ເມດ​ອິນ​ໄຊ​ນ່າ 2025 ສະ​ເທືອ​ນ​ເອກະ​ຊົນ​ຕ່າງ​ຊາດ

ການ​ກ້າວ​ເຂົ້າ​ສູ່​ອຸດ​ສາ​ຫະກຳ​ຍຸກ​ໃໝ່​ຂອງ​ຈີນ ​ເລີ່​ມ​ເປັນ​ຮູບ​ຮ່າງ​ຫຼາຍ​ຂຶ້ນ ​ເມື່ອ​ກະຊວງ​ອຸດສາຫະກຳ ​ແລະ ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ​ຈີນ​ເປີດ​ເຜີຍ​ວ່າ ​ແນວທາງ​ປະຕິບັດ​ຂອງ​ແຜນການ “​ເມດ​ອິນ​ໄຊ​ນ່າ 2025” ຊຶ່ງ​ປຽບ​ເໝືອນ​ແຜນ​ອຸດສາຫະກຳ 4,0 ​ເວີ​ຊັນ​ຈີນ ສຳ​ເລັດ​ສົມບູນ​ແລ້ວ​ໃນ​ເດືອນ​ກຸມພາ​ທີ່​ຜ່ານ​ມາ ​ໂດຍ​ແຜນການ​ດັ່ງກ່າວ​ມຸ່ງ​ໃຊ້​ນະ​ວັດຕະ​ກຳ​ຍົກ​ເຄື່ອງ​ຂະ​ແໜງ​ອຸດສາຫະກຳ​ເພື່ອ​ປ່ຽນ​ຈີນ​ສູ່​ແຫຼ່ງຜະລິດ​ສິນ​ຄ້າ​ຄຸນ​ນະພາ​ບສູງ ຈາກ​ເດີມ​ທີ່​ເນັ້ນ​ຜະລິດ​ສິນຄ້າ​ໃນ​ປະລິມານ​ຫຼາ​ຍ​ເປັນ​ຫຼັກ.

ແຜນການ​ເມດ​ອິນ​ໄຊ​ນ່າ 2025 ​ໄດ້​ຮັບ​ການ​ເປີດ​ເຜີຍ​ເປັນ​ເທື່ອ​ທຳ​ອິດ​ໃນ​ປີ 2015 ຊຶ່ງ​ເຮັດ​ໃຫ້​ຄວາມ​ສຳຄັນ​ກັບ​ການ​ພັດທະນາ 10 ຂະ​ແໜງ​ອຸດສາຫະກຳ​ເກີດ​ໃໝ່​ເຊັ່ນ: ອຸດສາຫະກຳ​ຍົນ, ອິນ​ເຕີ​ເນັດ ອອຟຣິງ (​​ໄອ​ໂອ​ທີ), ພະລັງງານ​ໝູນວຽນ ​ແລະ ຊີວະ​ການ​ແພດ.

ຕົ້ນ​ເດືອນ​ມີນາ​ທີ່​ຜ່ານ​ມາ ທ່ານ ຫຼີ​ເຄີ້ສຽງ ນາຍົກລັດຖະມົນຕີຈີນກ່າວ​ເຖິງ​ແຜນການ​ດັ່ງກ່າວ​ໃນ​ກອງ​ປະຊຸມ​ສະພາ​ວ່າ ການ​ພັດທະນາ​ການ​ຜະລິດ​ອັດ​ສະ​ລິ​ຍະ​ຄື​ຫົວ​ໃຈ​ຂອງ​ແຜນການ​ເມດ​ອິນ​ໄຊ​ນ່າ 2025 ​ໂດຍ​ຈີນ​ຕັ້ງ​ເປົ້າ​ເພີ່ມ​ປະລິມານ​ການ​ຜະລິດ​ວັດຖຸ​ດິບ​ທີ່​ໃຊ້​ໃນ​ຂະ​ແໜງ​ອຸດສາຫະກຳ​ຕ່າງໆ​ພາຍ​ໃນປະ​ເທດ​ເພີ່ມ​ຂຶ້ນ​ 40% ພາຍ​ໃນ​ປີ 2020 ​​ແລະ 70% ​ໃນ​ປີ 2025 ​ໂດຍ​ປະຈຸ​ບັນ​ຈີນ​ຍັງ​ຕ້ອງ​ເພິ່ງ​ພາ​ວັດຖຸ​ດິບ​ຈາກ​ຕ່າງປະ​ເທດ​ເຖິງ 50% ຂະນະ​ທີ່​ການ​ຜະລິດ​ອຸປະກອນ​ເຄື່ອງ​ຈັກ ແລະລະບົບ​ການ​ຄວບ​ຄຸມ​ດ້ານ​ເຕັກ​ໂນ​ໂລ​ຊີ​ຂັ້ນ​ສູງມາ​ຈາກ​ຕ່າງປະ​ເທດ​ເກືອບ​ທັງ​ໝົດ.

