ນະຄອນໄກສອນມ້າງຄະດີສໍ້ໂກງສາມາດນຳລົດຂອງກາງຄືນມາ 9 ຄັນ

  ທ່ານ ພັທ ວົງພະຈັນ ເມກອຸໄທທິບ ຮອງຫົວໜ້າກອງບັນຊາການ ປກສ ນະຄອນໄກສອນພົມວິຫານ ແຂວງສະຫວັນນະເຂດ ໃຫ້ຮູ້ວ່າ: ໃນເວລາ 19:30 ໂມງຂອງວັນທີ 21 ກໍລະກົດ 2019, ໄດ້ມີຜູ້ຖືກເສຍຫາຍເຂົ້າມາແຈ້ງຄວາມນຳເຈົ້າໜ້າທີ່ ປກສ ນະຄອນ ພວກເຮົາວ່າ: ທ້າວ ເພັດສົມພອນ (ແຫຼ້) ອາຍຸ 41 ປີ, ປະຊາຊົນຢູ່ບ້ານບຶງວະ ນະຄອນໄກສອນ ພົມວິຫານ ໄດ້ສໍ້ໂກງຊັບໂດຍການໃຊ້ເລ້ຫຼ່ຽມດ້ວຍຮູບການມາເຊັນສັນຍາເຊົ່າລົດ (ປະເພດລົດກະບະ) ເພື່ອໄປແລ່ນວຽກ ນຳໂຄງການ.   ຈາກນັ້ນມາໃນເວລາ 21 ໂມງວັນທີ 25 ກໍລະກົດ, ເຈົ້າໜ້າທີ່ວິຊາສະເພາະຈິ່ງໄດ້ກັກຕົວຜູ້ກ່ຽວມາສືບສວນ-ສອບສວນ ແລະກໍ່ໄດ້ຮັບສາລະພາບທຸກຂໍ້ກ່າວຫາວ່າ: ໄດ້ມີການສໍ້ໂກງຊັບແທ້ໃນເບື້ອງຕົ້ນຜູ້ກ່ຽວໄດ້ມີການເຊັນສັນຍາເຊົ່າລົດໂດຍການສະເໜີລາຄາເຊົ່າເປັນລາຍວັນ, ຕົກຢູ່ວັນລະ 4.000 ບາດ (ເງິນໄທ) ຫຼືປະມານ 1 ລ້ານກວ່າກີບ, ຊຶ່ງໃຊ້ກຳນົດເຊົ່າ 10 ວັນ, ພ້ອມທັງມີການຈ່າຍເງິນກັນຮຽບຮ້ອຍ. ພໍໄດ້ລົດມາ ທ້າວ ເພັດ ສົມພອນ (ແຫຼ້) ກໍ່ໄດ້ນຳເອົາລົດທີ່ເຊົ່າມາໄປຊວດຈຳເອົາເງິນນອກລະບົບ. ເມື່ອເຫັນວ່າໄດ້ຮັບຜົນດີ ທ້າວ ເພັດສົມພອນ ຈຶ່ງໄດ້ໄປເຊັນສັນຍາອີກລາຍຕໍ່ໄປພ້ອມດ້ວຍລາຍອື່ນໆອີກລວມແລ້ວມີ ເຖິງ 9 ລາຍ, ໄດ້ລົດໄປຊວດຈຳ 9 ຄັນ, ໃນນັ້ນມີລົດກະບະວີໂກ້ 5 ຄັນ, ລົດກະບະອີຊຸຊຸ 2 ຄັນ, ລົດກະບະຟອດ 1 ຄັນ ແລະລົດກະບະແດຮັນ 1 ຄັນ ລວມແລ້ວຄິດເປັນມູນຄ່າທັງໝົດ 696 ລ້ານກີບ.   ຈາກນັ້ນທາງເຈົ້າໜ້າທີ່ຈິ່ງໄດ້ລົງໄປເອົາລົດຂອງກາງທີ່ທ້າວ ເພັດສົມພອນ ໄດ້ເອົາໄປຊວດຈຳນຳຮ້ານມາໄວ້ຢູ່ທີ່ ປກສ ນະຄອນ ເພື່ອດຳເນີນຄະດີຕາມລະບຽບກົດໝາຍບ້ານເມືອງ. ສ່ວນຜູ້ຖືກຫາກໍ່ໄດ້ກັກຕົວໄວ້ດຳເນີນຄະດີຕໍ່ໄປ. ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

Read more

ຈັບ 2 ຜູ້ຖືກຫາພ້ອມຂອງກາງຢາເສບຕິດ

 ວັນທີ 26 ມິຖຸນາຜ່ານມານີ້ເຈົ້າໜ້າທີ່ໜ່ວຍງານສະກັດກັ້ນ-ຕ້ານຢາເສບຕິດ ປກສ ເມືອງສິງ ແຂວງຫຼວງນໍ້າທາ ໄດ້ຮັບແຈ້ງຈາກພົນລະເມືອງດີວ່າ: ມີກຸ່ມຄົນບໍ່ດີເຄື່ອນໄຫວຄ້າ-ຂາຍຢາເສບຕິດຢູ່ບ້ານພັກແຫ່ງໜຶ່ງເຂດເມືອງສິງ ດັ່ງນັ້ນຈິ່ງໄດ້ລົງພິສູດແຫຼງຂ່າວເຫັນວ່າມີມູນຄວາມຈິງແທ້, ຈິ່ງໄດ້ວາງແຜນຈັບກຸ່ມສາມາດກັກຕົວຜູ້ຖືກຫາໄດ້ 1 ຄົນ ພ້ອມຂອງກາງຢາບ້າຈໍານວນ 55 ເມັດ, ຫົວເຊື້ອນໍ້າແຂງ 3 ກຣາມ ມາດໍາເນີນການສືບສວນ-ສອບສວນ ທ້າວ ຄໍາພອນ, ອາຍຸ 40 ປີ, ປະຊາ ຊົນຢູ່ບ້ານຈຽງມູນ ເມືອງສິງ ແຂວງຫຼວງນໍ້າທາສາລະພາບວ່າຢາບ້າຈໍານວນ 55 ເມັດ, ຢາເສບຕິດປະເພດຫົວເຊື້ອນໍ້າແຂງ 3 ກຣາມ ທີ່ທາງເຈົ້າໜ້າທີ່ກວດພົບເຫັນແມ່ນຜູ້ກ່ຽວໄດ້ຊື້ນໍາທ້າວ ລື້ວ່າງ ຢູ່ບ້ານກົ້ກມ່ວງ ເມືອງສິງ, ພາຍຫຼັງໄດ້ຢາບ້າມາແລ້ວແມ່ນໄດ້ເອົາມາຂາຍຍ່ອຍ ແລະເສບ.  ຜ່ານການສືບສວນ-ສອບສວນຂອງທາງເຈົ້າໜ້າທ່ີຈິ່ງສາມາດຂະຫຍາຍຜົນຜູ້ກ່ຽວໄດ້ຊັດທອດຫາ ທ້າວ ລື້ວ່າງ ອາຍຸ 40 ປີ, ອາຊີບຊາວນາ, ປະຈຸບັນຢູ່ບ້ານກົ້ກມ່ວງ, ເມືອງສິງ ມາຮອດວັນທີ 27 ມິຖຸນາ 2019 ທາງໜ່ວຍງານສະກັດ ກັ້ນ ແລະຕ້ານຢາເສບຕິດ ຈຶິ່ງໄດ້ສົມທົບ ອົງການໄອຍະການປະຊາຊົນເຂດ II ເພື່ອອອກຄໍາສັ່ງກວດຄົ້ນເຄຫາສະຖານເຮືອນ ທ້າວ ລື້ວ່າງ, ພົບເຫັນຢາເສບຕິດ ປະເພດຫົວເຊື້ອນໍ້າແຂງ 73 ກຣາມ ແລະຢາຝິ່ນນໍ້າໜັກ 34 ກຼາມ ຈຶ່ງໄດ້ກັກຕົວ ທ້າວ ລື້ວ່າງ ມາ ດໍາເນີນການສືບສວນ-ສອບສວນ.   ຜູ້ກ່ຽວໄດ້ຮັບສາລະພາບວ່າ: ຢາເສບຕິດປະເພດຢາບ້າຈໍານວນດັ່ງກ່າວແມ່ນຜູ້ກ່ຽວໄດ້ຊື້ນຳຄູ່ຮ່ວມຂະບວນການຄົນມຽນມາຈຸດຊື້ຂາຍຢູ່ແຄມແມ່ ນໍ້າຂອງຝ່ັງລາວ.   ຂ່າວຍັງໃຫ້ຮູ້ຕື່ມອີກວ່າ: ວັນທີ 2 ກໍລະກົດ 2019 ເຈົ້າໜ້າທີ່ ປກສ ເມືອງສິງ ກັກໄດ້ຜູ້ຖືກຫາຕື່ມ 2 ຄົນ ພ້ອມຂອງກາງຢາບ້າຈໍານວນ 25 ເມັດ, ທ້າວ ໜານໜໍ່ອາຍຸ 36 ປີ ຢູ່ບ້ານສີລິມູນ ແລະ ທ້າວ ທອງ ອາຍຸ 36 ປີ, ຢູ່ບ້ານນໍ້າແກ້ວຫຼວງ, ເມືອງສິງ ແຂວງຫຼວງນ້ຳທາ ໄດ້ ຮັບສາລະພາບວ່າ: ໄດ້ເຄື່ອນໄຫວຊື້-ຂາຍ ແລະເສບຢາບ້ານຳກັນມາໄດ້ຫຼາຍຄັ້ງ, ປະຈຸບັນຜູ້ຖືກຫາທັງ 4 ຄົນ, ພ້ອມ ຂອງກາງຢາເສບຕິດໄດ້ນໍາສົ່ງໃຫ້ພະແນກສະກັດກັ້ນ ແລະຕ້ານຢາເສບຕິດ ປກສ ແຂວງ ດໍາເນີນຄະດີຕາມລະບຽບກົດໝາຍໃນຂັ້ນຕໍ່ໄປ. ຂຽນໂດຍ: ສົມພອນພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

