ໂຮງງານ​ໃນ​ກຳປູ​ເຈຍ​ເຕີບ​ໂຕ​ຕໍ່​ເນື່ອງ

ອຸດສາຫະກຳ​ຢູ່ກຳ​ປູ​ເຈຍ​ມີ​ການ​ເຕີບ​ໂຕ​ຢ່າງ​ເຂັ້ມ​ແຂງ​ໃນ​ໄລຍະ​ 5 ປີ​ທີ່​ຜ່ານ​ມາ ​ດ້ວຍ​ຈຳນວນ​ໂຮງງານ​ເພີ່ມ​ຂຶ້ນ​ເກື​ອບ 2 ​ເທົ່າ ​ແລະ ສາມາດ​ຜະລິດ​ສິນຄ້າ​ຮອງ​ຮັບ​ໄດ້ທັງ​ການ​ສົ່ງ​ອອກ ​ແລະ ຄວາມ​ຕ້ອງກາ​ນພາຍ​ໃນ​ປະ​ເທດ.

ສຳນັກຂ່າວ​ຕ່າງປະ​ເທດ​ລາຍ​ງານ​ວ່າ: ຕາມ​ການ​ລາຍ​ງານ​ປະຈຳ​ປີ 2016 ຂອງ​ກະຊວງ​ອຸດ​ສາ​ຫະກຳ ​ແລະ ຫັດ​ທະ​ກຳ​ທີ່​ຍັງ​ບໍ່​​ໄດ້​ເຜີຍ​ແພ່​ຢ່າງ​ເປັນ​ທັງ​ການ​ຊີ້​ໃຫ້​ເຫັນ​ວ່າ ຈຳນວນ​ໂຮງງານ​ທົ່ວ​ປະ​ເທດ​ເພີ່ມ​ຂຶ້ນ​ເຖິງ 74% ​ໃນ​ໄລຍະ 5 ປີ​ທີ່​ຜ່ານ​ມາ ​ໂດຍ​ກຳປູ​ເຈຍ​ມີ​ໂຮງງານ​ທັງ​ໝົດ 1.578 ​ແຫ່ງ​ໃນ​ປີ 2016 ​ເມື່ອ​ທຽບ​ກັບ 907 ​ແຫ່ງ​ໃນ​ປີ 2012, ຂະນະ​ທີ່​ ອຸດສາຫະກຳ​ແຜ່ນ​ແພ​ມູນ​ຄ່າ 6 ຕື້​ໂດ​ລາ​ສະຫະລັດ ຍັງ​ມີ​ບົດບາດ​ໂດດ​​ເດັ່ນ​ຕໍ່​ເນື່ອງ​ຄິດ​ເປັນ 10%ຂອງ​ຈີ​ດີ​ພີ​ຂອງ​ປະ​ເທດ ​ແລະ ສ້າງ​ວຽກ​​ເຮັດ​ໄດ້ 6 ​ແສນ​ຄົນ ມີ​ການ​ຂະຫຍາຍຕົວ​ຢ່າງ​ເຂັ້ມ​ແຂງ​ມາ​ໂດຍ​ຕະຫຼອດ, ຊຶ່ງ​ຈຳນວນ​ໂຮງງານ​ຜະລິດ​ເສື້ອ​ຜ້າ​ມີ​ອັດຕາ​ການ​ເຕີບ​ໂຕ​ເຖິງ 60% ຈົນ​ມີ​ຈຳນວນ​ໂຮງງານ​ຫຼາຍ​ເຖິງ 1 ພັນ​ແຫ່ງ​ໃນ​ໄລຍະ 5 ປີ​ທີ່​ຜ່າ​ນມາ​ຈົນ​ເຖິງ​ທ້າຍ​ປີ 2016 ຂະນະ​ດຽວ​ກັນ ​ໂຮງງານ​ທີ່​ຜະລິດ​ອາຫານ, ​ເຄື່ອງ​ດື່ມ, ຢາສູບ​ເພີ່ມ​ຂຶ້ນ 82% ​ເປັນ 132 ​ແຫ່ງ ​ແລະ ​ໂຮງງານ​ແປ​ຮູບ​ໂລຫະ​ເພີ່ມ​ຂຶ້ນ 141% ​ເປັນ 111 ​ແຫ່ງ.

ທັງ​ນີ້ ​ໂຮງ​ງານ​ເຟີ​ນີ​ເຈີ, ຢາງ, ​ເຈ້ຍ ​ແລະ ອິ​ເລັກ​​ໂຕ​ນິກກໍ​ເຕີບ​ໂຕ​ຕໍ່​ເນື່ອງ​ເຊັ່ນ​ກັນ ​ໂດຍ​ສິນຄ້າ​ສົ່ງ​ອອກ​ຄື​ເສື້ອ​ຜ້າ​ທີ່​ຂະຫຍາຍຕົວ​ເຖິງ 77% ​ໃນ​ໄລຍະ 5 ປີ​ຊຸກຍູ້​ໃຫ້​ເກີ​ດລາຍ​ໄດ້​ສູງ​ເຖິງ 9,5 ຕື້​ໂດ​ລາ ຂະນະ​ທີ່​ລາຍ​ໄດ້​ຈາກ​ການ​ຜະລິ​ດເພື່ອ​ຮອງ​ຮັບ​ຄວາມ​ຕ້ອງການ​ພາຍ​ໃນ​ປະ​ເທດ​ເຕີບ​ໂຕ​ຂຶ້ນ​ເກືອບ 3 ​ເທົ່າສ້າງ​ລາຍ​ໄດ້​ສູງ​ເຖິງ 2,1 ຕື້​ໂດ​ລາ.

ຈາກ​ຍຸດ​ທະ​ສາດ​ການ​ພັດທະນາ​ອຸດສາຫະກຳ 10 ປີ​ຂອງ​ກະຊວງ​ຈາກ​ປີ 2015-2025 ຕັ້ງ​ເປົ້າ​ໄວ້​ວ່າ ອຸດສາຫະ ກຳ​ຈະ​ຂະຫຍາຍຕົວ​ເພີ່ມ​ຂຶ້ນ​ອີກ 30-40% ​ໃນ​ອີກ 5 ປີ​ຕໍ່ໜ້າ, ຢ່າງ​ໃດ​ກໍ​ຕາມ ການ​ເຕີບ​ໂຕ​ໃນ​ອະ​ນະ​ຄົດ​ຂຶ້ນ​ຢູ່​ກັບ​ຍຸດ​ທະ​ສາດ​ຂອງ​ພາກ​ລັດ​ທີ່​ດຶງ​ດູດ​ນັກ​ລົງ​ທຶນ ​ແລະ ປັບ​ຫຼຸດ​ຂັ້ນ​ຕອນ​ທີ່​ຫຍຸ້ງຍາກ​ລົງ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.