ແຕ່ງຕັ້ງຮອງເຈົ້າຄອງນະຄອນຫຼວງວຽງຈັນ ຜູ້ໃໝ່

ໃນວັນທີ 19 ເມສາ 2019, ທີ່ສຳນັກງານປົກຄອງນະຄອນຫຼວງວຽງຈັນ ໄດ້ຈັດພິທີປະກາດການຈັດຕັ້ງຮອງເຈົ້າຄອງນະຄອນຫຼວງວຽງຈັນ (ຜູ້ໃໝ່) ໂດຍການເຂົ້າຮ່ວມເປັນປະທານຂອງ ທ່ານ   ສິນລະວົງ ຄຸດໄພທູນ, ເຈົ້າຄອງນະຄອນຫຼວງວຽງຈັນ, ມີກົມຈັດຕັ້ງກະຊວງການເງິນ, ຄະນະປະຈຳສະພາປະຊາຊົນນະຄອນຫຼວງວຽງຈັນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ໃນພິທີ ທ່ານ ບຸນທອງ ພົມມະຈັນ, ຫົວໜ້າຄະນະຈັດຕັ້ງ ນະຄອນຫຼວງວຽງຈັນ ໄດ້ຂຶ້ນຜ່ານບັນດານິຕິກຳສຳຄັນກ່ຽວກັບການແຕ່ງຕັ້ງ ໂດຍປະຕິບັດຕາມ ຄຳສັ່ງຂອງຄະນະເລຂາທິການສູນກາງພັກ ສະບັບເລກທີ 01/ຄລສພ, ລົງວັນທີ 27 ກຸມພາ 2019; ອີງຕາມ ຄຳສັ່ງຂອງນາຍົກລັດຖະມົນຕີ ສະບັບເລກທີ 01/ນຍ, ລົງວັນທີ 27 ກຸມພາ 2019; ອີງຕາມແຈ້ງການ ຂອງຄະະນຈັດຕັ້ງສູນກາງພັກ ສະບັບເລກທີ 39/ຄຈສພ, ລົງວັນທີ 20 ກຸມພາ 2019. ເຈົ້າຄອງນະຄອນຫຼວງວຽງຈັນ ຈຶ່ງໄດ້ອອກຂໍ້ຕົກລົງ ສະບັບເລກທີ 0267/ຈນວ, ລົງວັນທີ 4 ເມສາ 2019 ເຫັນດີແຕ່ງຕັ້ງ ທ່ານ ອາດສະພັງທອງ ສີພັນດອນ, ຮອງລັດຖະມົນຕີກະຊວງການເງິນ ມາເປັນຮອງເຈົ້າຄອງນະຄອນຫຼວງວຽງຈັນ.

ພາຍຫຼັງ ສຳເລັດການປະກາດການຈັດຕັ້ງ ທ່ານ ສິນລະວົງ ຄຸດໄພທູນ ກໍໄດ້ສະແດງຄວາມຊົມເຊີຍ ແລະ ຍິນດີຕ້ອນຮັບ ທ່ານ ອາດສະພັງທອງ ສີພັນດອນ ທີ່ໄດ້ມາຮັບໜ້າທີ່ໃໝ່ຢູ່ ນະຄອນຫຼວງວຽງຈັນ (ນວ), ພ້ອມກັນນັ້ນ ກໍໄດ້ແນະນຳບາງນິຕິກຳສຳຄັນ, ເນື້ອໃນ, ຄາດໝາຍ, ແຜນວຽກຍຸດທະສາດ ແລະ ວິໄສທັດຂອງນະຄອນຫຼວງວຽງຈັນ ພ້ອມທັງການແນະນຳແບ່ງງານໃນແຕ່ລະຂັ້ນຂອງ ນວ ຕໍ່ທ່ານ ຮອງເຈົ້າຄອງນະຄອນຫຼວງວຽງຈັນ (ຜູ້ໃໝ່) ເພື່ອຊາບ ແລະ ເປັນແນວທາງ ໃນການພິຈາລະນາ, ຄົ້ນຄວ້າ ແລະ ສືບຕໍ່ຈັດຕັ້ງປະຕິບັດວຽກງານ ໃນເວລາມາຮັບໜ້າທີ່ໃໝ່ນີ້.

ຂໍ້ມູນ: ວຽງຈັນໃໝ່

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.