Read more

ປກສ ສະຫວັນນະເຂດ ທຳລາຍກັນຊາ 320 ຕົ້ນ

  ໃນວັນທີ 29 ກໍລະກົດ 2019 ນີ້, ເຈົ້າໜ້າທີ່ຕຳຫຼວດກອງບັນຊາການ ປກສ ແຂວງສະຫວັນນະເຂດ ໄດ້ລົງທຳລາຍຕົ້ນກັນຊາທີ່ເປັນສານເສບຕິດຢູ່ຂອບເຂດບ້ານສົມສະອາດ ນະຄອນໄກສອນ ພົມວິຫານ ທີ່ປະຊາຊົນຈໍານວນໜຶ່ງທີ່ມີການລັກລອບປູກໄວ້ຢູ່ໃນສວນຜັກ ແລະສວນຢາງຊຶ່ງມີຈຳນວນທັງໝົດ 320 ຕົ້ນ ໃນນີ້ມີຕົ້ນຊາດິບ 166 ຕົ້ນ ແລະຊາແຫ້ງ 154 ຕົ້ນ.   ໃນການລົງທຳລາຍຄັ້ງນີ້ມີທ່ານ ພັທ ບຸນຍູ້ ສາຍຄຳສຸລິຍະວົງສາ ຮອງຫົວໜ້າຫ້ອງຕຳຫຼວດ ປກສ ແຂວງພ້ອມດ້ວຍຄະນະ, ມີພະນັກງານວິຊາສະເພາະ, ກອງພັນເຄື່ອນທີ່ ປກສ ແຂວງ, ປກສ ນະຄອນໄກສອນພົມວິຫານ, ອົງການໄອຍະການເຂດໜຶ່ງ, ອຳນາດການປົກຄອງບ້ານ, ປກຊ-ປກສ ບ້ານສົມສະອາດເຂົ້າຮ່ວມທຳລາຍ.    ກັນຊາທີ່ໄດ້ລົງໄປທໍາລາຍໃນຄັ້ງນີ້ທາງເຈົ້າໜ້າທີ່ຕຳຫຼວດ ປກສ ແຂວງສະຫວັນນະເຂດ ພ້ອມດ້ວຍພາກສ່ວນທີ່ກ່ຽວຂ້ອງແມ່ນໄດ້ນຳພາກັນກວດຄົ້ນສ່ວນດັ່ງກ່າວ ແລະຕັດຕົ້ນກັນຊາດິບ ແລະຊາແຫ້ງຈໍານວນ 320 ຕົ້ນ ທີ່ເປັນສານເສບຕິດ ແລະຜິດລະບຽບກົດໝາຍບ້ານເມືອງ ແລະທັງເປັນການສະກັດກັ້ນບໍ່ໃຫ້ມີການລັກລອບຄ້າຂາຍສິ່ງເສບຕິດ ແລະການປູກກັນຊາຂອງພໍ່ແມ່ປະຊາຊົນ, ພໍ່ຄ້າຊາວຂາຍໃຫ້ຫຼຸດໜ້ອຍຖອຍລົງ,  ສະນັ້ນຈິ່ງຮຽກຮ້ອງມາຍັງທຸກພາກສ່ວນຈົ່ງພ້ອມກັນຢຸດເຊົາໃນ ການປູກຕົ້ນກັນຊາ, ການຄ້າຂາຍຢາເສບຕິດ ແລະສິ່ງຜິດກົດໝາຍ ແລະເພື່ອຫຼີກເວັ້ນບັນຫາທີ່ພາໃຫ້ເກີດປາກົດການຫຍໍ້ທໍ້ຕ່າງໆ ທີ່ເກີດຂຶ້ນຢູ່ໃນສັງຄົມເປັນຕົ້ນ: ຂີ້ລັກ, ງັດແງະ, ຂ້າເຈົ້າເອົາຂອງ ແລະອື່ນໆ ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

