ຖະໜົນວຽງຈັນແໜ້ນ ຍອດຂຶ້ນທະບຽນລົດໃໝ່ກາຍແລ້ວ 8 ແສນຄັນ

ສະພາບເສດຖະກິດບ້ານເຮົາແມ່ນຍັງຄົງສືບຕໍ່ຂະຫຍາຍຕົວດີຂຶ້ນຕໍ່ເນື່ອງບວກກັບນະໂຍບາຍປັບຂຶ້ນເງິນເດືອນ 500 ກີບ ຕໍ່ດັດຊະນີຂອງລັດຖະບານໄດ້ກາຍເປັນແຮງສຳຄັນສົ່ງຜົນໃຫ້ປະຊາຊົນມີເງິນໃນການຈັບຈ່າຍຊື້-ຂາຍສິນຄ້າ ໂດຍສະເພາະແມ່ນຊື້ລົດຍານພາຫະນະນຳໃຊ້ເຂົ້າໃນຊີວິດປະຈຳວັນ ຊຶ່ງພຽງ 2 ເດືອນຕົ້ນປີ 2017 ນີ້ຢູ່ນະຄອນຫຼວງວຽງຈັນ ມີລົດໃໝ່ມາຂຶ້ນທະບຽນແລ້ວ 8.972 ຄັນ ຈາກຈຳນວນຕົວເລກດັ່ງກ່າວລວມຍອດລົດໃນນະຄອນຫຼວງ ແຕ່ປີ 2000 ຮອດເວລານີ້ແມ່ນມີກາຍແລ້ວ 8 ແສນຄັນ.

ອີງຕາມຂໍ້ມູນຈາກກອງຄຸ້ມຄອງພາຫະນະ ແລະການຂັບຂີ່ພະແນກໂຍທາທິການ ແລະຂົນສົ່ງນະຄອນຫຼວງວຽງຈັນ ໃຫ້ຮູ້ວ່າ: ໃນໄລຍະ 2 ເດືອນຕົ້ນ (ມັງກອນ-ກຸມພາ) ປີ 2017 ມີລົດໃໝ່ມາ ຂຶ້ນທະບຽນທັງໝົດແລ້ວ 8.972 ຄັນ, ໃນນັ້ນ ລົດຈັກ A 5.642 ຄັນ, ເກັງ B1 808 ຄັນ, ກະບະ B21, 483 ຄັນ, ຈິບ B3 489 ຄັນ, ຕູ້ B4119 ຄັນ, ບັນທຸກ C 406 ຄັນ ແລະລົດໂດຍສານ D 25 ຄັນ.

ສຳລັບລົດມາຂຶ້ນທະບຽນໃນເດືອນ ມັງກອນມີທັງໝົດ 4.907 ຄັນ ໃນນັ້ນ ລົດຈັກ A 3.141 ຄັນ, ເກັງ B1 477 ຄັນ, ກະບະ B21 764 ຄັນ, ຈິບ B3 236 ຄັນ, ຕູ້ B4 65 ຄັນ, ບັນທຸກ C 213 ຄັນ ແລະລົດໂດຍສານ D 11 ຄັນ ລວມທັງໝົດ 4.907 ຄັນ ສ່ວນເດືອນກຸມພາມີລົດຈັກ A 2.501 ຄັນ, ເກັງ B1 331 ຄັນ, ກະບະ B21 719 ຄັນ, ຈິບ B3 253 ຄັນ, ຕູ້ B4 54 ຄັນ, ບັນທຸກ C 193 ຄັນ ແລະລົດໂດຍສານ D 14 ຄັນລວມທັງໝົດ 4.065 ຄັນ.

ຈາກການເພີ່ມຂຶ້ນຂອງລົດດັ່ງກ່າວ ໄດ້ເຮັດໃຫ້ເວລານີ້ຢູ່ນະຄອນຫຼວງວຽງຈັນແຕ່ປີ 2000 ມາຮອດປະຈຸບັນມີລົດ ຂຶ້ນທະບຽນແລ້ວ 807.991 ຄັນ ໃນນີ້ ສະເພາະປີ 2000 ມີລົດຂຶ້ນທະບຽນ 11,29 ພັນຄັນ; ປີ 2001 ມີ 52,59 ພັນຄັນ; 2002 ມີ 39 ພັນກວ່າຄັນ; 2003 ມີ 40 ພັນກວ່າຄັນ; 2004 ມີ 30 ພັນກວ່າຄັນ; ປີ 2005ມີ 33 ພັນກວ່າຄັນ; 2006 ມີ 40 ພັນກວ່າຄັນ; 2007 ມີ 47 ພັນກວ່າຄັນ; 2008 ມີ 60 ພັນກວ່າຄັນ; 2009 ມີ 48,99 ພັນຄັນ; 2010 ມີ 57 ພັນກວ່າຄັນ; ປີ 2011 ມີ 55 ພັນກວ່າຄັນ; 2012 ມີ 60 ພັນກວ່າຄັນ; 2013 ມີ 66 ພັນກວ່າຄັນ, ປີ 2014 ມີ 61,4 ພັນຄັນ; ປີ 2015 ມີ 68 ພັນກວ່າຄັນ, ປີ 2016 ມີ 69 ພັນກວ່າຄັນ ແລະ 2 ເດືອນຕົ້ນປີ 2017 ມີລົດມາ ຂຶ້ນທະບຽນ 8.972 ຄັນ.

ຢ່າງໃດກໍຕາມ ການເພີ່ມຂຶ້ນຂອງພາຫະນະແມ່ນມີຜົນມາຈາກການຂະຫຍາຍຕົວຂອງເສດຖະກິດ ແລະປະຊາຊົນມີລາຍໄດ້ເພີ່ມຂຶ້ນ ແຕ່ກໍໜີບໍ່ມົ້ມກັບບັນຫາທີ່ຕາມມາເປັນຕົ້ນແມ່ນສະພາບການແອອັດໃນການສັນຈອນ ໂດຍສະ ເພາະໂມງເຂົ້າການ ແລະເລີກການທີ່ເປັນສາເຫດໜຶ່ງມີສ່ວນເຮັດໃຫ້ເກີດອຸບັດເຫດຫຼາຍຂຶ້ນເຊັ່ນດຽວກັນສະເພາະ ປີຜ່ານມາມີຕົວເລກການເກີດອຸບັດເຫດຢູ່ນະຄອນຫຼວງວຽງຈັນ ສູງເຖິງ 1 ພັນກວ່າຄັ້ງ ຂະນະທີ່ຜົນສຳຫຼວດໃນປີ 2015 ຈຳນວນພົນລະເມືອງທົ່ວນະຄອນຫຼວງວຽງຈັນມີທັງໝົດ 820.900 ຄົນ, ຍິງ 412.200 ຄົນ ແລະຊາຍ 408.700 ຄົນ.

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.