14 ຄູ​ຝຶກ ສອບ­ເສັງ​ຜ່ານ​ລະ­ດັບ B ລາຍ​ເຊັນ ກຽມ­ພ້ອມ​ຮັບ​ໃຊ້​ວົງ​ການ​ບານ­ເຕະ​ຕໍ່​ໄປ

ສະ­ຫະ­ພັນ​ບານ­ເຕະ​ແຫ່ງ​ຊາດ​ລາວ ( ສຕລ ) ປະ­ກາດ​ຜົນ​ການ​ຈັດ​ຝຶກ​ອົບ­ຮົມ​ຄູ​ຝຶກ​ລະ­ດັບ B ລາຍ​ເຊັນ ( AFC ‘ B ‘ Coaching Certificate Course ) ທີ່​ໄດ້​ເປີດ​ສອນ ແລະ ສອບ­ເສັງ​ດ້ານ​ທິດ​ສະ​ດີ ແລະ ພາກ​ປະ­ຕິ­ບັດ​ຕົວ​ຈິງ​ມາ​ຕັ້ງ­ແຕ່​ວັນ​ທີ 30 ມັງ­ກອນ ຫາ 18 ກຸມ­ພາ 2017 ທີ່​ຜ່ານ​ມາ ປະ­ກົດ​ວ່າ​ມີ​ຄູ​ຝຶກ​ຈຳ­ນວນ 14 ທ່ານ ສາ­ມາດ​ສອບ­ເສັງ​ຜ່ານ ແລະ ພ້ອມ​ຮັບ​ໃຊ້​ວົງ​ການ​ບານ­ເຕະ​ລາວ.

ອີງ​ຕາມ​ການ​ປະ­ກາດ​ຂອງ ສຕລ ໃນ​ເຟ​ສ​ບຸ໊ກ​ທາງ​ການ​ເມື່ອ​ວັນ​ທີ 27 ມີ­ນາ ທີ່​ຜ່ານ​ມາ ວ່າ: ສະ­ຫະ­ພັນ​ບານ­ເຕະ​ແຫ່ງ​ຊາດ​ລາວ ຂໍ​ແຈ້ງ​ຜົນ​ການ​ຮຽນ​ຂອງ​ຄູ​ຝຶກ​ລະ­ດັບ B ລາຍ​ເຊັນ ຂອງ​ສະ­ຫະ­ພັນ​ບານ­ເຕະ​ອາ­ຊີ ທີ່​ເປີດ​ຫຼັກ­ສູດ​ດັ່ງ­ກ່າວ​ຂຶ້ນ​ໃນ​ລະ­ຫວ່າງ​ວັນ​ທີ 30 ມັງ­ກອນ ຫາ 18 ກຸມ­ພາ ທີ່​ຜ່ານ​ມາ ເຊິ່ງ​ມີ​ຈຳ­ນວນ 14 ທ່ານ ທີ່​ສອບ­ເສັງ​ຜ່ານ ປະ­ກອບ​ມີ​ດັ່ງ­ນີ້:

  1. ທ່ານ ກັນ­ລະ­ຍາ ສີ​ສົມ​ຫວັງ ຈາກ ສຕລ
  2. ທ່ານ ຈັນ­ທະ­ຄາດ ສ່ຽນ​ຜ່ອງ​ໃສ ຈາກ ສຕລ
  3. ທ່ານ ນາງ ພອນ​ທິບ ແສງ​ມະ­ນີ ຈາກ ສຕລ
  4. ທ່ານ ນາງ ດອນ​ສະ­ຫວັນ ໄຊ​ຍະ​ສົມ­ບັດ ຈາກ​ແຂວງ​ຈຳ­ປາ​ສັກ
  5. ທ່ານ ຄຳ​ຫຼ້າ ປິ່ນ​ແກ້ວ ຈາກ ໄອ​ດີ​ຊີ ຈຳ­ປາ​ສັກ ຢູ​ໄນ​ເຕັດ
  6. ທ່ານ ພູ​ເພັດ ສາ­ນຸ​ວົງ ຈາກ​ແຂວງ​ຄຳ​ມ່ວນ
  7. ທ່ານ ວາດ​ສະ­ໜາ ສີ​ສຸ​ລາດ ຈາກ ປກສ ເອ​ັຟ​ຊີ
  8. ທ່ານ ຈັນ­ທະ​ລ້ອມ ພຸດ​ສະ​ດາ​ວົງ ຈາກ ກອງ­ທັບ
  9. ທ່ານ ວຽງ​ສະ­ຫວັນ ໄຊ​ຍະ​ບູນ ຈາກ ກອງ­ທັບ
  10. ທ່ານ ວິ­ລັດ ພູມ​ສະ​ຫວັດ ຈາກ ກອງ­ທັບ
  11. ທ່ານ ໂກ​ວັນ ນາມ​ທະ­ວີ​ໄຊ ຈາກ ກອງ­ທັບ
  12. ທ່ານ ທີ​ຣາ​ພົນ ທອງ​ດີ ( THEERAPHON TONGDEE ) ຈາກ ໄທ
  13. ທ່ານ ເສ­ນີ ແສງ​ສຸ­ວັນ
  14. ທ່ານ ຈີ່​ຟົງ ຊົງ.

