ແສງ​ເພັດ ອຸ­ປະ­ຖຳ​ນັກກ໊ອ​ຟລາວ 1 ຕື້ ສູ້ຊີເກມ

ທ່ານ ສອນ​ເພັດ ເມືອງ​ວົງ ປະ­ທານ​ບໍ­ລິ­ສັດແສງ​ເພັດເກັບ​ກູ້​ລະເບີດ ໃຫ້­ການ​ສະ­ໜັບ­ສະ­ໜູນ​ທັບ​ນັກກີ​ລາກ​໊ອ​ຟລາວ ລ່າ​ຜົນ­ງານ​ໃນ​ການ​ແຂ່ງຂັນ​ງານ​ມະ­ຫະ​ກຳ​ກິ­ລາ​ຊີ­ ເກມ ຄັ້ງ​ທີ 29 ຫຼື ກົວ​ລາ​ລຳ​ເປີເກມ ທີ່​ປະ­ເທດ​ມາ​ເລ​ເຊຍ​ເປັນ​ເຈົ້າ­ພາບລະ­ຫວ່າງ​ວັນ​ທີ 19-31 ສິງ­ຫາ 2017 ມູນ​ຄ່າ 1 ຕື້ກວ່າ​ກີບ.

ພິ­ທີ​ປະ­ກາດ​ເຈດ​ຈຳ­ນົງ​ການ​ໃຫ້ສະ­ໜັບ­ສະ­ໜູນ​ທັບ​ນັກ​ກິ​ລາກ​໊ອຟ​ທີມ​ຊາດ​ລາວ ເຂົ້າ​ຮ່ວມກົວ​ລາ​ລຳ​ເປີ ເກມ 2017 ພ້ອມ​ທັງ​ເປີດ­ເຜີຍ 5 ນັກ​ກີ​ລາກ​໊ອຟ​ທີມ​ຊາດ​ລາວ​ຮ່ວມ​ງານ ດັ່ງ­ກ່າວ​ຄັ້ງ​ນີ້ ໄດ້​ມີ​ຂຶ້ນ​ເມື່ອ​ວັນ​ທີ 4 ມິ­ຖຸ­ນາ ຜ່ານ​ມາ ທີ່​ຮ້ານ​ອາ­ຫານ ອິນ​ທາວ ( IN TOWN ) ນະ­ຄອນ­ຫຼວງ​ວຽງ​ຈັນ ໂດຍ​ໃຫ້​ກຽດ​ເຂົ້າ​ຮ່ວມ​ຂອງ ທ່ານ ບົວ​ລານ ສິ­ລິ​ປັນ­ຍາ ຮອງ​ລັດ­ຖະ­ມົນ­ຕີກະ­ຊວງ​ສຶກ​ສາ​ທິ​ການ ແລະ​ກີ­ລາ, ທ່ານ ສູນ​ທອນ ສິ​ຣິ​ສັກ ປະ­ທານ ສະ­ຫະ ພັນ​ກ໊ອຟ​ແຫ່ງ​ຊາດ​ລາວ ແລະ​ທ່ານ ສອນ​ເພັດ ເມືອງ​ວົງ ປະ­ທານ​ບໍ­ລິ­ສັດແສງ​ເພັດເກັບ​ກູ້​ລະ­ເບີດ ຜູ້​ໃຫ້­ການ​ອຸປະ​ຖຳ​ຫຼັກ​ນັກ​ກີ​ລາກ​໊ອ​ຟລາວ ພ້ອມ​ດ້ວຍແຂກ​ກິດ​ຕິ​ມະ​ສັກ, ຄູ​ເຝິກ, ນັກ​ກິ­ລາ ແລະ ສື່​ມວນ​ຊົນ​ທຸກ​ຂະ­ແໜງ­ການ​ເຂົ້າ​ຮ່ວມ.