ນອກຈາກ​ນີ້ ​ພາຍ​ໃຕ້​ແຜນ​ເມດອິນ​ໄຊ​ນ່າ 2025 ຈີນ​ຈະ​ເດີນ​ໜ້າ​ສ້າງ​ເຂດ​ການ​ຜະລິດ​ອັດ​ສະ​ລິ​ຍະ​ທົ່ວ​ປະ​ເທດ ລວມທັງ​ຊຸກຍູ້​ໃຫ້​ປັກ​ກິ່ງ ​ແລະ ຊຽງ​ໄຮ້​ກາຍ​ເປັນ​ສູນ​ກາງ​ດ້ານ​ການ​ວິ​ໄຈ ​ແລະ ການ​ພັດທະນາ​ລະດັບ​ໂລກ ຂະນະ​ທີ່​ລັດຖະບານ​ຈະ​ສ້າງ​ສູນ​ນະ​ວັດຕະ​ກຳ​ການ​ຜະລິດ​ແຫ່ງ​ຊາດ​ເພີ່ມ​ຂຶ້ນ​ເປັນ 15 ​ແຫ່ງ​ທົ່ວ​ປະ​ເທດ​ພາຍ​ໃນ​ປີ 2020 ​ແລະ 40 ​ແຫ່ງ​ພາຍ​ໃນ​ປີ 2025 ​ເພື່ອ​ຊ່ວຍ​ເຫຼື​ອຂະ​ແໜ​ງການ​ຜະລິດ​ເຕັກ​ໂນ​ໂລ​ຊີ ​ແລະ ການ​ສ້າງ​ວັດຖຸ​ດິບ​ໃນ​ການ​ຜະລິດ​ຮູບ​ແບບ​ໃໝ່ ​ໂດຍ​ລັດຖະບານ​ຈະ​ຮ່ວມ​ທຶນ ​ແລະ ລະດົມ​ທຶນ​ຈາກ​ເອກະ​ຊົນ, ຢ່າງ​ໃດ​ກໍ​ຕາມ ຈະ​ບໍ່​ເປີດ​ໃຫ້​ຕ່າງ​ຊາດ​ເຂົ້າ​ມາ​ລົງທຶນ ​ແລະ ມີ​ສ່ວນ​ຮ່ວມ​ໃນ​ສູນ​ນະ​ວັດ​ກຳ ຈາກ​ຄວາມ​ວິຕົກ​ເລື່ອງ​ຄວາມ​ໝັ້ນຄົງ ​ແລະ ຄວາມ​ປອດ​ໄພ.ປີ 2016 ມີ​ການ​ໃຊ້​ຈ່າຍ​ໃນ​ດ້ານ​ການ​ວິ​ໄຈ ​ແລະ ພັດທະນາ​ສູງ​ຂຶ້ນ 2,08% ຂອງ​ຈີ​ດີ​ພີ ຈາກ​ອັດຕາ​ສ່ວນ​ບໍ່​ເຖິງ 1% ​ໃນ​ປີ 2015 ​ໂດຍ​ຈຳນວນ​ຍື່ນ​ຈົດ​ສິດທິ​ບັດ​ສູງ​ກວ່າ 1 ລ້ານ​ສະບັບ.

