2017 ມີອັກຄີໄຟເກີດຢູ່ຫຼວງພະບາງ 11 ຄັ້ງ

ຕາມການລາຍງານຂອງ ທ່ານ ພັນໂທ ພີລະນີນໂສ ສີພັນທອງ ຫົວໜ້າພະແນກຕໍາຫຼວດ ສະກັດກັ້ນ ແລະຕ້ານອັກຄີໄພ ກອງບັນຊາການ ປກສ ແຂວງຫຼວງພະບາງໃຫ້ຮູ້ວ່າ: ໃນປີ 2016 ຜ່ານມາຢູ່ແຂວງຫຼວງພະບາງ ໂດຍສະເພາະ ແມ່ນຕົວເມືອງຫຼວງພະບາງມີສະພາບ ອັກຄີໄພໄຟໄໝ້ເກີດຂຶ້ນ 15 ລາຍ, ໃນນັ້ນ ໄໝ້ເຮືອນປະຊາຊົນ 5 ຫຼັງ, ໄໝ້ລົດບັນທຸກ 2 ຄັນ, ໄໝ້ຮ້ານອາຫານ 1 ແຫ່ງ ແລະກຸຕິວັດ 1 ຫຼັງ ນອກນັ້ນແມ່ນໄໝ້ປ່າ ມູນຄ່າເສຍຫາຍມີເຖິງ 1,5 ຕື້ກີບ.

ສ່ວນສາເຫດທີ່ເກີດສ່ວນໃຫຍ່ແມ່ນການຊົມໃຊ້ໄຟຟ້າແລ້ວຂາດສະຕິ, ການຈູດທູບທຽນບູຊາເປັນຕົ້ນຕໍ, ຮ້າຍແຮງແມ່ນເກີດມີການວາງເພີງ 1 ກໍລະນີ, ຕໍ່ກັບສະພາບການດັ່ງກ່າວເຈົ້າໜ້າທີ່ຕໍ່າຫຼວດສະກັດກັ້ນ ແລະຕ້ານອັກຄີໄພໄດ້ລົງເກັບກໍາຂໍ້ມູນ, ພ້ອມທັງລົງສະກັດກັ້ນໃຫ້ທັນການເວລາທີ່ມີການແຈ້ງເກີດເຫດ.

ສຳລັບປີ 2017 ຜ່ານໄປພຽງ 2 ເດືອນກວ່າມີອັກຄີໄພເກີດຂຶ້ນແລ້ວ 11 ຄັ້ງມູນຄ່າເສຍຫາຍມີຫຼາຍກ່ວາ 83 ລ້ານກີບ, ໃນນັ້ນ ໄໝ້ວັດ 1 ຫຼັງ, ກຸຕິວັດ 1 ຫຼັງ, ກອງໄມ້ເສດ 1 ແຫ່ງ, ຮ້ານອາຫານ 1 ຫຼັງ ແລະເຮືອນຄົວ 1 ຫຼັງ ແນວໃດກໍດີ ເພື່ອເປັນການກຽມຄວາມພ້ອມໃຫ້ແກ່ ການປ້ອງກັນ ແລະສະກັດກັ້ນອັກຄີໄພ ເຈົ້າໜ້າທີ່ພະແນກຕໍາຫຼວດສະກັດກັ້ນ ແລະຕ້ານອັກຄີໄພກອງບັນຊາການ ປກສ ແຂວງຫຼວງພະບາງ ໄດ້ລົງໂຄສະນາເຜີຍແຜ່ຄວາມຮູ້ພື້ນຖານກ່ຽວກັບການປ້ອງກັນອັກຄີໄພຢູ່ບັນດາສະຖາບັນການສືກສາ ພ້ອມທັງກະກຽມປ້ອງກັນ ເວນຍາມຕະຫຼອດ 24 ຊົ່ວໂມງ ເພື່ອກະກຽມສະກັດກັ້ນອັກຄີໄພທີ່ອາດຈະເກີດຂຶ້ນໃຫ້ທັນການ.

ທັງນີ້ ທ່ານ ພັນໂທ ພີລະນີນໂສ ສີພັນທອງ ໄດ້ຮຽກຮ້ອງໃຫ້ທຸກຄົນໃນສັງຄົມ ຈົ່ງພ້ອມກັນມີສະຕິໃນການດຳລົງຊີວິດປະຈຳວັນເພາະໄລຍະນີ້ເປັນໄລຍະລະດູແລ້ງ ອາດຈະກໍ່ໃຫ້ເກີດອັກຄີໄພໄດ້ງ່າຍການຊົມໃຊ້ເຄື່ອງໄຟຟ້າ ແລະການດັງຟືນໄຟຕ້ອງມີສະຕິມອດມ້ຽນໃຫ້ດີ ເພື່ອຫຼີກລຽງອັກຄີໄພໄຟໄໝ້ທີ່ຈະຕາມມາ, ອີກດ້ານໜຶ່ງແມ່ນການຈູດປ່າຂໍໃຫ້ມີຄວາມລະມັດລະວັງສູງດີແທ້ແມ່ນບໍ່ຄວນຈູດໃນເຂດອ້ອມຮອບທີ່ມີເຮືອນຄົນອາໄສຢູ່.

ຂ່າວ: ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.