ທ່ານ ສົງ­ຄາມ ສິ­ລາ​ເພັດ ຮອງ​ປະທານ ແລະ​ເລ­ຂາ­ທິ­ການ​ສະ­ຫະ­ພັນກ໊ອຟ​ແຫ່ງ​ຊາດລາວ ໄດ້​ກ່າວ​ວ່າ: ໃນເບື້ອງ​ຕົນ ທາງ​ສະ­ຫະ​ພັນ​ກ໊ອຟ ໄດ້​ຄັດເອົາ​ນັກ​ກິ­ລາ​ທີ່​ມີ​ຜົນ­ງານ​ດີ­ເດັ່ນ ແລະ​ຢູ່ ລະ­ດັບ​ແຖວ​ໜ້າ​ໃນ​ວົງ​ການ​ກີ​ລາກ໊ອຟ ລາວ ກໍ່​ຄື ຈາກ​ລາຍ­ການ ລາວ​ກ໊ອຟ​ຊາ​ເລັນ 2017 ນັບ​ຕັ້ງ­ແຕ່​ອັນ​ດັບ​ທີ 1 ຮອດ ທີ 10, ໃນ​ນັ້ນ ໄດ້​ຂໍ​ຖອນ​ຕົວ 3 ຄົນ ແລະ​ຍັງ​ເຫຼືອ 7 ຄົນ. ຢ່າງ­ໃດ​ກໍ່​ຕາມ, ດ້ວຍ​ເຈດ​ຕະ​ນາຂອງ​ຜູ້​ອຸ­ປະ­ຖຳ​ຫຼັກ​ເຫັນ­ແກ່​ກຽດ​ສັກ​ສີ​ຂອງ​ປະ­ເທດ ໂດຍ ທ່ານ ສອນ​ເພັດ ເມືອງ​ວົງ ໄດ້​ສະ­ເໜີ​ໃຫ້​ເອົາ​ນັກ​ກ໊ອ​ຟລາວທີ່​ໄປ​ສຶກ​ສາ ແລະ ຮຽນ​ຕີກ​໊ອຟ​ຢູ່ ຟໍ​ລີ​ດາ (Academy IMG Florida) ແລະ ຢູ່ລັດ​ກາ­ລີ​ຟໍ​ເນຍ​ສະ­ຫະ­ລັດ​ອາ​ເມ​ຣິ​ກາ ຈຳ­ນວນ 4 ຄົນ ມາ​ຮ່ວມ​ຄັດ​ເລືອກ ເຮັດ​ໃຫ້​ມີ​ນັກ­ກີ­ລາ​ເຂົ້າ​ຮ່ວມ​ຄັດ​ເລືອກ ເປັນ 11 ຄົນ (ພາຍ​ໃນ 7 ຄົນ ແລະ ມາ​ແຕ່​ສະ­ຫະ­ລັດ​ອາ​ເມ​ຣິ​ກາ 4 ຄົນ) ເພື່ອ​ຄັດ​ເອົາ​ພຽງ 4 ຄົນ​ໄປ ຊີ­ເກມ ທີ່​ມາ​ເລ​ເຊຍ ສ່ວນ​ອີກ 1 ຕົວ​ສຳ­ຮອງແມ່ນ​ຄັດ​ໄດ້​ແລ້ວ.

ສຳ­ລັບ​ແຜນ​ງົບ­ປະ­ມານ​ພວກ​ເຮົາ​ມີ​ຢູ່ 2 ແຜນ ຄື: ແຜນ​ທີ 1 ມີ​ການ​ໃຊ້​ຈ່າຍເຝິກ­ຊ້ອມ, ອັດ­ຕາ​ກິນ, ຄ່າ​ສະ­ໜາມ ໃນ​ມື້​ການ​ຄັດ​ເລືອກ ແລະ​ເດີນ­ທາງ​ສູ່ຊີ­ເກມ ໂດຍ​ສະ­ຫະ​ພັນ​ກ໊ອຟ​ແຫ່ງ​ຊາດລາວ ໄດ້​ສະ­ເໜີ​ໃຫ້​ກົມ​ກີ­ລາ​ລະ­ດັບ​ສູງ ປະ­ມານ 135,6 ລ້ານ​ກີບ ສ່ວນ​ແຜນ​ທີ 2 ແມ່ນ​ການ​ໃຊ້​ຈ່າຍ​ຢູ່​ຕ່າງ­ປະ­ເທດ​ປະ­ກອບ​ມີ­ຄ່າ​ເດີນ­ທາງ, ກິນ​ຢູ່, ຄ່າ​ເດີນ­ທາງ​ຄູ​ເຝິກ ມາ​ຈາກ​ສະ­ຫະ­ລັດ​ອາ​ເມ​ຣິ​ກາ​ໄປ​ປະ­ເທດອົດ​ສະ​ຕາ​ລີ ແລະ​ໄປ​ປະ­ເທດ​ມາ​ເລ​ເຊຍ ເປັນ​ມູນ​ຄ່າ​ຕົວ​ເລກ​ປະ­ມານ 127.190 ໂດ​ລາ ໂດຍ​ແມ່ນ​ທ່ານ ສອນ​ເພັດ ເປັນ​ຜູ້​ໃຫ້ການ​ອຸ­ປະ­ຖຳ​ຫຼັກ​ໃນ​ການ­ເຄື່ອນ­ໄຫວ​ຕ່າງໆ.