Read more

ລັດເປີດໂອກາດໃຫ້ພາກທຸລະກິດມີສ່ວນຮ່ວມພັດທະນາເມືອງສັງທອງ

  ໃນກອງປະຊຸມຊຸກຍູ້ຂະບວນການແຂ່ງຂັນຮັກຊາດ ແລະພັດທະນາຂອງນັກທຸລະກິດເຂົ້າສູ່ເມືອງສັງທອງແມ່ນເປັນການສົ່ງເສີມນັກທຸລະກິດເຂົ້າມາມີສ່ວນຮ່ວມໃນການພັດທະນາຕົວເມືອງໂດຍປະຕິບັດຕາມ 3 ທ່າແຮງຫຼັກທີ່ໄດ້ກໍານົດໄວ້ໃນກອງປະຊຸມໃຫຍ່ຄັ້ງທີ IV ຂອງຄະນະພັກມືອງສັງທອງ, ຊຶ່ງກອງປະຊຸມດັ່ງກ່າວໄດ້ຈັດຂຶ້ນໃນວັນທີ 8 ສິງຫາ 2019 ທີ່ຫ້ອງການປົກຄອງເມືອງສັງທອງ ນະຄອນຫຼວງວຽງຈັນ, ໂດຍການເປັນປະທານຂອງທ່ານ ສິນລະວົງ ຄຸດໄພທູນ ເຈົ້າຄອງນະ ຄອນຫຼວງວຽງຈັນ, ມີທ່ານ ບຸນໜາ ຜາທຸມມະວົງ ຫົວໜ້າພະແນກພາຍໃນນະຄອນຫຼວງວຽງຈັນ, ທ່ານ ດາວ ເພັດອາລຸນ ເຈົ້າເມືອງສັງທອງ, ມີບັນດາພາກທຸລະກິດ ແລະພາກສ່ວນກ່ຽວຂ້ອງເຂົ້າຮ່ວມ.  ທ່ານ ດາວ ເພັດອາລຸນ ລາຍງານຕໍ່ກອງປະຊຸມດັ່ງກ່າວວ່າ: ເພື່ອເປັນການກະຕຸ້ນທ່າແຮງໃຫ້ກັບເມືອງໂດຍສອດຄ່ອງກັບມະຕິຂອງກອງປະຊຸມໃຫຍ່ຄັ້ງທີ IV ຂອງອົງຄະນະພັກເມືອງທີ່ກຳນົດໄວ້ຢ່າງຈະແຈ້ງວ່າການພັດທະນາເມືອງຕ້ອງໄດ້ສຸມໃສ່ 3 ເຂດໃຫຍ່ເປັນຫຼັກຕົ້ນຕໍແມ່ນເຂດພັດທະນາທີ 1: ເຂດນໍ້າຕອນລຽບພູພະນັງກຳນົດເປັນເຂດກະສິກຳຕິດພັນກັບການທ່ອງທ່ຽວທາງປະຫວັດສາດຊຶ່ງເຂດດັ່ງກ່າວໄດ້ຊຸກຍູ້ສົ່ງເສີມປະຊາຊົນຈັດຕັ້ງເປັນກຸ່ມຜະລິດເຂົ້າອີນຊີ, ພືດຜັກປອດສານພິດແລະຫັດຖະກຳຈຳນວນໜຶ່ງ; ເຂດພັດທະນາທີ່ 2: ເຂດທາງເລກທີ 11 ລຽບຕາມແມ່ນໍ້າຂອງກຳນົດເປັນເຂດຜະລິດກະສິກຳ, ອຸດສາຫະກຳ ແລະ ການ ບໍລິການ ເປັນຕົ້ນການຄ້າ-ຂາຍ, ການບໍລິການຕ່າງໆຕິດພັນກັບການສົ່ງເສີມການປູກເຂົ້າ, ປູກພືດລົ້ມລຸກ ແລະ ຍັງກຳນົດເປັນເຂດການຂຸດຄົ້ນແຮ່ທາດ, ໂຮງຈັກໂຮງງານຕ່າງໆ; ເຂດພັດທະນາທີ່ 3 ເຂດລຽບຕາມສາຍນໍ້າສັງກຳນົດເປັນເຂດກະສິກຳ ແລະການທ່ອງທ່ຽວດ້ານທຳມະຊາດ, ໃນນີ້ເຂດດັ່ງກ່າວຍັງໄດ້ສົ່ງເສີມການປູກເຂົ້າ, ພືດຜັກ, ໄມ້ໃຫ້ໝາກ, ພືດອຸດສາຫະກຳ, ໄມ້ອຸດສາຫະກຳ, ການລ້ຽງສັດເປັນຟາມ ແລະຍັງໄດ້ຊຸກຍູ້ສົ່ງເສີມການສ້າງຕັ້ງກຸມຜະລິດຫັດຖະກຳໄມ້ປ່ອງນຳອີກ.   ພ້ອມດຽວກັນນີ້, ໃນມະຕິກອງປະຊຸມໃຫຍ່ຄັ້ງທີ່ IV ກໍໄດ້ກຳນົດແຜນພັດທະນາເສດຖະກິດ-ສັງຄົມ 5 ປີ ໄວ້ໃນ 4 ຂົງເຂດວຽກງານ, 112 ໂຄງການ, ໃນນັ້ນຂົງເຂດເສດຖະກິດ 53 ໂຄງການ, ຂົງເຂດວັດທະນະທຳ-ສັງຄົມ 27 ໂຄງການ, ຂົງເຂດປ້ອງກັນຊາດ-ປ້ອງກັນຄວາມສະຫງົບ 12 ໂຄງການ ແລະຂົງເຂດບໍລິ ຫານລັດ 21 ໂຄງການ, ຊຶ່ງປະຈຸບັນມາຮອດທ້າຍສະໄໝຂອງກອງປະຊຸມ,ເນື່ອງໃນໂອກາດເປີດຂະບວນການຮັກຊາດ ແລະພັດທະນາຕິດພັນກັບຮັກນະຄອນຫຼວງວຽງຈັນຂອງພາກທຸລະກິດຢູ່ເມືອງສັງທອງ ແລະເພື່ອເປັນການດຶງດູດການລົງທຶນມາສູ່ເມືອງສັງທອງແມ່ນຕ້ອງສຸມໃສ່ຂົງເສດຖະກິດແລະຂົງເຂດວັດທະນະທຳ-ສັງ ຄົມທີ່ນອນໃນ 3 ເຂດພັດທະນາຫຼັກທີ່ກ່າວມາເບື້ອງຕົ້ນ.   ເຂົ້າຮ່ວມກອງປະຊຸມດັ່ງກ່າວ, ທ່ານ ສິນລະວົງ ຄຸດໄພທູນ ກໍໄດ້ໃຫ້ທິດໂອ້ລົມເປັນຕົ້ນແມ່ນໃຫ້ເມືອງສືບຕໍ່ສົ່ງເສີມທຸກການລົງທຶນຂອງພາກເອກະຊົນທີ່ເຫັນວ່າຈະຊ່ວຍໃຫ້ເມືອງມີການພັດທະນາໂດຍສະເພາະສ້າງເມືອງສັງທອງ ໃຫ້ເປັນເມືອງໜ້າຢູ່,ສ້າງເມືອງໃຫ້ກາຍເປັນເມືອງຊີວະພາບ ແລະເອົາການບໍລິການຕິດພັນກັບວຽກທ່ອງທ່ຽວ, ພ້ອມທັງຮັບປະກັນໃຫ້ຊົນນະບົດ ແລະຕົວເມືອງມີຈັງຫວະການພັດທະນາທີ່ຍັບມໍ່ເຂົ້າໃກ້ກັນ,ສົ່ງເສີມການຜະລິດກະສິກຳເປັນສິນຄ້າໃຫ້ຫຼາຍຂຶ້ນ ແລະຖື ເອົາກະສິກຳສະອາດເປັນທ່າແຮງໂດຍນຳໃຊ້ເຕັກນິກວິທະຍາສາດວິທະຍາການເຂົ້າໃນການຜະລິດ ແລະຊ່ວຍເຫຼືອພ້ອມກັນນັ້ນກໍຕ້ອງໄດ້ສ້າງພະນັກງານນັກພັດທະ ນາທ້ອງຖິ່ນກັນທີ່ ແລະ ເປັນຕົວແບບຂອງການພັດທະນາໃຫ້ເປັນຮູບປະທຳຫຼາຍຂຶ້ນ, ຄຽງຄູ່ກັບອົງການຈັດຕັ້ງເບື້ອງລັດພາກທຸລະກິດແມ່ນເປັນກຳລັງແຮງທີ່ສຸດ.   ສະນັ້ນຈຶ່ງຮຽກຮ້ອງພາກທຸລະກິດເຂົ້າມາມີສ່ວນຮ່ວມໃນການແຂ່ງຂັນຮັກຊາດ ແລະພັດທະນາຕິດພັນກັບການຮັກນະຄອນຫຼວງວຽງຈັນຊຸກຍູ້ວຽກງານ 3 ສ້າງ3 ຫຼຸດ 3 ເພີ່ມ 3 ຂະບວນການ ແລະ 3 ເພື່ອໃຫ້ເປັນຂະບວນການຟົດຟືນໃຫ້ຫຼາຍຂຶ້ນ, ປຸກລະດົມໃຫ້ທຸກພາກສ່ວນມີສ່ວນຮ່ວມເປັນເຈົ້າການດຶງດູດການລົງທຶນ, ຊອກຕະຫຼາດແລະຊຸກຍູ້ໃຫເບັນດາຫົວໜ່ວຍທຸລະກິດປະກອບສ່ວນເຂົ້າໃນວຽກງານແຂ່ງຂັນພັດທະນາຊົນນະບົດເພື່ອສ້າງໃຫ້ນະຄອນຫຼວງວຽງຈັນ ມີໃບໜ້າໃໝ່ ໃຫ້ມີການປ່ຽນແປງ ແລະ ພັດທະນາເປັນກ້າວໆ. ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