ເອກະຊົນຕ່າງປະເທດຢ້ານຖືກກີດກັ້ນ: ຫຼັງ​ຈາກ​ເປີດ​ເຜີຍ​ລາຍ​ລະອຽດ​ແຜນ​ເມດ​ອິນ​ໄຊ​ນ່າ 2025 ຫໍ​ການ​ຄ້າ​ເອີຣົບ​ໃນ​ຈີນ ສະ​ແດງ​ຄວາມ​ວິຕົກ​ວ່າ ​ເອກະ​ຊົນ​ຕ່າງ​ຊາດ​ມີ​ທ່າອຽງ​ຖືກ​ຈີນ​ກີດ​ກັ້ນ​ທາງ​ທຸລະ​ກິດ​ຫຼາຍ​ກວ່າ​ເກົ່າ ​ເນື່ອງ​ຈາກ​ຈີນ​ຫັນ​ໄປ​ສະໜັບສະໜູນ​ອຸດສາຫະກຳໃນ​ປະ​ເທດ​ຫຼາຍຂຶ້ນ.

ທ່ານ ​ໂຈ​ເອີ ວຸດ​ກີ ປະທານ​ຫໍ​ການ​ຄ້າ​ເອີຣົບກ່າວ​ວ່າ ປະຈຸ​ບັນ​ເອກະ​ຊົນ​ຕ່າງ​ຊາດ​ຈຳນວນ​ຫຼາຍ​ຖືກ​ກົດ​ດັນ​ໃຫ້​ຕ້ອງ​ຖ່າຍ​ໂອນ​ເຕັກ​ໂນ​ໂລ​ຊີ​ຊັ້ນ​ສູງ​ໃຫ້​ຈີນ ​ເພື່ອ​ແລກ​ກັບ​ການ​ເຂົ້າ​ໄປ​ເຮັດ​ທຸລະ​ກິດ​ໃນ​ປະ​ເທດ ຊຶ່ງ​ເມື່ອ​ເຮັດ​ຄື​ແນວ​ນັ້ນ ​ເອກະ​ຊົນ​ຍັງ​ຖືກ​ຈຳກັດ​ສິດທິ​ໃນ​ການຈຳໜ່າຍ​ສິນຄ້າໃນ​ຈີນ ​ແລະ ຂໍ​ເຂົ້າ​ຮ່ວມ​ໂຄງການ​ກັບ​ລັດຖະບານ.ຊຶ່ງການ​ລົງ​ທຶນ​ເອີຣົບຢູ່​ຈີນ​ຫຼຸດ​ລົງ 20% ຢູ່​ທີ່ 8 ຕື້​ເອີ​ໂຣ​ໃນ​ປີ 2016 ຈາກ 10 ຕື້​ເອີ​ໂຣ​ໃນ​ປີ 2015 ຂະນະ​ທີ່​ການ​ລົງທຶນ​ຂອງ​ເອກະ​ຊົນ​ຈີນ​ໃນ​ເອີຣົບ​ປີ​ທີ່​ຜ່ານ​ມາເພີ່ມ​ຂຶ້ນ 77% ຢູ່​ທີ່ 35 ຕື້​ເອີ​ໂຣຈາກ​ປີ​ກ່ອນ.

