4 ແສນກວ່າລາຍ ນຳໃບຕາດິນຄໍ້າປະກັນເງິນກູ້ຈາກຕະຫຼາດເງິນລາວ

 ປະຈຸບັນ ບັນຫາທີ່ດິນພວມກາຍເປັນຄະດີລາຍໃຫຍ່ຂອງປະເທດຊຶ່ງມັນເກີດມາຈາກຫຼາຍປັດໄຈໃນນັ້ນບັນຫາໃບຕາດິນຊໍ້າຊ້ອນພວມຮືຮາກັນໄປທົ່ວບ້ານທົ່ວເມືອງໂດຍສະເພາະມາຮອດດຽວນີ້ບັນດາທະນາຄານທຸລະກິດ ແລະ ສະຖາບັນການເງິນຈຸລະພາກຈໍານວນຫຼາຍໄດ້ຮັບຜົນກະທົບໂດຍກົງຈາກບັນຫາດັ່ງກ່າວ ແລະ ໃນຂະນະນີ້ມີຜູ້ປະກອບການ, ນັກທຸລະກິດ ແລະປະຊາຊົນໄດ້ນໍາເອົາເອກະສານກ່ຽວກັບທີ່ດິນໄປຄໍ້າປະກັນການກູ້ເງິນກັບທະນາຄານທຸລະກິດ ແລະສະຖາ ບັນການເງິນຈຸລະພາກ 425.812 ລາຍການ.

  ທ່ານ ສົມມາດ ພົນເສນາ ລັດຖະມົນຕີກະຊວງຊັບພະຍາກອນທໍາມະຊາດ ແລະສິ່ງແວດລ້ອມໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII (10 ມິຖຸນາ 2019) ວ່າ: ບັນຫາການອອກໃບຕາດິນຊໍ້າຊ້ອນຊຶ່ງສາມາດກວດພົບຢູ່ຫຼາຍກໍລະນີໂດຍມີສາເຫດຫຼັກຄື: ການແຈ້ງ ເທັດວ່າໃບຕາດິນເສຍ; ໃບແຈ້ງເສຍພາສີທີ່ດິນ ແລະໃບຕາດິນຊໍ້າຊ້ອນກັນ; ໃບແຜນທີ່ດິນ ແລະໃບຕາດິນຊໍ້າຊ້ອນກັນ; ໃບແຜນທີ່ດິນຊໍ້າຊ້ອນກັນ; ໃບແຈ້ງເສຍພາສີທີ່ດິນຊໍ້າຊ້ອນກັນ; ໃບຕາດິນລັດ ແລະໃບຕາດິນບຸກຄົນຊໍ້າຊ້ອນກັນ; ລູກລັກເອົາໃບຕາດິນອອກຊື່ພໍ່ແມ່ແລ້ວປ່ຽນເປັນຊື່ຂອງໂຕເອງ ແລະກໍລະນີທີ່ມີຂໍ້ຂັດແຍ່ງທີ່ດິນພາຍຫຼັງສານຕັດສິນລຶບລ້າງໃບຕາດິນ. ສະນັ້ນ, ເຫັນວ່າ: ຍັງເປັນຊ່ອງຫວ່າງທີ່ເຈົ້າຂອງດິນນອກຈາກເອົາເອກະສານທີ່ດິນທີ່ບໍ່ແມ່ນໃບຕາດິນໄປຄໍ້ານໍາທະນາຄານໄດ້ແລ້ວສໍາລັບບຸກຄົນ ຫຼື ນິຕິບຸກຄົນບໍ່ດີເວລາໄດ້ໃບຕາດິນກໍ່ເອົາໄປຄໍ້ານໍາທະນາຄານທຸລະກິດອື່ນໆຕື່ມອີກພາໃຫ້ເກີດມີປະກົດການເອກະສານຊໍ້າຊ້ອນ.