Read more

ວຽງໄຊ ຢືນຢັນພົບ 2 ສົບຍັງບໍ່ແມ່ນຜູ້ສູນຫາຍ

 ການຄົ້ນຫາຜູ້ສູນຫາຍ 7 ຄົນ ຈາກດິນເຊາະເຈື່ອນທັບ 2 ຄອບຄົວທີ່ບ້ານຫີນດຳ ເມືອງວຽງໄຊ ແຂວງຫົວພັນ ຊຶ່ງເປັນເວລາ 7 ວັນແລ້ວແຕ່ຍັງບໍ່ມີຮ່ອງຮອຍພົບເຫັນສົບເທື່ອຊຶ່ງກ່ອນໜ້ານີ້ທາງອໍານາດການປົກຄອງເມືອງກອນເຊີນແຂວງແທງຮົວ ປະເທດຫວຽດນາມ ໄດ້ແຈ້ງມາຫາອຳນາດການປົກຄອງເມືອງວຽງໄຊ ວ່າເຂົາ ເຈົ້າໄດ້ພົບເຫັນສົບເດັກນ້ອຍ 2 ຄົນທີ່ໃກ້ກັບເຂດຊາຍແດນລາວ-ຫວຽດນາມແຕ່ທາງໜ່ວຍວິຊາການ ແລະ ຍາດຕິພີ່ນ້ອງຜູ້ສູນຫາຍໄດ້ສັນລະສູດຢືນຢັນແລ້ວວ່າບໍ່ແມ່ນຍາດຜູ້ກ່ຽວປະຈຸບັນໄດ້ເລັ່ງສືບຕໍ່ຄົ້ນຫາໂດຍມີພາກສ່ວນເມືອງ, ອ້າຍນ້ອງທະຫານ 215 ແລະສົມທັບກັບໜ່ວຍງານວິຊາການແຂວງຫົວພັນໄດ້ພາກັນຂຸດຄົ້ນໃຫ້ພົບເຫັນໂດຍໄວ.   ທ່ານ ພອນສຸກ ອິນທະວົງ ເຈົ້າເມືອງວຽງໄຊ ໄດ້ລາຍງານຜ່ານໂທລະສັບໃຫ້ຮູ້ວ່າ: ໃນວັນທີ 7 ສິງຫາ ໄດ້ຮັບແຈ້ງຈາກອຳນາດການປົກຄອງເມືອງກອນເຊີນວ່າໄດ້ພົບເຫັນສົບເດັກນ້ອຍ 2 ຄົນທີ່ໃກ້ກັບເຂດຊາຍແດນລາວ-ຫວຽດນາມແຕ່ທາງໜ່ວຍວິຊາການ ແລະ ຍາດຕິພີ່ນ້ອງຜູ້ສູນຫາຍໄດ້ຢືນຢັນແລ້ວວ່າບໍ່ແມ່ນຍາດພີ່ນ້ອງຂອງຜູ້ກ່ຽວໂດຍສັນລະສູດຢືນຢັນແລ້ວວ່າເປັນຄົນຫວຽດນາມທີ່ຖືກນໍ້າໄຫຼພັດມາເພາະວ່າໃນຊ່ວງເກີດພາຍຸໃນເຂດເມືອງກອນເຊີນກໍ່ມີຜູ້ສູນຫາຍຈາກໄພນໍ້າຖ້ວມເຊັນດຽວກັນ. ສຳລັບການຄົ້ນຫາຜູ້ສູນຫາຍໃນປະ ຈຸບັນມີກຳລັງພາກສ່ວນທ້ອງຖິ່ນເມືອງ, ອ້າຍນ້ອງທະຫານ 215 ແລະສົມທັບກັບໜ່ວຍງານວິຊາການທີ່ມາຈາກແຂວງຫົວພັນໄດ້ສືບຕໍ່ຄົ້ນຫາ ຊຶ່ງໄດ້ວ່າງແຜນ ສຳຫຼວດພື້ນທີ່ ແລະຂຸດຄົ້ນເລີ່ມຈາກຂອບ ເຂດບໍລິເວນເກີດເຫດໄປຫາເຂດຊາຍ ແດນທີ່ມີໄລຍະຫ່າງ 12 ກິໂລແມັດໂດຍໃຊ້ກົນຈັກປະເພດລົດແມັກໂຄ 2 ຄັນບວກກັບກຳລັງແຮງງານຄົນ.   ທ່ານເຈົ້າເມືອງໃຫ້ຮູ້ຕື່ມອີກວ່າ: ການຄົ້ນຫາຄັ້ງນີ້ແມ່ນມີຄວາມຫຍຸ້ງຍາກຫຼາຍເພາະວ່າເປັນເຂດທີ່ມີພູສູງ, ຫ້ວຍຮ່ອງ, ແມ່ນໍ້າ ແລະມີຂີ້ຕົມຫຼາຍຊຶ່ງບາງຈຸດລົດແມັກໂຄບໍ່ສາມາດເຂົ້າຫາຂຸດຄົ້ນໄດ້ຢ່າງໃດກໍ່ຕາມເມື່ອມີເຫດການດັ່ງກ່າວເກີດຂຶ້ນເມືອງວຽງໄຊຍັງໄດ້ມີແຜນຍົກຍ້າຍຄອບຄົບທີ່ຢູ່ໃກ້ກັບແມ່ນໍ້າ, ພູສູງ ແລະຫ້ວຍຮ່ອງອື່ນໆອອກຈາກເຂດທີ່ມີຄວາມສ່ຽງ. ຂຽນໂດຍ: ແພງຕາ  ພາບ ແລະຂ່າວຈາກ: ໜັງສືພິມເສດຖະກິດສັງຄົມ