ໂອ­ກາດ​ດຽວ​ກັນ​ນັ້ນ, ທ່ານ ສູນທອນ ສິ​ຣິ​ສັກ ໄດ້​ກ່າວ​ວ່າ: ພາຍ­ຫຼັງ​ທີ່​ມີການ​ແຂ່ງ­ຂັນລາວ​ກ໊ອຟ​ຊາ​ເລັນ 2017  ໄດ້​ຄັດ​ເລືອກ​ເອົາ​ນັກ­ກີ­ລາ​ທີ່​ດີ​ທີ່​ສຸດ ແລະ ເອົາ​ນັກ­ກີ­ລາ​ລາວ​ທີ່​ໄປ​ສຶກ​ສາ​ຢູ່​ຕ່າງ ປະ­ເທດ​ເຂົ້າ​ມາ​ເປັນ​ທີມ​ດຽວ​ກັນ ເພື່ອມາ​ເຝິກ­ຊ້ອມ ແລະ​ຄັດ​ເລືອກ​ແຂ່ງ­ຂັນ ເອົາ​ພຽງ 4 ຄົນ​ທີ່​ເກັ່ງ​ທີ່ ສຸດ ເຊິ່ງ​ນັກ­ກີ­ລາ 4 ຄົນ​ນີ້ ແມ່ນ​ມີ​ຄວາມ​ກະ​ຕື​ລື​ລົ້ນ. ຢ່າງໃດ​ກໍ່​ຕາມ, ໃນ​ຊີ­ເກມ​ແມ່ນ​ພວກ​ເຮົາ​ຢາກໄຕ່­ເຕົ້າ​ໄປ​ໃຫ້​ມັນ​ເຖິງ ຊຶ່ງ​ຊຸດ​ນີ້​ແມ່ນ​ເປັນຊຸດ​ທີ່​ດີ​ທີ່​ສຸດ ແລະ​ມີ​ຄວາມ​ແຕກ​ຕ່າງຈາກ​ແຕ່​ເກົ່າ​ຫຼາຍ​ມີ​ທັງ​ຄວາມ​ພິ­ເສດ, ໜັກແໜ້ນ, ມີ​ລະ­ບົບ ແລະ​ມີ​ຄວາມ​ຫວັງ​ສູງ ຖ້າ​ຫາກ​ທຽບ­ໃສ່​ຄະ­ແນນ​ໃນ​ເມື່ອ​ກ່ອນຖື​ວ່າ​ດີ​ຂຶ້ນ​ຫຼາຍ​ໄດ້​ເຖິງ 5 ອັນ​ເດີ​ພາ ເປັນ​ຄະ­ແນນ​ທີ່​ດີ​ທີ່​ສຸດ​ແຕ່ 4 ຄົນ​ທີ່​ເຫຼືອແມ່ນ​ຄະ­ແນນ​ຍັງ​ຫ່າງ​ກັນ​ຫາຍ​ພໍ​ສົມຄວນ. ຢ່າງ­ໃດ​ກໍ່​ຕາມ, ເຊື່ອ​ໝັ້ນ​ວ່າ ​ຫຼັງຈາກ​ທີ່​ໄປ​ຊ້ອມ​ຢູ່ປະ­ເທດ​ອົດ​ສະ​ຕາ​ລີຕາມ​ແຜນ­ການ​ຈະ​ເຮັດ​ໃຫ້​ນັກ­ກີ­ລາ​ສາ­ມາດສ້າງ​ສະ­ຖິ­ຕິ​ຄະ­ແນນ​ດີ​ຂຶ້ນ​ກວ່າ​ເກົ່າ ແລະ ໃນກົວ​ລາ​ລຳ​ເປີເກມ ​ປີ​ນີ້ ເຊື່ອ​ໝັ້ນ​ວ່າ​ນັກ​ກິ­ລາ​ລາວ​ເຮົາ​ຈະ​ສາ­ມາດ​ແຈ້ງ​ເກີດ​ສ້າງ​ປະ­ຫວັດ­ສາດ​ໃຫ້​ວົງ​ການ​ກີ​ລາກ​໊ອ​ຟລາວ.

ສຳ­ລັບ​ຜົນ­ງານ​ໃນ​ການ​ຄັດ​ເລືອກນັກ­ກີ­ລາທີ່​ສະ​ໜາມ​ກ໊ອຟ ເລັກ​ວິວ​ວຽງ​ຈັນ ລະ­ຫວ່າງ​ວັນ​ທີ 1-4 ມິ­ຖຸ­ນາທີ່​ຜ່ານ​ມາ ປະ­ກົດ​ວ່າ: ອັນ​ດັບ 1 ເປັນ​ຂອງ ທ້າວ ທຳ​ມະ​ສັກ ບົວ​ຫອມ ໄດ້​ຄະ­ແນນ -5 (5 ອັນ​ເດີ​ພາ) ລວມ 283, ອັນ​ດັບ 2 ທ້າວ ເພັດ​ນ້ອຍ ສີ​ບຸ​ຜາ ມີ​ຄະ­ແນນ +13 ລວມ 301, ອັນ​ດັບ 3 ສີ​ປະ­ເສີດ ພັນ​ແພງ​ດີ ມີ​ຄະ­ແນນ +15 ລວມ 303 ແລະ​ອັນ​ດັບ 4 ທ້າວ ຈັນ​ປະ­ສິດ ອຸ​ນາ​ພົມ ມີ​ຄະ­ແນນ +22 ລວມ 310, ສ່ວນ​ນັກ​ກ໊ອຟ​ອີກ​ຄົນແມ່ນ​ທາງ​ສະ­ຫະ​ພັນ​ກ໊ອຟໄດ້​ຮັບ­ຮອງ​ເອົາ ທ້າວ ທຳ​ມະ​ລັກ ບົວ​ຫອມ ທີ່​ຕອນ​ນີ້​ຢູ່ສະ­ຫະ­ລັດ​ອາ​ເມ​ຣິ​ກາເປັນ​ຕົວ​ສຳ­ຮອງ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.