ໂຮ​ນລັງ​ປະ​ເທດ​ນ້ອຍ​​ແຕ່ກ້າວ​ສູ່​ກະສິກຳ​ອັນ​ດັບ 2 ຂອງ​ໂລກ

ໂຮ​ນລັງ​ປະ​ເທດ​ທີ່​ແສນ​ສະຫງົບ​​ໃນ​ເອີຣົບ ​ເຖິງ​ແມ່ນ​ວ່າ​ຈະ​ມີ​ຂະໜາດ​ນ້ອຍດ້ວຍ​ປະຊາກອນ​ພຽງ 17 ລ້ານ​ຄົນ ​ແຕ່​ສັກກະ​ຍະ​ພາບ​ພັດ​ບໍ່​ໄດ້​ນ້ອຍ ​ເພາະ​ເປັນ​ປະ​ເທດ​ອັນ​ດັບ 2 ຂອງ​ໂລກ​ໃນ​ການ​ສົ່ງ​ອອກ​ຜົນ​ຜະລິດ​ດ້ານ​ກະສິກຳ ​ເປັນ​ຮອງ​ພຽງ​ອາ​ເມ​ລິ​ກາ​ເທົ່າ​ນັ້ນ ນອກ​ຈາກ​ນີ້ ຍັງ​ສາມາດ​ຜະລິດ​​ກະສິກຳ​ໄດ້​ເປັນອັນ​ດັບ 1 ຂອງ​ໂລກ.

ກະສິກຳ ​ແລະ ການ​ສົ່ງ​ອອກ​ດ້ານ​ອາຫານ​ຂອງ​ໂຮ​ນລັງ​ຄິດ​ເປັນ​ມູນ​ຄ່າ​ເຖິງ 91 ຕື້​​ເອີ​ໂຣ​ເທົ່າ​ກັບ 22% ຂອງ​ການ​ສົ່ງ​ອອກ​ທັງ​ໝົດ ​ແລະ ຄິດ​ເປັນ 8,8% ຂອງ​ການ​ຈ້າງ​ວຽກ​ເຮັດ​ທົ່ວ​ປະ​ເທດ ​ເບື້ອງ​ຫຼັງ​ຄວາມ​ສຳ​ເລັດ​ມາ​ຈາກ​ການ​ປະຍຸກ​ໃຊ້​ເຕັກ​ໂນ​ໂລ​ຊີ​ເຂົ້າ​ກັບ​ການ​ກະ​ເສດ.

ສາດສະດາຈານ​ອັລ ​ໄດ​ເຮົາ​ເຊ​ນ ປະທານ​ບໍລິສັດ Dutch Topsec-tor Agri & Food ກ່າວ​ ອະ​ນະ​ຄົດ​ອີກ 40 ປີ​ຕໍ່ໜ້າວ່າ ປະຊາກອນ​ໂລກ​ຈະ​ເພີ່ມ​ຂຶ້ນ​ເປັນ​ຈຳນວນ​ເຖິງ 2-3 ຕື້​ຄົນ, ຄົນ​ຊົນ​ຊັ້ນກາງ​ເພີ່ມ​ຂຶ້ນ ສົ່ງ​ຜົນ​ເຮັດ​​ໃຫ້​ຄວາມ​ຕ້ອງການ​ບໍລິ​ໂພ​ກອາຫານ​ເພີ່ມ​ຂຶ້ນ ​ໂດຍ​ສະ​ເພາະ​ໂປ​ຕິນຄຸນ​ນະພາ​ບສູງ.

ເຖິງ​​ວ່າ​ຈະ​ເປັນຄວາມ​ທ້າ​ທາຍ​ຂອງ​ໂລກ​ຄັ້ງ​ຍິ່ງ​ໃຫຍ່ ​ແຕ່​ຖື​ເປັນ​ໂອກາດ​ສຳຄັນ​ໃນ​ດ້ານ​ເສດຖະກິດ, ກະສິກຳ ​ແລະ ການ​ພັດທະນາ​ດ້ານ​ການ​ສຶກສາ​ສຳລັບ​ຄົນ​ຮຸ່ນ​ໃໝ່​ເຊັ່ນ​ກັນ. ຄວາມ​ທ້າ​ທາຍ​ນີ້​ຄື ການ​ເພີ່ມ​ຜົນ​ຜະລິດ​ກະສິກຳ ​ແລະ ຜົນ​ຜະລິດ​ຈາກ​ສັດ, ການ​ພັດທະນາ​ຄຸນ​ນະພາ​ບອາຫານ ​ແລະ ຄວາມ​ປອດ​ໄພ​ດ້ານ​ອາຫານ. ການ​ຫຼຸດ​ຜົນ​ກະທົບ​ຈາກ​ການ​ຜະລິດ​ຕໍ່​ທຳ​ມະ​ຊາດ, ສິ່ງ​ແວດ​ລ້ອມ ​ແລະ ສະພາບ​ອາກາດ ​ແລະ ການ​ນຳ​ຜົນ​ຜະລິດ​ທີ່​ເຫຼືອ​ມາ​ຜະລິດ​ຄືນ​​ໃໝ່.