Read more

6 ເດືອນ ດ່ານສາກົນນໍ້າເຫຼືອງເກັບລາຍຮັບໄດ້ 168,46 ຕື້ກີບ

ດ່ານສາກົນຂົວມິດຕະພາບນໍ້າເຫືອງເປັນດ່ານໜຶ່ງທີ່ຕັ້ງຢູ່ເມືອງແກ່ນທ້າວ, ແຂວງໄຊຍະບູລີ ຊຶ່ງມີ 4 ດ່ານ ປະເພນີຂຶ້ນກັບ,ຜ່ານການຊີ້ນໍາໆພາທາງດ້ານການເມືອງແນວຄິດ, ດ້ານວຽກງານວິຊາສະເພາະຜ່ານມາເຫັນວ່າພາຍໃນດ່ານສາກົນນໍ້າເຫືອງກໍ່ຄືບັນດາດ່ານປະເພນີທີ່ຂຶ້ນກັບແມ່ນມີຄວາມສະຫງົບໂດຍພື້ນຖານ, ວຽກງານວິຊາສະເພາະໄດ້ມີການປັບປຸງແກ້ໄຂຫຼາຍດ້ານ, ການບໍລິການພາຍໃນດ່ານມີຄວາມສະດວກ, ວ່ອງໄວ ແລະຮັບປະກັນດ້ານລະບຽບກົດໝາຍ, ການສົ່ງອອກ-ນໍາເຂົ້າສິນຄ້າ, ເຄື່ອງຂອງຕ່າງໆ ເຫັນວ່າມີບາງສະນິດສິນຄ້າແມ່ນໄດ້ເພີ່ມຂຶ້ນ, ເຄື່ອງຂອງທີ່ເສຍພາສີສ່ວນຫຼາຍແມ່ນການນໍາເຂົ້ານໍ້າມັນເຊື້ອໄຟຊຶ່ງກວມເອົາ94,68% ຂອງລາຍຮັບທົ່ວດ່ານ ຊຶ່ງ 6 ເດືອນຕົ້ນປີ 2019 ສາມາດເກັບລາຍຮັບໄດ້ທັງໝົດ 168,46 ຕື້ກີບ, ເທົ່າກັບ52,10% ຂອງແຜນການປີ.   ທ່ານ ສົມພິນ ອິນທະວົງ ຫົວໜ້າດ່ານສາກົນຂົວມິດຕະພາບນໍ້າເຫືອງ ໃຫ້ຮູ້ວ່າ: ຈາກສະພາບທີ່ກ່າວມາຂ້າງເທິງນັ້ນແມ່ນສ່ວນໜຶ່ງຊຶ່ງສະແດງໃຫ້ເຫັນວ່າບັນຫາທີ່ເກີດຂຶ້ນຈາກພາຍໃນ ແລະພາຍນອກທີ່ເປັນສາເຫດໃຫ້ແກ່ການຈັດຕັ້ງປະຕິບັດວຽກງານວິຊາສະເພາະກໍ່ຄືການຈັດເກັບລາຍຮັບ, ອີກດ້ານໜຶ່ງຍ້ອນມີການຊີ້ນໍາໆພາຂອງຄະນະກົມພາສີ, ອໍານາດການປົກຄອງທ້ອງຖິ່ນ ແລະ ຄວາມເອົາໃຈໃສ່ຢ່າງຕັ້ງໜ້າຂອງພະນັກງານວິຊາການພາຍໃນດ່ານຈຶ່ງເຮັດໃຫ້ການເກັບລາຍຮັບບັນລຸເປົ້າໝາຍ.   6 ເດືອນຕົ້ນປີ 2019 ສາມາດເກັບລາຍຮັບໄດ້ທັງໝົດ 168,46 ຕື້ກີບ, ເທົ່າກັບ 52,10% ຂອງແຜນການປີ, ໃນນັ້ນມີ: ລາຍຮັບພາກສ່ວນພາສີ 50,47 ຕື້ກີບ, ໃນນີ້: ຄ່າຊັກພິເສດ 16 ລ້ານກວ່າກີບ, ພາສີຂາເຂົ້າ 23,24 ຕື້ ກີບ, ຄ່າທໍານຽມຕ່າງໆ 1,80 ຕື້ກີບ, ຄ່າທໍານຽມຄັງແຮ 25,39 ຕື້ກີບ ແລະຄ່າປັບໃໝ 13 ລ້ານກີບ; ລາຍຮັບພາກສ່ວຍອາກອນ 117,98 ຕື້ກີບ, ໃນນີ້: ອາກອນຊົມໃຊ້ 77,36 ຕື້ກີບ, ອາກອນມູນຄ່າເພີ່ມ 40,50 ຕື້ກີບ ແລະ ອາກອນກໍາໄລ 116 ລ້ານກວ່າກີບ.   ວິໄຈລວມໝວດສິນຄ້າຕົ້ນຕໍຄື: ຄ່າຊັກພິເສດປະຕິບັດໄດ້ 16 ລ້ານກວ່າກີບ, ເທົ່າກັບ 17,48% ຂອງແຜນການປີ, ນໍ້າມັນເຊື້ອໄຟປະຕິບັດໄດ້ 134,11 ຕື້   ກີບ, ເທົ່າກັບ 94,68%, ພາຫະນະ 496 ລ້ານກວ່າກີບ, ເທົ່າກັບ 97,91%, ຊີ້ນສ່ວນອາໄລ່ຕ່າງໆ 74 ລ້ານກວ່າກີບ, ເທົ່າກັບ 115,11%, ເຄື່ອງກໍ່ສ້າງ 2,71 ຕື້ກີບ,ເທົ່າກັບ 74,72% ອຸປະກອນໃຊ້ດ້ວຍໄຟຟ້າ 838 ລ້ານກວ່າກີບ,ເທົ່າກັບ 215,39% ເຄື່ອງອຸປະໂພກ-ບໍລິໂພກ 3 ຕື້ກີບ,ເທົ່າກັບ 112,19% , ຄ່າທໍານຽມພາຫະນະເຂົ້າ-ອອກ 1,33 ຕື້ກີບ, ເທົ່າກັບ 87,98%, ຄ່າທໍານຽມຄັງແຮນໍາມັນເຊື້ອໄຟ 25,39 ຕື້ກີບ, ເທົ່າກັບ 229,10%, ຄ່າປັບໃໝ ແລະ ຂາຍເຄື່ອງຮີບ 13 ລ້ານກວ່າກີບ, ເທົ່າກັບ 99,12 %.   ທ່ານ ສົມພິນ ອິນທະວົງ ຍັງໃຫ້ຮູ້ຕື່ມອີກວ່າ: ເພື່ອເຮັດໃຫ້ການຈັດຕັ້ງປະຕິບັດທິດທາງແຜນການ 6 ເດືອນທ້າຍປີ ແລະ ການປັບປຸງວຽກງານດັ່ງກ່າວໃຫ້ໄດ້ຮັບຜົນດີນັ້ນຄະນະດ່ານສາກົນ,ດ່ານປະເພນີ ແລະຫົວໜ້າໜ່ວຍງານຕ່າງໆ ຈະເອົາໃຈໃສ່ເພີ່ມທະວີຄວາມເປັນເຈົ້າການໃນການຊີ້ນໍາໆພາການຈັດຕັ້ງປະຕິບັດວຽກງານຮອບດ້ານພາຍໃນດ່ານຢ່າງມີຄວາມຮັບຜິດຊອບສູງ, ເອົາໃຈໃສ່ຄຸ້ມຄອງກວດກາສິນຄ້າເຂົາ-ອອກດ່ານ, ເກັບກໍາດ້ານມູນຄ່າສິນຄ້າ, ເຄື່ອງຂອງຕ່າງໆເພື່ອເປັນຖານຂໍ້ ມູນອ້າງ ອີງໃນການແຈ້ງພາສີ ແລະເປັນຖານຂໍ້ມູນລາຄາໃຫ້ເຂັ້ມງວດຂຶ້ນກວ່າເກົ່າ. ຂຽນໂດຍ: ອຸ່ນເຮືອນ ໂພທິລັກພາບ ແລະ ຂ່າວຈາກ: ໜັງສືພິມເສດຖະກິດ-ສັງຄົມ