   ທ່ານ ບຸນປອນ ສີສຸລາດ ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມຂອງສະພາແຫ່ງຊາດໄດ້ກ່າວວ່າ: ການຈັດຕັ້ງປະຕິບັດວຽກ ງານຄຸ້ມຄອງການອອກໃບຕາດິນໃນໄລຍະຜ່ານມາຍັງເຮັດບໍ່ທັນດີເທົ່າທີ່ຄວນຍັງມີຊ່ອງຫວ່າງ ແລະເກີດມີບັນຫາທີ່ສັບສົນໂດຍສະເພາະການອອກໃບຕາດິນຊໍ້າຊ້ອນອັນພາໃຫ້ເກີດຂໍ້ຂັດແຍ່ງກັນເກີດການສະເໜີ, ການຮ້ອງຟ້ອງ ແລະ ການຮ້ອງຂໍຄວາມເປັນທໍາກ່ຽວກັບທີ່ດິນນັບມື້ຫຼາຍຂຶ້ນ; ຜ່ານການຕິດຕາມກວດກາກວດເຫັນເອກະສານກ່ຽວກັບທີ່ດິນຂອງບຸກຄົນ ຫຼື ນິຕິບຸກຄົນທີ່ນໍາໄປຄໍ້າປະກັນການກູ້ຢືມເງິນກັບທະນາຄານທຸລະກິດ ແລະ ສະຖາບັນການເງິນໃນຂອບເຂດທົ່ວປະເທດມີທັງໝົດ 425.812 ລາຍການໃນນັ້ນເອກະສານທີ່ບໍ່ແມ່ນໃບຕາດິນມີທັງໝົດ 13.878 ລາຍການ,ເຫັນມີເອກະສານທີ່ດິນຊໍ້າຊ້ອນ ຫຼື ໃບຕາດິນຊໍ້າຊ້ອນທັງໝົດ153 ກໍລະນີ ໃນນີ້ໄດ້ຈາກການລາຍງານຂອງສະມາຊິກສະພາແຫ່ງຊາດປະຈໍາເຂດເລືອກຕັ້ງຈໍານວນ 37 ກໍລະນີ ແລະ ຈາກທະ ນາຄານແຫ່ງ ສປປ ລາວ ແລະບັນດາທະນາຄານທຸລະກິດໃນທົ່ວປະເທດ 116 ກໍລະນີ (ບໍ່ນັບກໍລະນີມີໃບຕາດິນຊໍ້າຊ້ອນທີ່ກູ້ຢືມເງິນນໍາສະຖາບັນການເງິນ ແລະການປ່ອຍກູ້ນອກລະບົບ).

  ຕໍ່ກັບການອອກໃບຕາດິນຊໍ້າຊ້ອນດັ່ງກ່າວເຮັດໃຫ້ເກີດມີປະກົດການຫຍໍ້ທໍ້ໃນການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ ແລະຄວາມສະຫງົບຂອງສັງ ຄົມເປັນຕົ້ນເປັນສາເຫດທີ່ພາໃຫ້ເກີດຂໍ້ຂັດແຍ່ງກ່ຽວກັບທີ່ດິນ ແລະສ້າງຜົນກະທົບດ້ານລົບໃຫ້ແກ່ລັດ ແລະສັງຄົມເຮົາ. ສະນັ້ນ,ມັນຈິ່ງເລັ່ງທວງໃຫ້ອົງການຈັດຕັ້ງທີ່ກ່ຽວຂ້ອງລວມທັງທະນາຄານທຸລະກິດ ແລະສະຖາບັນການເງິນຈຸລະພາກ, ບຸກຄົນ ຫຼື ນິຕິບຸກຄົນຕ້ອງເປັນເຈົ້າການຕອບໂຕ້-ຕອບຕ້ານ, ສະກັດກັ້ນ ແລະແກ້ໄຂບັນຫາດັ່ງກ່າວໃຫ້ໝົດໄປ; ຕ້ອງເປັນເຈົ້າການເພີ່ມທະວີຄວາມຮັບຜິດຊອບສູງຂຶ້ນ, ມີຈັນຍາບັນ-ຈັນຍາທໍາ ແລະເຄົາລົບກົດໝາຍຢ່າງເຂັ້ມງວດ ແລະຕໍ່ຜູ້ກະທໍາຜິດກໍ່ຕ້ອງດໍາເນີນການໄປຕາມຂະບວນການຍຸຕິທໍາຢ່າງເຂັ້ມງວດ ແລະເດັດຂາດ.

ພາບ ແລະ ຂ່າວໂດຍ: ໜັງສືພິມເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.