ຂະ­ນະ​ທີ່ ທ່ານ ພູ​ເພັດ ສາ­ນຸ​ວົງ ຕົວ​ແທນ​ຈາກ​ແຂວງ​ຄຳ​ມ່ວນ ໃຫ້​ສຳ­ພາດ​ຕໍ່​ກັບ​ຜົນ­ສຳ­ເລັດ​ການ​ເປັນ​ຄູ​ຝຶກ​ລະ­ດັບ B ລາຍ​ເຊັນ ຄັ້ງ​ນີ້​ວ່າ: ຮູ້­ສຶກ​ພາກ­ພູມ​ໃຈ​ຫຼາຍ ແລະ ຕ້ອງ​ຂໍ​ຂອບ­ໃຈ​ສະ­ຫະ­ພັນ​ບານ­ເຕະ​ແຫ່ງ​ຊາດ​ລາວ ທີ່​ໄດ້​ໃຫ້​ໂອ­ກາດ​ຂ້າ­ພະ­ເຈົ້າ​ໄດ້​ເຂົ້າ​ມາ​ຝຶກ​ອົບ­ຮົມ​ໃນ​ຄັ້ງ​ນີ້ ເຊິ່ງ​ຕະ­ຫຼອດ​ໄລ­ຍະ​ເວ­ລາ​ການ​ຝຶກ​ອົບ­ຮົມ​ແມ່ນ​ມີ​ຄວາມ​ໝາຍ​ຄວາມ​ສຳ­ຄັນ ແລະ ເຮັດ​ໃຫ້​ຂ້າ­ພະ­ເຈົ້າ​ໄດ້​ຖອດ​ຖອນ​ບົດ­ຮຽນ​ອັນ​ລ້ຳ​ຄ່າ​ຈາກ​ທາງ​ຄູ​ຝຶກ​ຊາວ​ອີ​ຣານ ທີ່​ມີ​ປະ­ສົບ​ການ ໂດຍ​ກ່ອນ​ໜ້າ​ນີ້​ແມ່ນ​ຜ່ານ​ຄູ​ຝຶກ​ລະ­ດັບ C ລາຍ​ເຊັນ​ທີ່​ເປັນ​ພື້ນ­ຖານ ແລະ ຄັ້ງ​ນີ້​ແມ່ນ​ລະ­ດັບ B ລາຍ​ເຊັນ​ທີ່​ມີ​ບົດ­ຮຽນ​ທີ່​ເລິກ­ເຊິ່ງ​ຫຼາຍ​ຂຶ້ນ ເປັນ­ຕົ້ນ​ແມ່ນ​ລະ­ບົບ​ການ​ຫຼິ້ນ ແລະ ການ​ວາງ​ແຜນ​ຕ່າງໆ​ແມ່ນ​ລະ­ອຽດ​ຂຶ້ນ ລວມ​ທັງ​ຈະ​ນຳ​ເອົາ​ບົດ­ຮຽນ​ນີ້​ໄປ​ຖ່າຍ​ທອດ​ໃຫ້​ກັບ​ລູກ​ຫຼານ​ໃນ​ອະ­ນາ­ຄົດ.

ສຳ­ລັບ ສຕລ ແມ່ນ​ໄດ້​ເນັ້ນ​ເລື່ອງ​ການ​ຍົກ​ລະ­ດັບ​ຄວາມ​ສາ­ມາດ​ຫຼາຍ​ດ້ານ​ໃຫ້​ກັບ​ບຸກ​ຄະ­ລາ​ກອນ​ລາວ ເພື່ອ​ເປັນ​ອີກ​ຊ່ອງ​ທາງ​ໃນ​ການ​ພັດ­ທະ­ນາ ແລະ ຍົກ​ລະ­ດັບ​ວົງ​ການ​ບານ­ເຕະ​ລາວ​ໃຫ້​ກວ້າງ­ຂວາງ ເຊິ່ງ​ໃນ​ຕົ້ນ​ປີ​ນີ້​ກໍ່​ໄດ້​ມີ​ການ​ຍົກ​ລະ­ດັບ​ຄູ​ຝຶກ C ແລະ B ລາຍ​ເຊັນ ແລະ ຄູ​ຝຶກ​ດ້ານ​ພາ­ລະ​ກຳ­ລັງ ລວມ​ເຖິງ​ຍົກ​ລະ­ດັບ​ກຳ­ມະ­ການ​ມາ​ແລ້ວ​ລະ­ຫວ່າງ​ເດືອນ​ມັງ­ກອນ – ມີ­ນາ ທີ່​ຜ່ານ​ມາ ເຊິ່ງ​ປັດ­ຈຸ­ບັນ​ກຳ­ລັງ​ເປີດ​ການ​ຝຶກ​ອົບ­ຮົມ​ຄູ​ຝຶກ​ບານ­ເຕະ​ລະ­ດັບ C ລາຍ​ເຊັນ ຊຸດ​ໃໝ່ລະຫວ່າງ​ວັນ​ທີ 20 ມີ­ນາຫາ 1 ເມ­ສານີ້ ນອກ­ຈາກ​ນັ້ນ ສຕລ ຍັງ​ມີ​ແຜນ​ຈັດ​ຝຶກ​ອົບ­ຮົມ​ລະ­ດັບ​ສູງ​ສຸດ​ຢ່າງ A ລາຍ​ເຊັນ ໃນ​ລະ­ຫວ່າງ​ວັນ​ທີ 9 ຕຸ­ລາ ຫາ 4 ພະ­ຈິກ 2017.

14 ຄູ​ຝຶກ ສອບ­ເສັງ​ຜ່ານ​ລະ­ດັບ B ລາຍ​ເຊັນ ກຽມ­ພ້ອມ​ຮັບ​ໃຊ້​ວົງ​ການ​ບານ­ເຕະ​ຕໍ່​ໄປ

ຂ່າວ: ເສດຖະກິດ-ການຄ້າ

 

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.