ແອັດສະປາຍ ສືບຕໍ່ທີມນຳກຸ່ມ ຫຼັງຊະນະອິດສະຣາແອນ 4-1 ບານໂລກຮອບຄັດເລືອກ

ບານໂລກຮອບຄັດເລືອກ ໂຊນເອີຣົບ ກຸ່ມ ຈີ ແອັດສະປາຍ ເປີດສະໜາມ ເອລ ໂມລິນອນ ຕ້ອນຮັບການມາຢາມຂອງ ອິດສະຣາແອນ ເຊິ່ງເຈົ້າບ້ານສົ່ງຊຸດໃຫຍ່ລົງສະໜາມ ເພື່ອເກັບໄຊຊະນະຮັກສາທີມນຳຂອງກຸ່ມຕໍ່ໄປ.

ເລິ່ມການແ່ຂ່ງຂັນມາໄດ້ 5 ນາທີ ເຈົ້າບ້ານເກືອບໄດ້ປະຕູຂຶ້ນນຳໄວ ຕິອາໂກ ອາຄັນຕາຣາ ໄດ້ໂອກາດຍິງໄກໜ້າກອບເຂດໂທດດ້ວຍຄວາມແຮງໄປຕຳຄານ ມາເຂົ້າທາງ ບິໂຕໂລ ໂຂກຊ້ຳຈໍ່ໆແຕ່ບັງຄັບທິດທາງບານບໍ່ໄດ້ ຂ້າມຄານອອກຫຼັງໄປ.

ນາທີ 13 ແອັດສະປາຍ ກໍ່ໄດ້ປະຕູຂຶ້ນນຳ 1-0 ຈໍດີ ອາລບາ ຈ່າຍບານທະລຸຊອງຈາກກອບເຂດໂທດຝັ່ງຊ້າຍໃຫ້ ດາບິດ ຊິລວາ ຈັບໜຶ່ງຈັງຫວະແລ້ວຍິງລອດຫວ່າງຂາຂອງ ໂອຟີ ມາເຊຍໂນ ຜູ້ຮັກສາປະຕູຂອງ ອິດສະຣາແອນ ເຂົ້າປະຕູ.

ນາທີ 44 ທີມຢາມເກືອບໄດ້ປະຕູຕີສະເໝີ ຊາຮາວີ ເປີດບ້ານດ້ວຍຂວາຈາກ ກອບເຂດໂທດຝັ່ງຊ້າຍເຂົ້າໄປໜ້າປະຕູໃຫ້ ລິອໍ ຣາຟາເອລອຟ ໂດດໂຂກໂລ່ງໆໄປເສົາສອງ ແຕ່ ດາບິດ ເດ ເຄອາ ໂດດປັດອອກໄປແບບຫວຸດຫວິດ.

ແຕ່ຊ່ວງທົດເວລາບາດເຈັບ ແອັດສະປາຍ ມາໄດ້ປະຕູໜີຫ່າງເປັນ 2-0 ຕິອາໂກ ອາຄັນຕາຣາ ຈ່າຍບານທະລຸຊ່ອງເຂົ້າໄປໃນເຂດໂທດຝັ່ງຂວາໃຫ້ ວິໂຕໂລ ຫຼຸດດ່ຽວເຂົ້າໄປຍິງຫັກມູມໄປເສົາສອງ ມາເຊຍໂນ ກົ້ມປັດຖືກປາຍມືກ່ອນບານຈະຄ່ອຍໆໄຫຼເຂົ້າປະຕູ ພ້ອມກັບໝົດເຄິ່ງເວລາທຳອິດ ແອັດສະປາຍ ນຳ 2-0.

ເຂົ້າສູ່ເຄິ່ງຫຼັງ ນາທີ 51 ເຈົ້າບ້ານໄດ້ປະຕູໜີຫ່າງອອກໄປເປັນ 3-0 ຕິອາໂກ ອາຄັນຕາຣາ ເປີດມູມຈາກຝັ່ງຊ້າຍໄປເສົາສອງໃຫ້ ດິເອໂກ ຄອສຕາ ໂດດໂຂກລົງພື້ນບານຜ່ານ ມາເຊຍໂນ ເຂົ້າປະຕູ.

ຊ່ວງທ້າຍການແ່ຂ່ງຂັນ ນາທີ 72 ອິດສະຣາແອນ ທຸບໄຂ່ແຕກໄດ້ ຈັງຫວະລູກໄໝໜ້າເຂດໂທດຝັ່ງຊ້າຍ ບີບຣາສ ນັດໂຊ ເປີດດ້ວຍຂວາເຂົ້າມາໜ້າປະຕູໃຫ້ ຣາມີ ເກີຊອນ ໂດດໂຂກດ້ວຍຄວາມແຮງບານໄປຕຳເສົາມາຟົ້ງອອກມາເຂົ້າທາງ ລິອໍ ຣາຟາເອລອຟ ຍິງຊ້ຳເຂົ້າປະຕູໄລ່ມາເປັນ 3-1.

ແຕ່ໃນນາທີ 88 ອິສໂກ ຕົວສຳຮອງທີ່ສົ່ງລົງມາແທນ ອິນເນສຕາ ຍິງໃຫ້ ແອັດສະປາຍ ໜີຫ່າງອອກໄປເປັນ 4-1 ຈັງຫວະ ໄອໂກ ອັສປາ ຈ່າຍບານເຂົ້າມາໃນເຂດໂທດຝັ່ງຊ້າຍໃຫ້ ອິສໂກ ຈັບບານແລ້ວຫັກຕັດເຂົ້າມາໜ້າປະຕູຫຼອກຍິງໄປເສົາທຳອິດບານຜ່ານ ມາເຊຍໂນ ທີ່ເສຍຈັງຫວະຂາຕາຍໄດ້ແຕ່ກົ້ມເບິ່ງ.

ຈົບການແຂ່ງຂັນ ແອັດສະປາຍ ເປີດບ້ານທຸບ ອິດສະຣາແອນ 4-1 ຍັງຮັກສາອັນດັບ 1 ຂອງກຸ່ມ ຈີ ມີ 13 ຄະແນນເທົ່າ ອິຕາລີ ແຕ່ປະຕູໄດ້ເສຍດີກວ່າ.

ສ່ວນຜົນການແຂ່ງຂັນຄູ່ອື່ນໆ

ກຸ່ມ ດີ

ຈໍເຈຍ ແພ້ ເຊີເບຍ 1-3

ອອດສະເຕຣຍ ຊະນະ ມອລໂດວາ 2-0

ໄອແລນ ສະເໝີ ເວລ 0-0

ກຸ່ມ ຈີ

ອິຕາລີ ຊະນະ ອາລບານີ 2-0

ເລັກເຕນສະແຕນ ເສຍ ມາເຊໂດເນຍ 0-3

ກຸ່ມ ໄອ

ຕັວກກີ ຊະນະ ຟິນແລນ 2-0

ໂຄຼອາຊີ ຊະນະ ຢູເຄຣນ 1-0

ໂຄໂຊໂວ ເສຍ ອີລັງເດີ 1-2

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.