ເວ​ເນ​ຊູ​ເອລາ​ຂໍ​ໃຫ້​ ສປຊ ຊ່ວຍ​ແກ້​ວິ​ກິດ​ຂາດ​ແຄນ​ຢາ

ລັດຖະບານ​ເວ​ເນ​ຊູ​ເອລາ​ຂໍ​ໃຫ້​ສະຫະ​ປະຊາ​ຊາດ​ຊ່ວຍ​ເຫຼືອ​ສະຖານະ​ການ​ຂາດ​ແຄນ​ຢາ​ປິ່ນປົວ​ພະຍາດ​ໃນ​ປະ​ເທດ​ທີ່​ມີ​ປະລິມານ​ຄ້າງ​ສ່າ​ງ​ໃນ​ຕອນ​ນີ້​ເຫຼືອ​ພຽງ 3%.

ສຳນັກ​ຂ່າວ​ຕ່າງປະ​ເທດ​ລາຍ​ງານ​ວ່າ: ທ່ານ ​ໂຄ​ລັສ ມາ​ດູ​ໂຣ ປະທານາທິບໍດີ​ຂອງ​ເວ​ເນ​ຊູ​ເອລາ ຖະ​ແຫຼ​ງວ່າ ​ໄດ້​ຍື່ນ​ໜັງ​ສື​ຕໍ່​ທ່ານ ​ເຈ​ສຊິ​ກາ ​ໄຟ​ອີ​ຕາ ຜູ້ອຳນວຍການ​ໂຄງການ​ພັດທະນາ​ແຫ່ງ​ສະຫະ​ປະຊາ​ຊາດ (ຢູ​ເອັນ​ດີ​ພີ) ປະຈຳ​ພາກ​ພື້ນ​ອາ​ເມ​ລິ​ກາ​ລາ​ຕິນ ​ເພື່ອ​ຂໍ​ຄວາມ​ຊ່ວຍ​ເຫຼືອ​ຈາກ ຢູ​ເອັນ​ດີ​ພີ ຊຶ່ງ​ເປັນ​ໜຶ່ງ​ໃນ​ໜ່ວຍ​ງານ​ດ້ານ​ການ​ພັດທະນາ​ສັງຄົມ​ຂອງ​ສະຫະ​ປະຊາ​ຊາດ (ສປຊ) ​ໃນ​ການ​ແກ້​ໄຂ​ວິ​ກິດ​ການ​ຂາດ​ແຄນ​ຢາ​ຮັກສາ​ພະຍາດ​ໃນ​ປະ​ເທດ ຂະນະ​ທີ່​ຂໍ້​ມູນ​ຈາກ​ສະຫະພັນ​ແພດ​ເວ​ເນ​ຊູ​ເອລາ​ລະບຸວ່າ ປະລິມານ​ຢາ​ປິ່ນປົວ​ພະຍາດ​ພື້ນ​ຖານ​ໃນ​ສ່າ​ງຢາ​ຂອງ​ປະ​ເທດ​​ເຫຼືອ​ພຽງ 3% ​ເທົ່າ​ນັ້ນ.

ທັງ​ນີ້ ສະຖານະ​ການ​ການ​ຂາດ​ແຄນ​ຢາ​ປິ່ນປົວ​ພະຍາດ​ຂອງ​ເວ​ເນ​ຊູ​ເອລາ​ເປັນ​ຜົນ​ມາ​ຈາກ​ວິ​ກິດ​ເສດຖະກິດ​ໃນ​ປະ​ເທດ​ທີ່​ຖົດຖອຍ​ດົນ​ກວ່າ 4 ປີ​ແລ້ວ ຊຶ່ງ​ສົ່ງ​ຜົນ​ໃຫ້​ເກີດ​ພາວະ​ເຂົ້າ​ຍາກ​ໝາກ​ແພງ​ຂັ້ນ​ຮ້າຍ​ແຮງ ​ໂດຍ​ສິນຄ້າ​ຈຳ​ເປັນ​ສຳລັບ​ການ​ອຸປະ​ໂພ​ກ ​ແລະ ບໍລິ​ໂພ​ກທຸກ​ຊະນິດ​ບໍ່​ພຽງພໍ​ກັບ​ຄວາມ​ຕ້ອງການ​ຂອງ​ປະຊາຊົນ ​ໃນ​ຂະນະ​ທີ່​ກອງ​ທຶນ​ການ​ເງິນ​ສາກົນ (​ໄອ​ເອັມ​ເອຟ) ປະ​ເມີນ​ອັດຕາ​ເງິນ​ເຟີ​ໃນ​ປີ​ນີ້​ອາດ​ສູງ​ເຖິງ 1.600% ​ເພີ່ມ​ຂຶ້ນ 2 ​ເທົ່າ​ຈາກ​ສະຖິຕິ​ປີ 2016.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.