Read more

ນະຄອນຫຼວງ ມີເກືອບ 40 ກຸ່ມປູກພືດອິນຊີສະໜອງໃຫ້ກັບຕະຫຼາດ

  ນະຄອນຫຼວງວຽງຈັນ (ນວ) ມີທ່າແຮງບົ່ງຊ້ອນຫຼາຍດ້ານໂດຍສະເພາະແມ່ນດ້ານກະສິກຳທີ່ນະຄອນຫຼວງ ໄດ້ຊຸກຍູ້ ແລະກະຕຸ້ນກຸ່ມຜະລິດພືດຜັກ, ໝາກໄມ້ໃນ7 ຕົວເມືອງຫຼັກຂອງນະຄອນຫຼວງ, ໂດຍທຸກກຸ່ມຕ້ອງປະຕິບັດຕາມມາດຕະຖານກະສິກຳອິນຊີ ແລະກະສິກຳທີ່ດີເພື່ອຮັບປະກັນໃຫ້ຜົນຜະລິດທີ່ໄດ້ພຽງພໍກັບຄວາມກັບຕ້ອງການຕະຫຼາດແລະໃຫ້ບັນລຸຕາມເປົ້າໝາຍທີ່ວາງໄວ້ທີ່ສະພານະຄອນຫຼວງຮັບຮອງ 1,13 ແສນໂຕນຕໍ່ປີ ແລະສະໜອງການບໍລິໂພກໃຫ້ໄດ້ 100 ກິໂລຕໍ່ຄົນຕໍ່ປີຊຶ່ງໃນປະຈຸບັນນະຄອນຫຼວງສາມາດສ້າງກຸ່ມປູກພືດຜັກ ແລະໝາກໄມ້ຕາມມາດຕະຖານດັ່ງກ່າວໄດ້ແລ້ວເກືອບ 40 ກຸ່ມ.   ຕາມບົດລາຍງານຂອງຂະແໜງປູກຝັງພະແນກກະສິກຳ ແລະປ່າໄມ້ນະຄອນຫຼວງວຽງຈັນ ໃຫ້ຮູ້ເມື່ອບໍ່ດົນມານີ້ຮູ້ວ່າ: ໃນປີ 2019 ພະແນກກະສິກຳ ແລະປ່າໄມ້ນະຄອນຫຼວງວຽງຈັນໄດ້ກຳນົດແຜນການຜະລິດພືດຜັກຢູ່ນະຄອນຫຼວງວຽງຈັນ ໃນເນື້ອທີ່ທັງໝົດ 11,06 ພັນເຮັກຕາ, ກວມເອົາ 7 ເມືອງຫຼັກຄື: ເມືອງສີໂຄດຕະບອງ 1,33 ພັນເຮັກຕາ, ໄຊເສດຖາ 3 ຮ້ອຍເຮັກຕາ, ນາຊາຍທອງ1,07 ພັນເຮັກຕາ, ໄຊທານີ 3,15 ພັນເຮັກຕາ, ຫາດຊາຍຟອງ 3,27 ພັນເຮັກຕາ, ສັງທອງ1,09 ພັນເຮັກຕາ ແລະເມືອງປາກງື່ມ 840 ເຮັກຕາ.   ເພື່ອຮັບປະກັນການສະໜອງພືດຜັກໃຫ້ພຽງພໍກັບຄວາມຕ້ອງການ ແລະໃຫ້ບັນລຸຕາມເປົ້າໝາຍທີ່ວາງໄວ້ທີ່ສະພານະຄອນຫຼວງຮັບຮອງ 1,13 ແສນໂຕນຕໍ່ປີແລະສະໜອງການບໍລິໂພກໃຫ້ໄດ້ 100 ກິໂລຕໍ່ຄົນຕໍ່ປີ, ສະເພາະການຊຸກຍູ້ການປູກພືດໃນປີ 2019, ໃນນີ້ລະດູແລ້ງແຜນການຜະລິດແມ່ນ 7,13 ພັນເຮັກຕາ, ສາມາດປະຕິບັດໄດ້ 7,27 ພັນເຮັກຕາ, ທຽບໃສ່ແຜນການໄດ້ 101,86% ລື່ນແຜນການ 1,86%, ສະເລ່ຍຜະລິດຕະພາບ 10,68 ໂຕນຕໍ່ເຮັກຕາ ແລະ ຜົນຜະລິດໄດ້ 77,65 ພັນໂຕນ.    ສ່ວນການຜະລິດພືດຜັກລະດູຝົນປີນີ້, ນະຄອນຫຼວງວາງແຜນທັງໝົດ 3,93 ພັນເຮັກຕາ, ຄາດຄະເນຜະລິດຕະພາບສະເລ່ຍ 9,53 ໂຕນຕໍ່ເຮັກຕາຜົນຜະລິດໄດ້37,44 ພັນໂຕນ, ໃນນັ້ນເມືອງສີໂຄດຕະບອງ ເນື້ອທີ່ 406 ເຮັກຕາ, ໄຊເສດຖາ80 ເຮັກຕາ, ນາຊາຍທອງ 340 ເຮັກຕາ, ໄຊທານີ 979 ເຮັກຕາ, ຫາດ ຊາຍຟອງ1,16 ພັນເຮັກຕາ, ສັງທອງ 552 ເຮັກຕາ ແລະເມືອງປາກງື່ມ 410 ເຮັກຕາ, ມາຮອດປະຈຸບັນໃນຈຳນວນ 7 ເມືອງສາມາດປະຕິບັດໄດ້ແລ້ວ2,55 ພັນເຮັກຕາເທົ່າກັບ 65,09%.    ການປູກພືດຜັກ ແລະໝາກໄມ້ຕາມມາດຕະຖານກະສິກຳອິນຊີ, ກະສິກໍາທີ່ດີມາຮອດປະຈຸບັນທົ່ວນະຄອນຫຼວງມີທັງໝົດ 38 ກຸ່ມ, ໃນນັ້ນການປູກພືດຜັກແລະໝາກໄມ້ຕາມມາດຕະຖານກະສິກຳອິນຊີມີ 17 ກຸ່ມຄື: ເປັນກຸ່ມຜະລິດຂອງຊາວສວນ 11 ກຸ່ມ, 4 ບໍລິສັດ, 1 ກອງຜະລິດ ແລະ 1 ສູນມາດຕະຖານກະສິກຳສະ ອາດ, ລວມມີເນື້ອທີ່ມັງໝົດ 279 ເຮັກຕາ, ມີ 238 ຄອບຄົວ,ຜົນຜະລິດໄດ້ 2,91 ພັນໂຕນ,ໂດຍມີຕະຫຼາດຈຳໜ່າຍຮອງຮັບທັງໝົດ 7 ແຫ່ງເປັນຕົ້ນຕະຫຼາດອາຊີສູນການຄ້າລາວ-ໄອເຕັກ, ຕະຫຼາດກະສິກຳອິນຊີສະໂມສອນດອກປີກໄກ່ຫຼັກ 5, ຕະຫຼາດກະສິກຳອິນຊີສູນການຄ້າວຽງຈັນເຊັນເຕີ, ຕະຫຼາດກະສິກຳອິນຊີຫ້ວ ຍຫົງ, ຕະຫຼາດກະສິກຳອິນຊີດົງນາໂຊກ, ຕະຫຼາດກະສິກຳອິນຊີບ້ານຊ້າງຄູ່ ແລະຮ້ານຂາຍຜັກອິນຊີບ້ານສົມຫວັງເໜືອ.   ສະເພາະປີ 2018 ຜ່ານມາຜົນຜະລິດທັງໝົດໄດ້ 2,49 ພັນໂຕນ ແລະ ສ້າງມູນຄ່າເຂົ້າຕະຫຼາດຈຳນວນ 7 ຕື້ກີບ, ສຳລັບການປູກພືດຜັກ ແລະ ໝາກໄມ້ຕາມມາດຕະຖານກະສິກຳທີ່ດີມີທັງໝົດ 21 ກຸ່ມ, ໃນນັ້ນເປັນກຸ່ມຜະລິດຂອງຊາວສວນ 14 ກຸ່ມ, ຜູ້ປະກອບການ 6 ບໍລິສັດ ແລະ ອີກ 1 ສູນມາດຕະຖານກະສິກຳສະ ອາດລວມມີເນື້ອທີ່ 240 ເຮັກຕາ, ມີ 382 ຄອບຄົວ ແລະຜົນຜະລິດ 2,49 ພັນໂຕນ. 

