2 ສ່ຽວເດີນທາງຜິດ ຄິດຈະໜີ ຖືກຈັບພ້ອມຢາບ້າແສນເມັດ

ໃນວັນທີ 31 ພຶດສະພາ 2019, ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຄຳມ່ວນ ໄດ້ນໍາກໍາລັງເຂົ້າ ຈັບເປົ້າໝາຍຄ້າຂາຍຢາເສບຕິດ 2 ຄົນຢູ່ເຮືອນພັກແຫ່ງໜຶ່ງເຂດບ້ານຫຼັງຄັງ ເມືອງບົວລະພາ ໂດຍ ຢຶດຢາບ້າໄດ້ 100.000 ເມັດ.

ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ໃຫ້ຮູ້ວ່າ: ໃນວັນທີ 30 ພຶດສະພາ, ໄດ້ຮັບລາຍງານຈາກແຫຼ່ງຂ່າວວ່າມີກຸ່ມຄົນຈໍານວນໜຶ່ງເຄື່ອນໄຫວຄ້າຂາຍຢາເສບຕິດຢູ່ຂອບເຂດບ້ານຫຼັງຄັງ ເມືອງບົວລະພາ ແຂວງຄຳມ່ວນ ໂດຍເອົາເຮືອນພັກແຫ່ງໜຶ່ງເປັນບ່ອນນັດຊື້-ຂາຍ. ຈາກນັ້ນ, ເຈົ້າໜ້າທີ່ຈຶ່ງຈັດກໍາລັງຕໍາຫຼວດວິຊາສະ ເພາະຕິດຕາມການເຄື່ອນໄຫວຂອງເປົ້າໝາຍ. ຜ່ານການເຝົ້າຕິດຕາມ, ມາຮອດເວລາ 11:30 ໂມງຂອງວັນທີ 31 ພຶດສະພາ ໄດ້ພົບເຫັນລົດກະບະວີໂກ້ ໝາຍເລກທະບຽນ ກພ 6729 ກຳແພງນະຄອນ ແລະ ວີໂກ້ແຊັມ ສີຂາວ ໝາຍເລກທະບຽນ ກລ 8281 ກຳແພງນະຄອນ ແລ່ນເຂົ້າໄປຈອດຢູ່ເຮືອນພັກແຫຼ່ງໜຶ່ງເຂດບ້ານຫຼັງຄັງ ເມືອງບົວລະພາ. ຈາກນັ້ນ, ເຈົ້າໜ້າທີ່ໄດ້ເຂົ້າປິດລ້ອມເພື່ອຈັບກຸມ ແຕ່ສາມາດຈັບໄດ້ພຽງ 1 ຄົນ ຊື່: ທ້າວ ໄທວ່າງ ອາຍຸ 39 ປີ ຢູ່ບ້ານໂພນເມືອງນ້ອຍ ເມືອງຄຳເກີດ ແຂວງບໍລິຄຳໄຊ ພ້ອມຂອງກາງຢາບ້າຈຳ ນວນ 50 ມັດ ເທົ່າກັບ 100.000 ເມັດ, ສ່ວນຜູ້ທີ່ຂັບລົດກະບະວີໂກ້ແຊັມ ສີຂາວ ໝາຍເລກທະບຽນ ກລ 8281 ກຳແພງນະຄອນ ໄດ້ເອົາຕົວຫຼົບໜີ.

ຜ່ານການສອບສວນທ້າວ ໄທວ່າງ ຈຶ່ງຮູ້ວ່າ: ຜູ້ຫຼົບໜີນັ້ນແມ່ນ ທ້າວ ຍີ່ວ່າງ 28 ປີ ຢູ່ບ້ານອຸດົມໄຊ ເມືອງວຽງທອງ ແຂວງບໍລິຄຳໄຊ; ດັ່ງນັ້ນ, ເຈົ້າໜ້າທີ່ໄດ້ຈັດກໍາລັງອີກ 1 ຊຸດ ເພື່ອນໍາຈັບຜູ້ທີ່ຫຼົບໜີ. ພໍໄລ່ຕິດຕາມໄປຮອດເຂດບ້ານນາແບ່ງ ເມືອງຍົມມະລາດ ກໍພົບເຫັນລົດເປົ້າໝາຍຈອດໄວ້ແຄມທາງ; ສ່ວນຜູ້ຂັບຂີ່ແມ່ນໄດ້ຫຼົບໜີໄປເຂົ້າປ່າ. ຈາກນັ້ນ, ທາງເຈົ້າໜ້າທີ່ໄດ້ລະດົມກໍາລັງຄົ້ນຫາຢູ່ປ່າເຂດດັ່ງກ່າວ ຈົນຮອດເວລາ 20:00 ໂມງຂອງວັນດຽວກັນ ຈຶ່ງສາມາດຈັບຕົວຜູ້ກ່ຽວໄດ້ໃນຂະນະທີ່ຍ່າງອອກມາຈາກປ່າ. 

ຜ່ານການສອບສວນພວກກ່ຽວ ສາລະພາບວ່າ ໄດ້ຮ່ວມກັນເອົາຢາບ້າ ຈໍານວນ 100.000 ເມັດ ໄປສົ່ງໃຫ້ຜູ້ສັ່ງຊື້, ເຊິ່ງເປັນຄົນປະເທດເພື່ອນບ້ານ ໂດຍນັດສົ່ງໃຫ້ກັນຢູ່ເຮືອນພັກເຂດບ້ານຫຼັງຄັງ ເມືອງບົວລະພາ; ພໍໄປຮອດເຮືອນພັກ ກໍມີເຈົ້າໜ້າທີ່ເຂົ້າຈັບຕົວ ພ້ອມຢາບ້າຈໍານວນດັ່ງກ່າວ.

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.