ທ່ານມຽວ​ເວ່ຍ ລັດຖະມົນຕີ​ວ່າການ​ກະຊວງ​ອຸດສາຫະກຳ​ຈີນ​ຊີ້​ແຈງ​ວ່າ ​ແຜນ​ເມດ​ອິນ​ໄຊ​ນ່າ2025 ບໍ່​ໄດ້​ກີດ​ກັ້ນ​ເອກະ​ຊົນ​ຕ່າງປະ​ເທດ​ເຂົ້າ​ມາ​ເຮັດ​ທຸລະ​ກິດ​ໃນ​ປະ​ເທດ ​ໂດຍ​ແຜນ​ດັ່ງກ່າວ​ພຽງ​ຕ້ອງການ​ປ້ອງ​ກັນ​ບໍລິສັດ​ບາງ​ແຫ່ງ​​ອາ​ໄສ​ຊ່ອງ​ວ່າງ​ດ້ານ​ນະ​ໂຍບາຍ​ມາ​ເອົາ​ປຽບ​ຈີນ​ເທົ່າ​ນັ້ນ ພ້ອມ​ເນັ້ນ​ຈຸດ​ຢືນ​ວ່າ ຈີນ​ເປີດ​ກ້ວາງ​ຮັບ​ນັກ​ລົງທຶນ​ຈາກ​ຕ່າງປະ​ເທດ ​ໂດຍ​ບໍລິສັດ​ທີ່​ເຂົ້າ​ມາ​ເຮັດ​ທຸລະ​ກິດຈະ​ໄດ້​ຮັບ​ການ​ປະຕິບັດ​ເທົ່າ​ທຽບ​ກັບ​ບໍລິສັດ​ສັນຊາດ​ຈີນ.

ຫໍ​ການ​ຄ້າ​ອາ​ເມ​ລິ​ກາລະ​ບຸ​ວ່າ ປະ​ເດັນ​ສຳຄັນ​ທີ່​ສຸດ​ຄື ອຸດສາຫະກຳ 10 ພາກສ່ວນ​ມີ​ທ່າ​ອຽງ​ໄດ້​ຮັບ​ເງິນ​ອູດ​ໜູນ​ຈາກ​ລັດຖະບານ​ຫຼາຍ​ຕື້​ຢວນ​ໃນ​ບໍ່​ທໍ່​ໃດ​ປີ​ຕໍ່ໜ້າ ຊຶ່ງ​ຈະ​ທຳລາຍ​ການ​ແຂ່ງຂັນ​ຂະ​ແໜງ​ທຸລະ​ກິດ​ໃນ​ຈີນ ​ແລະ ຕະຫຼາດ​ໂລກ ​ເນື່ອງ​ຈາກ​ເງິນ​ດັ່ງກ່າວ​ບໍ່​ໄດ້​ນຳ​​ໄປ​ໃຊ້​ລົງທຶນ​ພັດທະນາ​ນະ​ວັດ​ຕະກຳ​ໃນ​ຈີນ​ພຽງ​ຢ່າງ​ດຽວ ​ແຕ່​ໃຊ້​ຊື້​ເຕັກ​ໂນ​ໂລ​ຊີ​ຈາກ​ຕ່າງປະ​ເທດ​.

ຂະນະ​ດຽວ​ກັນ ສະ​ຖາ​ບັນນະ​ວັດຕະ​ກຳ ​ແລະ ​ເຕັກ​ໂນ​ໂລ​ຊີ​ຂອງ​ອາ​ເມ​ລິ​ກາ ຮຽກຮ້ອງ​ໃຫ້​ອາ​ເມ​ລິ​ກາ​ຮ່ວມ​ມື​ກັບ​ນານາປະ​ເທດ​ເຊັ່ນ: ອົດ​ສະຕຣາລີ, ກາ​ນາ​ດາ, ​ເຢຍລະ​ມັນ, ຍີ່ປຸ່ນ, ສ ​ເກົາຫຼີ ​ແລະ ປະ​ເທດ​ເອີຣົບ ກົດ​ດັນ​ຈີນ​ປ່ຽນ​​ແຜນ​ເມດ​ອິນ​ໄຊ​ນ່າ ​ເນື່ອງ​ຈາກ​ແຜນ​ດັ່ງກ່າວ​ເປັນ​ຊາດ​ນິຍົມ​ທາງ​ເສດຖະກິດ ຊຶ່ງ​ຈະ​ຄຸກ​ຄາມ​ລະບົບ​ການ​ຄ້າ ​ແລະ ​ເສດຖະກິດ​ທົ່ວ​ໂລກ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.