Read more

ນາຍົກຢ້ຽມຢາມ ແລະຊຸກຍູ້ການພັດທະນາຢູ່ເມືອງວັງວຽງ

ໃນຕອນເຊົ້າວັນທີ 8 ສິງຫາ 2019  ທ່ານ ທອງລຸນ ສີສຸລິດ, ນາຍົກລັດຖະມົນຕີ, ພອ້ມດວ້ຍລັດຖະມົນຕີ, ຮອງລັດຖະມົນຕີກະຊວງກ່ຽວຂ້ອງ ແລະເຈົ້າແຂວງໆວຽງຈັນ ໄດ້ໄປຢ້ຽມຢາມ ແລະຊຸກຍູ້ການພັດທະນາເມືອງວັງວຽງໂດຍມີທ່ານ ຄຳຜອງ ດວງວິໄລ, ເຈົ້າເມືອງໆວັງວຽງ,ພ້ອມດ້ວຍຄະນະ ແລະພາກສ່ວນທີ່ກ່ຽວຂ້ອງໃຫ້ການຕ້ອນຮັບຢ່າງອົບອຸ່ນ.  ໃນໂອກາດດັ່ງກ່າວ, ທ່ານນາຍົກລັດຖະມົນຕີພ້ອມດ້ວຍຄະນະໄດ້ໄປຢ້ຽມຢາມ ແລະຕິດຕາມເບິ່ງຈຸດກໍ່ສ້າງສະຖານີ ລົດໄຟວັງວຽງ, ເຫັນວ່າ: ເສັ້ນທາງລົດໄຟລາວ-ຈີນຜ່ານແຂວງວຽງຈັນ ມີຄວາມຍາວທັງໝົດ 145 ກິໂລແມັດ, ຜ່ານ 4 ເມືອງ, 60 ບ້ານ, ມີຜູ້ໄດ້ຮັບຜົນກະທົບ 1.589 ຄອບຄົວ, ມາຮອດປະຈຸບັນໄດ້ໄກ່ເກ່ຍທີ່ດິນ ແລະສິ່ງກີດຂວາງການກໍ່ສ້າງທາງລົດໄຟສໍາເລັດ 99% ແລະ ສືບຕໍ່ດຳເນີນການຊົດເຊີຍໃຫ້ແກ່ປະຊາຊົນທີ່ໄດ້ຮັບຜົນກະທົບຈາກໂຄງການດັ່ງກ່າວສຳລັບສະ ຖານີລົດໄຟວັງວຽງແມ່ນຕັ້ງຢູ່ບ້ານຫ້ວຍສະເຫງົ້າ-ພູດິນແດງ, ຫ່າງຈາກເທດສະບານເມືອງວັງວຽງປະມານ 2 ກິໂລແມັດ, ຫ່າງຈາກເສັ້ນທາງເລກທີ 13 ເໜືອ 300 ແມັດ,ມີເນື້ອທີ່ທັງໝົດ 144 ກວ່າເຮັກຕາ, ສະເພາະເນື້ອທີ່ອາຄານສະຖານີ ມີ 5.000 ຕາແມັດ ແລະ ສາມາດຮອງຮັບຜູ້ໂດຍສານໄດ້ 600 ຄົນ ປະຈຸບັນໄດ້ສຳເລັດການອອກແບບ, ສຳເລັດການບຸກເບີກພື້ນທີ່ ແລະກະກຽມເພື່ອດຳເນີນການກໍ່ສ້າງຄາດວ່າຈະສໍາເລັດການກໍ່ສ້າງພາຍໃນປີ 2021. ໃນໂອກາດນີ້, ທ່ານນາຍົກລັດຖະມົນຕີໄດ້ເນັ້ນໜັກໃຫ້ຜູ້ພັດທະນາໂຄງການເອົາໃຈໃສ່ປະຕິບັດວຽກງານສຳເລັດຕາມແຜນການທີ່ວາງໄວ້ ແລະໃຫ້ມີຄຸນນະພາບ,ການກໍ່ສ້າງໃຫ້ເປັນໄປຕາມການອອກແບບທີ່ໄດ້ຮັບຮອງ,ສິ່ງສຳຄັນໂຄງສ້າງຕ່າງໆຕ້ອງໃຫ້ກົມກືນກັບທຳມະຊາດກໍ່ຄືແຫຼ່ງທ່ອງທ່ຽວຂອງເມືອງວັງວຽງ ຫຼັງຈາກນັ້ນ,ທ່ານນາຍົກລັດຖະມົນຕີພ້ອມດ້ວຍຄະນະໄດ້ໄປຢ້ຽມຢາມສູນບໍລິການເຕັກນິກກະສິກຳ ແລະໄດ້ຊີ້ນຳໃຫ້ສູນດັ່ງກ່າວເອົາໃຈໃສ່ການປູກພຶດປອດສານພິດ, ພືດລົ້ມລຸກໂດຍໃຫ້ຕິດພັນກັບການສົ່ງເສີມການທ່ອງທ່ຽວພ້ອມນີ້ໄດ້ຢ້ຽມຢາມສະຖານທີ່ທ່ອງທ່ຽວທຳມະຊາດ (ຖໍ້ານາງຟ້າ ແລະຖໍ້ານອນໂດຍໄດ້ເນັ້ນໃຫ້ຜູ້ພັດທະນາເອົາໃຈໃສ່ການອະ ນຸລັກທຳມະຊາດແລະຄວາມປອດໄພໃຫ້ແກ່ນັກທ່ອງທ່ຽວ).   ໃນຕອນບ່າຍຂອງວັນດຽວກັນ, ທ່ານນາຍົກລັດຖະມົນຕີໄດ້ໃຫ້ກຽດໂອ້ລົມຕໍ່ພະນັກງານຫັຼກແຫຼ່ງຂອງເມືອງວັງວຽງ, ພະນັກງານອະວຸໂສບຳນານແລະນັກທຸລະກິດຈຳນວນໜຶ່ງທີ່ສະໂມສອນ ຂອງເມືອງວັງວຽງ.. ກ່ອນອື່ນແມ່ນໄດ້ ຮັບຟັງການລາຍງານສະພາບການພັດ ທະນາເສດຖະກິດ-ສັງຄົມຂອງເມືອງ ໃນໄລຍະ6 ເດືອນຜ່ານມາ ຈາກທ່ານ ເຈົ້າເມືອງໆວັງວຽງ, ຊຶ່ງທົ່ວເມືອງຍັງສືບ ຕໍ່ມີຄວາມສະຫງົບ ແລະເປັນລະບຽບ ຮຽບຮ້ອຍໂດຍພື້ນຖານ, ເສດຖະກິດຂະຫຍາຍຕົວຢ່າງຕໍ່ເນື່ອງ, ດ້ານການສຶກສາ ແລະ ວັດທະນະທຳຕິດພັນກັບການພັດທະນາຊົນນະບົດ ແລະ ລຶບລ້າງຄວາມທຸກຍາກຂອງປະຊາຊົນກໍ່ນັບມື້ດີຂຶ້ນເປັນກ້າວໆ ຫຼັງຈາກນັ້ນ, ທ່ານນາຍົກລັດຖະມົນຕີໄດ້ສະເໜີໃຫ້ບັນດາທ່ານລັດຖະມົນຕີກະຊວງກ່ຽວຂ້ອງຊີ້ແຈງຕໍ່ບາງບັນຫາທີ່ທາງເມືອງສະເໜີ ແລະບາງບັນຫາພົ້ນເດັ່ນເປັນຕົ້ນການປ້ອງກັນ ແລະແກ້ໄຂການລະບາດຂອງພະຍາດໄຂ້ເລືອດອອກ; ການສົ່ງເສີມການຜະລິດກຳສິກຳອິນຊີ, ການປູກພືດປອດສານພິດຕິດພັນກັບການຊຸກຍູ້ສົ່ງເສີມການທ່ອງທ່ຽວ, ການຕິດຕາມເຝົ້າລະວັງການລະບາດຂອງພະຍາດອາຫິວາໝູອາຟຣິກາ; ການສ້າງ ແລະປັບປຸງເສັ້ນທາງເຂົ້າແຫຼ່ງທ່ອງທ່ຽວ ແລະການຊົດເຊີຍໃຫ້ປະຊາຊົນທີ່ໄດ້ຮັບຜົນກະທົບຈາກທາງລົດໄຟ.   ຕໍ່ການພັດທະນາຂອງເມືອງວັງວຽງ ໃນປະຈຸບັນ, ທ່ານນາຍົກລັດຖະມົນຕີໄດ້ມີຄຳເຫັນວ່າເມືອງວັງວຽງໄດ້ຮັບການພັດທະນາແລະມີຫຼາຍອັນປ່ຽນແປງໃໝ່, ແຕ່ເຖິງຢ່າງໃດກໍ່ຕາມຍັງມີບາງບັນຫາທີ່ຕ້ອງໄດ້ເອົາໃຈໃສ່ປັບປຸງແກ້ໄຂເປັນຕົ້ນການພັດທະນາເມືອງວັງວຽງຍັງບໍ່ທັນໄປຕາມຜັງເມືອງຢ່າງເຄັ່ງຄັດ, ຂາດການວາງແຜນພັດທະນາການທ່ອງທ່ຽວທີ່ດີ ແລະຍືນຍົງ, ບັນຫາລາຄາສິນຄ້າແລະຄ່າບໍລິການແພງ, ບັນຫາຄວາມສະອາດ, ຄວາມເປັນລະບຽບຮຽບຮ້ອຍ, ບັນຫາການຄຸ້ມຄອງການປ່ອຍນໍ້າເສຍລົງແມ່ນໍ້າ… ສະນັ້ນເພື່ອສືບຕໍ່ພັດທະນາເມືອງວັງວຽງໃຫ້ເປັນເມືອງທ່ອງທ່ຽວຢ່າງແທ້ຈິງ, ທ່ານນາຍົກລັດຖະມົນຕີໃຫ້ທິດຊີ້ນຳແກ່ການນຳຫຼັກແຫຼ່ງ ແລະພະນັກງານຂອງເມືອງວັງວຽງ ໃຫ້ເອົາໃຈໃສ່ຕື່ມບາງດ້ານເປັນຕົ້ນໃຫ້ເມືອງວັງວຽງກໍ່ຄືແຂວງວຽງຈັນ ຊອກໃຫ້ເຫັນທ່າແຮງແທ້ຈິງຂອງເມືອງວັງວຽງ ແລະນຳໃຊ້ທ່າແຮງດັ່ງກ່າວຢ່າງຖືກຕ້ອງ, ຍືນຍົງ ແລະມີປະສິດທິຜົນສູງ, ໃຫ້ກະຊວງກ່ຽວຂ້ອງສົມທົບກັບແຂວງວຽງຈັນ ສ້າງແຜນຜັງ ແລະຍຸດທະສາດການພັດທະນາເມືອງວັງວຽງເພື່ອເປັນບ່ອນອີງໃນການພັດທະນາ ແລະພິຈາລະນາອະນຸມັດໂຄງການ ຫຼືທຸລະກິດຕ່າງໆ; ເອົາໃຈໃສ່ຕິດຕາມ,ກວດກາ, ຄຸ້ມຄອງລາຄາສິນຄ້າ, ຄ່າທີ່ພັກ, ລາຄາອາຫານໃຫ້ຖືກຕ້ອງເໝາະສົມ, ບໍ່ໃຫ້ສູງເກີນຄວາມເປັນຈິງ; ສົ່ງເສີມການຜະລິດກະສິກຳສະອາດ ແລະ ປູກພືດປອດສານພິດ; ຕ້ອງເຂັ້ມງວດຕໍ່ການປົກປັກຮັກສາສິ່ງແວດລ້ອມ, ການປ່ອຍນໍ້າເປື້ອນ, ການຖິ້ມຂີ້ເຫຍື້ອຊະຊາຍ, ຕະຫຼອດຮອດການສ້າງຮ້ານບັນເທິງທີ່ບໍ່ຖືກຕ້ອງ, ບໍ່ແທດເໝາະກັບເງື່ອນໄຂຕົວ ຈິງ ແລະບໍ່ສອດຄ່ອງກັບລະບຽບການ; ສົ່ງເສີມການທ່ອງທ່ຽວຕິດພັນກັບການຊຸກຍູ້ການຜະລິດ ແລະໃຫ້ເອົາໃຈໃສ່ແກ້ໄຂບັນຫາທີ່ບໍ່ດີ ແລະເກີດຂຶ້ນຢູ່ເມືອງວັງ ວຽງໃນໄລຍະຜ່ານມາໃຫ້ຕົກໄປເປັນກ້າວໆ; ເອົາໃຈໃສ່ຕ້ານ,ສະກັດກັ້ນ ແລະແກ້ໄຂບັນດາປະກົດການຫຍໍ້ທໍ້ຕ່າງໆ ທີ່ເປັນສິ່ງທ້າທາຍຕໍ່ການປົກປັກຮັກສາ ແລະພັດທະນາເມືອງວັງວຽງໃຫ້ໄດ້ຢ່າງຂາດຕົວ; ເອົາໃຈໃສ່ພັດທະນາ ແລະປັບປຸງໂຄງລ່າງພື້ນຖານການທ່ອງທ່ຽວ, ປັບປຸງຍົກລະດັບຂີດຄວາມສາມາດດ້ານການບໍລິຫານ-ບໍລິການການທ່ອງທ່ຽວໃຫ້ດີຂຶ້ນເພື່ອໃຫ້ນັກທ່ອງທ່ຽວເຂົ້າມາປະທັບໃຈ ແລະ ສາມາດດຶງດູດນັກທ່ອງທ່ຽວຫຼາຍລະດັບດ້ວຍການໄປຖອດຖອນບົດຮຽນກັບຕ່າງປະເທດທີ່ມີຊື່ ສຽງດ້ານການທ່ອງທ່ຽວເພີ່ມປະສິດທິພາບ ແລະ ເພີ່ມທະວີການຄຸ້ມຄອງເມືອງວັງວຽງໃຫ້ເປັນເມືອງທຳມະຊາດແລະວັດທະນະທຳຢ່າງແທ້ຈິງ. ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