ອະນາຄົດ​ຄື​ໂລກ​ແຫ່ງ​ເຕັກ​ໂນ​ໂລ​ຊີ ​ແລະ ນະ​ວັດ​ກຳ ຊຶ່ງ​ປະ​ຈຸ​ບັນ​​ໂຮ​ນລັງ​ມີ​ການ​ປັບ​ໃຊ້​ກັບ​ຂະ​ແໜງ​ກະສິກຳ​ຢ່າງ​ກວ້າງຂວາງ, ສະມາດ​​ໂຟນ​ເຕັກ​ໂນ​ໂລ​ຊີ ທັງ​ລະບົບ​ເຊນ​ເຊີ, ​ໂດ​ຣນ ​ແລະ ຫຸ່ນ​ຍົນ ສາມາດ​ຊ່ວຍ​ເພີ່ມ​ສະມັດ​ຕະພາບ​ດ້ານ​ຜນຜະລິດ​ໄດ້​ເຊັ່ນ: ລະບົບ​ເຊັນ​ເຊີ​ຊ່ວຍ​ໃຫ້​ອາຫານ​ສັດ​ຫຼື​ໃສ່​ປຸ໋ຍ​ໄດ້​ຢ່າງ​ແນ່ນອນ ລວມທັງ​ຊ່ວຍ​ເຫຼືອ​ໃນ​ລະບົບ​ຈັດການ​ນ້ຳ ​ໂດຣນ​ໃຊ້​ໃນ​ການ​ສຳ​ຫຼວດຜົນ​ຜະລິດ​ຫຼື​ຫຸ່ນ​ຍົນ​ຊ່ວຍ​ແຮງ​ ​ແລະ ຊ່ວຍ​ດ້ານ​ການ​ຂົນ​ສົ່ງ​ ​ແລະ ຈັດ​ເກັບ​ໄດ້.

ທ່ານ ​ໄດ​ເຮົາ​ເຊ​ນ ຊີ້​ໃຫ້​ເຫັນ​ເຖິງ​ຄວາມ​ຈຳ​ເປັນ​ໃນ​ການ​ຮັບ​ມື​ກັບ​ອຸດສາຫະກຳ​ກະ​ສິກຳ ​ແລະ ອາຫານ​ຂອງ​ໂລກ​ອະ​ນະ​ຄົດ​ວ່າ ຄວາມ​ຮ່ວມ​ມື​ລະຫວ່າງ​ປະ​ເທດ​ຄື​ຫົວ​ໃຈ​ສຳຄັນ ​ເພາະ​ເປັນ​ການ​ແລກປ່ຽນ​ສິ່ງ​ທີ່​ຕ່າງ​ຄົນ​ຕ່າງ​ມີ​ໃຫ້​ແກ່​ກັນ ​ແລະ ກັນ​ໂດຍ​ສະ​ເພາະ​ເຕັກ​ໂນ​ໂລ​ຊີ ​ແລະ ນະ​ວັດຕະ​ກຳ​ໃໝ່​ໆ ທີ່​ປະຈຸ​ບັນສາມາດ​ຄິດ​ຄົ້ນ ​ແລະ ພັດທະນາ​ໄດ້​ຈາກ​ຄົນ​ທົ່ວ​ໂລກ.

ຢ່າງ​ໃດ​ກໍ​ຕາມ ທ່ານ ​ໄດ​ເຮົາ​ເຊ​ນມອງ​ວ່າ ​ໂລກ​ຍັງ​ຕ້ອງການ​ເຕັກ​ໂນ​ໂລ​ຊີ​ດ້ານ​ອາຫານ​ຫຼາຍ​ກວ່າ​ນີ້ ​ເພື່ອ​ຮອງ​ຮັບ​ອະ​ນະ​ຄົດ ຈຶ່ງ​ແນະນຳ​ວ່າ ການ​ຮ່ວມ​ມື​ລະຫວ່າງ​ກຸ່ມ​ທຸລະ​ກິດ, ລັດຖະບານ ​ແລະ ​ເຕັກ​ໂນ​ໂລ​ຊີ, ວິທະຍາສາດ ນັ້ບຕັ້ງ​ແຕ່​ນີ້​ຄື​ຫົວ​ໃຈ​ສຳຄັນ​ຂອງ​ຄວາມ​ສຳ​ເລັດ​ທັງ​ມວນ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.