ໄອພີເອັສຊີ ລາວ ສົ່ງ 11 ນັກແມ້ນປືນ ໃນການແຂ່ງຂັນຍິງປືນນາໆຊາດທີ່ປະເທດໄທ

ສະ​ໂມ​ສອນ​ກິລາ​ຍິງ​ປືນ ​ໄອ​ພີ​ເອັສຊີ​ລາວ ສະຫະພັນ​ຍິງ​ປືນ​ແຫ່ງ​ຊາດ​ລາວ ສົ່ງ 11 ​ນັກ​ກິລາ​ຍິງ​ປືນ ​ໄອ​ພີ​ເອັສຊີລາວ ​ເຂົ້າ​ຮ່ວມ​ລ່າ​ຜົນງານ​ໃນການ​ແຂ່ງຂັນ​ກິລາ​ຍິງ​ປືນ​ ໄອ​ພີ​ເອັສຊີ ນາໆ​ຊາດ ​ເລ​ໂວ 3 ຄັ້ງ​ທີ 3 ທີ່​ແຂວງ​ພູ​ເກັດ ປະ​ເທດ​ໄທ ຮັບ​ກຽດ​ເປັນ​ເຈົ້າພາບ ລະຫວ່າງ​ວັນ​ທີ 18-19 ມີ​ນາ​ນີ້ ຄາດ​ວ່າ​ລາຍການ​ດັ່ງກ່າວ  ມີ​ນັກ​ກິລາ​ຈາກ​ທົ່ວ​ໂລກ ​ເປັນ​ຕົ້ນ​ແມ່ນ 10 ປະ​ເທດ​ໃນ​ອາ​ຊຽນ, ບັນດາ​ປະ​ເທດ​ໃນ​ຂົງ​ເຂດ​ເອ​ເຊຍ ​ແລະ ​ຈາກທະວີບຢູ​ໂຣບ ​ເຂົ້າ​ຮ່ວມ.

ຕາມ​ການ​ເປີດ​ເຜີຍ​ຂອງ ທ່ານ ພຸດທະສັກ ສຸກ​ອາ​ລຸນ ປະທານ​ສະ​ໂມ​ສອນ​ຍິງ​ປືນ ​ໄອ​ພີ​ເອັສຊີ​ລາວ ທັງ​ເປັນ​ຄະນະ​ນຳພາ​ນັກ​ກິລາ ​ເຂົ້າ​ຮ່ວມ​ແຂ່ງຂັນ ​ແຈ້ງ​ໃຫ້​ຮູ້​ວ່າ: ​ລາຍການ​ແຂ່ງຂັນ​ຄັ້ງ​ນີ້ ລາວ​ເຮົາ​ໄດ້​ສົ່ງ​ເຂົ້າ​ຮ່ວມ​ແຂ່ງຂັນ​ທຸກໆ​ປີ ​ແລະ ສິ່ງ​ສຳຄັນ​ແມ່ນ​ ໄດ້​ໃຊ້​ງົບປະມານ​ສ່ວນ​ຕົວ​ສູງ ທັງຂອງ​ສະ​ໂມ​ສອນ ​ແລະ ນັກ​ກິລາ. ​ແນວ​ໃດ​ກໍ່ຕາມ, ປີ​ນີ້ ມີ​ຄວາມ​ແຕກ​ຕ່າງ​ ກວ່າ​ທຸກ​ປີຜ່ານ​ມາ ​ເປັນ​ຕົ້ນ ​ໄດ້​ມີ​ນັກ​ກິລາ​ມື​ໃໝ່​ ທີ່​ມີ​ພອນ​ສະຫວັນ ​ແລະ ພອນ​ສະ​ແຫວ​ງ​ເຂົ້າ​ຮ່ວມ​ເຝິກຊ້ອມ ​ແລະ ພັດທະນາ​ຢ່າງ​ມີ​ຄວາມ​ເຕີບ​ໃຫຍ່ ​ຂະຫຍາຍຕົວ​ກວ້າງຂວາງ ​ແລະ ພວກ​ເຮົາທຸກ​ຄົນກໍ່​ພ້ອມຢ່າງ​ເຕັມ 100 ​ເປີ​ເຊັນ​ແລ້ວ ທີ່​ຈະ​ເຂົ້າ​ຮ່ວມ​ແຂ່ງຂັນ ​ເພື່ອຫວັງ​ຢາກ​ສ້າງ​ຜົນງານ​ໃຫ້​ແກ່ ​ປະ​ເທດ​ຊາດ. ຢ່າງ​ໃດ​ກໍ່​ດີ, ກ່ອນ​ຈະ​ຮ່ວມ​ແຂ່ງຂັນ​ລາຍການ​ດັ່ງກ່າວ ກໍ່​ໄດ້​ມີ​ການ​​ເກັບ​ຕົວ​ເຝິກຊ້ອມ​ຢ່າງ​ຕໍ່​ເນື່ອງ ​ເພື່ອ​ຖອ​ດຖອນ​ບົດຮຽນ ​ແລະ ຊອກ​ຫາ​ປະສົບ​ການ ກັບຜູ້​ຊຽວຊານລະດັບ​ມື​ອາຊີບ​ ຈາກປະ​ເທດ​ໄທ ມາ​ຊ່ວຍ​ແນະນຳ​ວິທີ​ການ​ແກ້​ໄຂ​ ຈຸດ​ທີ່​ຍັງ​ຄົງ​ຄ້າງ ບວກ​ກັບ​ສະໜາມ ​ແລະ ອຸປະກອນ​ຂອງ​ສະໜາມກິລາ 5 ​ເມສາ ຂອງ​ລາວ​ເຮົາ​ທີ່​ໄດ້​ມາດຕະຖານ ​ລະດັບ​ສາກົນ ​ເຊື່ອ​ວ່າ​ງານ​ນີ້ ມ່ວນ​ແນ່ນອນ ​ເພາະ​ນັກ​ກິລາ​ຍິງ​ປືນ​ ໄອ​ພີ​ເອັສຊີ​ລາວ ​ຈະ​ສາມາດສູ້​ກັບ​ນັກ​ກິລາ​ຕ່າງ​ຊາດ​ໄດ້​ຢ່າງ​ສູ​ສີ.

