີ້ນໍາຊຸກຍູ້ການເກັບລາຍຮັບຢູ່ແຕ່ລະຈຸທີ່ຖືກແຕ່ງຕັ້ງເຂົ້າຮ່ວມ.

ທ່ານ ອາດສະພັງທອງ ສີພັນດອນ ມີຄຳເຫັນວ່າ: ການຈະລົງຊຸກຍູ້ການເກັບລາຍຮັບຢູ່ນະຄອນຫຼວງວຽງຈັນ, ຫຼວງພະບາງ, ຄຳມ່ວນ, ສະຫວັນນະເຂດ ແລະຈຳປາສັກ ແມ່ນແນໃສ່ເຮັດ ໃຫ້ການຄຸ້ມຄອງຈັດເກັບລາຍຮັບງົບປະມານແຫ່ງລັດຄົບຖ້ວນ, ຖືກຕ້ອງຕາມລະບຽບກົດໝາຍກໍານົດ, ມີປະສິດທິພາບສູງ ແລະບັນລຸຕາມແຜນການທີ່ສະພາແຫ່ງຊາດຮັບຮອງ.

ສຳລັບແຜນງົບປະມານປີ 2017 ລັດຖະບານໄດ້ຕັ້ງເປົ້າເກັບລາຍຮັບໃຫ້ ໄດ້ທັງໝົດປະມານ 23.941 ຕື້ກີບ ໃນ ນີ້ລາຍຮັບພາຍໃນ 21.463 ຕື້ກີບ ສ່ວນລາຍຈ່າຍແມ່ນບໍ່ໃຫ້ເກີນ 8.461 ຕື້ກີບ.

ຂ່າວ: ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.