ເລສເຕີ ຍັງແຮງ ບຸກຊະນະ ເວສແຮັມ ຢູໄຕເຕັດ 3-2

ສະໜາມ ໂອລິມປິກ ສະເຕດ້ຽມ

ເວສແຮັມ ຢູໄນເຕັດຜົນງານຊ່ວງຫຼັງບໍ່ຄ່ອຍດີ ເສຍມາ 2 ນັດຕິດ ສ່ວນນັດນີ້ ທີມຂາດກອງກາງຕົວຫຼັກ ມາກ ໂນເບິລ ມີອາການບາດເຈັບຈຶ່ງໃຊ້ ຊິກູ ຄູຢາເຕ ແບັກຂວາມາຢືນເປັນກອງກາງແທນ ແລ້ວໃຫ້ ແຊມ ໄບແຣມ ຫຼິ້ນແບັກຂວາ. ສ່ວນຕົວບຸກ ໂຊຟີຢານ ເຟກູລີ ຫຼຸດໄປເປັນຕົວສຳຮອງໃຫ້ ອັງເດຣ ອາຢິວ ໄດ້ລົງ 11 ຕົວຈິງ.

ຝັ່ງ ເລສເຕີ ຊິຕີ ທີ່ເກັບໄຊຊະນະມາ 3 ນັດຕິດທຸກລາຍການ ນັບຕັ້ງແຕ່ ເຄຣັກ ເຊັກສະເປຍ ກ້າວຂຶ້ນມາຄຸມທີມແທນ ຣານິເອຣີ ທີ່ຖືກປົດອອກໄປ ໃນທີມຂາດພຽງກອງຫຼັງຫົວໜ້າທີມ ເວສ ມໍແກນ ທີ່ເຈັບຫຼັງ ແລ້ວສົ່ງ ໂຢອັນ ເບີນາລີຢານ ລົງແທນ.

ເລິ່ມການແຂ່ງຂັນ 5 ນາທີ ທີມຢາມກໍ່ໄດ້ປະຕູຂຶ້ນທຳຢ່າງວ່ອງໄວ ເຈມ ວາດີ ໄດ້ບານຢູ່ໃນເຂດຂອງ ເວສແຮມ ແລ້ວຈ່າຍອອກຂ້າງຝັ່ງຂວາໃຫ້ ຣີຢາດ ມາເຣຊ ເປີດດ້ວຍຊ້າຍໂຄ້ງເຂົ້າມາໜ້າປະຕູ ບານຕົກພື້ນບໍ່ຖືກໃຜເຕັ້ນເຂົ້າເສົາສອງໄປແບບງ່າຍໆ ເລສເຕີ ນຳ 1-0.

ອີກ 2 ນາທີຕໍ່ມາ ເລສເຕີ ກໍ່ມາໜີຫ່າງອອກໄປເປັນ 2-0 ເປັນຈັງຫວະຫຼິ້ນບານສັ້ນຈາກລູກໄໝຕັ້ງເຕະ ຢູ່ໜ້າປະຕູຂອງ ເວສແຮມ ມາເຣຊ ສົ່ງຈາກກອບເຂດໂທດຝັ່ງຊ້າຍໃຫ້ ມາກ ອັລໄບຕັນ ທີ່ຢືນຢູ່ໜ້າກອບເຂດໂທດແລ້ວເປີດເຂົ້າໄປໜ້າປະຕູໃຫ້ ໂຣເບີດ ຮູດ ໂດດໂຂກແບບບໍ່ມີໃຜເຂົ້າມາກົດດັນ ບານຜ່ານມືຂອງ ດາເຣນ ແຣນດອບ ຜູ້ຮັກສາປະຕູຂອງ ເວສແຮມ ເຂົ້າປະຕູ.

ນາທີ 21 ເວສແຮມ ມາໄດ້ປະຕູໄລ່ຕີຕື້ນເປັນ 2-1 ຈາກລູກໄໝຕັ້ງເຕະໜ້າປະຕູຂອງ ເລສເຕີ ໄລຍະປະມານ 23 ແມັດ ມານູເອລ ລາຊິນີ ປັ່ນໂຄ້ງດ້ວຍຂວາຜ່ານກຳແພງເຂົ້າປະຕູໄປແບບສວຍງາມ ແຄສເປີ ສະໄມເຄິລ ເຮັດໄດ້ພຽງຢືນປ້ອງກັນດ້ວຍສາຍຕາ.

ຫຼັງຈາກໄດ້ປະຕູໄລ່ຕີຕື້ນມາເຈົ້າບ້ານກໍ່ພະຍາຍາມເປີດເກມບຸກໃສ່ ເລສເຕີ ແຕ່ນາທີ 38 ກໍ່ມາເສຍປະຕູທີ 3 ຈາກລູກເຕະມູມ ທາງຝັ່ງຂວາ ມາເຮຊ ເປີດດ້ວຍຊ້າຍເຂົ້າມາໜ້າປະຕູໃຫ້ ເອັນດີດີ ກອງກາງຂອງ ເລສເຕີ ຈັບບານດ້ວຍເອິກໄປເຂົ້າທາງ ວາດີ ຍິງດ້ວຍຊ້າຍເຂົ້າປະຕູ ໝົດເຄິ່ງເວລາທຳອິດ ເລສເຕີ ນຳ 3-1.

ເຂົ້າສູ່ເຄິ່ງຫຼັງ ນາທີ 63 ເຈົ້າບ້ານມາໄດ້ະຕູໄລ່ມາເປັນ 3-2 ຈັງຫວະເຕະມູມ ລາຊິນີ ເປີດບານໄປເສົາສອງໃຫ້ ແອນດີ ແຄໂຣ ໂຂກຕັ້ງເຂົ້າມາໜ້າປະຕູໃຫ້ ອັງເດຣ ອາຢິວ ຍິງຈໍ່ໆເຂົ້າປະຕູ.

ຫຼັງຈາກ ເວສແຮັມ ໄດ້ປະຕູຕີຕື້ນຂຶ້ນມາກໍ່ພະຍາຍາມບຸກເພື່ອເອົາປະຕູຕີສະເໝີ ແລະ ມີໂອກາດຫຼາຍຈັງຫວະ ແຕ່ໃຊ້ໂອກາດເປືອງເອງ ພ້ອມກັບການຊ່ວຍປ້ອງກັນຂອງ ແຄສເປີ ສະໄມເຄິລ ຈຶ່ງຊ່ວຍໃຫ້ ເລສເຕີ ຊິຕີ ບຸກມາເອົາຊະນະ ເວສແຮັມ ຢູໄນເຕັດ ໄປ 3-2.

ສ່ວນຜົນການແຂ່ງຂັນຄູ່ອື່ນໆທີ່ແຂ່ງໃນວັນເສົາ

ເວສພຣອມວິຊ ອັລບຽນ 3-1 ອາເຊນອລ

ຄຣິສຕັນ ພາເລຊ 1-0 ວັດຟອດ

ເອັຟເວີຕັນ 4-0 ຮັລ ຊິຕີ

ສະໂຕກ ຊິຕີ 1-2 ເຊລຊີ

ຊັນເດີແລນ 0-0 ເບີນລີ

ບອນມັດ 2-0 ສະວອນຊີ ຊິຕີ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.