ທ່ານ ພຸດທະສັກ ສຸກ​ອາ​ລຸນ ກ່າວ​ຕື່ມ​ອີກ​ວ່າ: ສຳລັບ​ການ​ເຂົ້າ​ຮ່ວມ​ແຂ່ງຂັນ​ລາຍການ​ນີ້ ຄະນະ​ນັກ​ກິລາ​ຍິງ​ປືນ​ ໄອ​ພີ​ເອັສຊີ​ລາວ ​ໄດ້​ເລີ່ມອອກ​ເດີນທາງ​ໃນ​ວັນ​ທີ 16 ມີນາ 2017 ​ທີ່ຜ່ານມານີ້ເອງ ໂດຍ​ຈະ​ແບ່ງ​ອອກ​ເປັນ 2 ຂະ​ບວນ ຄື: ຂະ​ບວນທີ່ 1 ຈະ​ອອກ​ເດີນທາງ ​ກັບ​ສາຍ​ການບິນ​ລາວ ​ແອ​ລາຍ ທີ່​ສະໜາມ​ບິນ​ວັດ​ໄຕ ​ໄປ​ເຖິງ​ສະໜາມ​ບິນ​ສຸວັນນະ​ພູມ ບາງກອກ ປະ​ເທດ​ໄທ ​ແລະ ຂະ​ບວນທີ 2 ຈະ​ອອກ​ເດີນທາງ​ທີ່ ​ສະໜາມ​ບິນ​ແຂວງ​ອຸດອນ​ທາ​ນີ ປະ​ເທດ​ໄທ ສ່ວນ​ນັກ​ກິລາ​ 11 ຄົນ ​ເຂົ້າ​ຮ່ວມ​ແຂ່ງຂັນ​ຄັ້ງ​ນີ້ ປະກອບ​ມີ ທ່ານ ພຸດ​ທະ​ສັກ ສຸກ​ອາ​ລຸນ, ທ່ານ ສຸນັນ ວັດທະນະ​ບູນ, ທ່ານ ສິງ​ຄຳ ສີ​ປະ​ເສີດ, ທ່ານ ​ໄກ​ສຸ​ພົນ ສຸລິ​ໂຍ, ທ່ານ ອານຸ​ໄຊ ​ແສງ​ດາລາ, ທ່ານ ພູທອນ ກໍ​ລະ​ສັກ, ທ່ານ    ​ເຊິ​ນຮາວ ນັກ​ກິລາ​ຊາວ​ຈີນ, ທ່ານ ຕຸ້ຍ ພານຸ​ວົງ, ທ່ານ ອາ​ໂນ​ໄທ ​ເມືອງ​ມະນີ, ທ່ານ ​ເພັດ​ນະຄອນ ພາ​ມີ​ສິດ ​ແລະ ທ່ານ ນາງ ມະນີ​ບົດ ວົງ​ໄຊ.

ໂດຍ ອ້ວນ​ດຳ   ນສພ ສຶກສາ-ກິລາ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.