Read more

ສະຫຼອງ 52 ປີ ສ້າງຕັ້ງອາຊຽນ ແລະ 22 ປີ ລາວຈະເປັນສະມາຊິກ

  ວັນທີ 6 ສິງຫາ 2019 ທີ່ນະຄອນຫຼວງວຽງຈັນ ໄດ້ຈັດພິທີເອົາທຸງຊາດລາວ ແລະທຸງອາຊຽນຂຶ້ນສູ່ຍອດເສົາເນື່ອງໃນໂອກາດສະເຫຼີມສະຫຼອງວັນຄົບຮອບ 52 ປີແຫ່ງການສ້າງຕັ້ງອາຊຽນ (8 ສິງຫາ 1967- 8 ສິງຫາ 2019) ແລະຄົບຮອບ 22 ປີ ທີ່ ສປປ ລາວ ເຂົ້າເປັນສະມາຊິກອາຊຽນ (23 ກໍລະກົດ 1997-23 ກໍລະກົດ2019), ໂດຍເປັນປະທານຂອງ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດໂດຍມີພາກສ່ວນກ່ຽວຂ້ອງເຂົ້າຮ່ວມ.   ທ່ານ ສະເຫຼີມໄຊ ກົມມະສິດ ກ່າວວ່າ: ອາຊຽນໃນໄລຍະ 52 ປີຜ່ານມາໂດຍສະເພາະໃນປີ 2015 ໄດ້ປະກາດສ້າງຕັ້ງສະມາຄົມອາຊຽນ, ປະກອບດ້ວຍ 3 ເສົາຄໍ້າ: ການເມືອງຄວາມໝັ້ນຄົງ, ເສດຖະກິດ ແລະສັງຄົມ-ວັດທະນະທຳອັນໄດ້ປະກອບສ່ວນສຳຄັນເຂົ້າໃນການສ້າງສັນຕິພາບ, ສະຖຽນລະພາບ ແລະ ຄວາມວັດທະນາຖາ ວອນໃນພາກພື້ນ ແລະໃນໂລກ.   ອາຊຽນໃນນາມເປັນອົງການຈັດຕັ້ງພາກພື້ນລະຫວ່າງລັດຖະບານໄດ້ສືບຕໍ່ຮັດແໜ້ນການພົວພັນຮ່ວມມືລະຫວ່າງປະເທດສະມາຊິກອາຊຽນດ້ວຍກັນກໍ່ຄືການຮ່ວມມືພາຍນອກບົນພື້ນຖານຫຼັກການທີ່ກຳນົດໄວ້ໃນກົດບັນຍັດອາຊຽນ, ສົນທິສັນຍາໄມຕີຈິດການຮ່ວມມື ແລະ ບັນດາກົນໄກທີ່ອາຊຽນເປັນຜູ້ສ້າງຂຶ້ນເຊັ່ນ: ຫຼັກການແຫ່ງການຢູ່ຮ່ວມກັນໂດຍສັນຕິ, ເຄົາລົບເອກະລາດອະທິປະໄຕຜືນແຜ່ນດິນອັນຄົບຖ້ວນ, ການບໍ່ແຊກແຊງເຂົ້າໃນວຽກງານຂອງກັນ ແລະກັນ, ແກ້ໄຂບັນຫາໂດຍສັນຕິວິທີ, ຫຼັກການຄວາມເປັນເອກະສັນ ແລະຕ່າງຝ່າຍຕ່າງມີຜົນປະໂຫຍດ ແລະອີງໃສ່ຄວາມຫຼາກຫຼາຍຂອງປະເທດສະມາຊິກທີ່ເອີ້ນວ່າ: ວິຖີທາງຂອງອາຊຽນ (ASEAN WAY).   ຕະຫຼອດໄລຍະ 22 ປີ ທີ່ ສປປ ລາວ ເຂົ້າເປັນສະມາຊິກອາຊຽນ, ລາວໄດ້ເຂົ້າຮ່ວມຢ່າງຕັ້ງໜ້າໃນຂະບວນການລວມຂອງອາຊຽນອັນໄດ້ເຮັດໃຫ້ບົດບາດຂອງສປປ ລາວ ໃນພາກພື້ນ ແລະສາກົນນັບມື້ພົ້ນເດັ່ນຂຶ້ນພ້ອມກັນນັ້ນເຂດການຄ້າເສລີ ແລະການລົງທຶນອາຊຽນ ແລະອາຊຽນກັບບັນດາເປັນປະເທດຄູ່ເຈລະຈາໄດ້ປະກອບສ່ວນສຳຄັນໃນການເຮັດໃຫ້ການຄ້າ ແລະການລົງທຶນຢູ່ປະເທດເຮົາຂະຫຍາຍຕົວໃນຈັງຫວະສູງຂຶ້ນຢ່າງຕໍ່ເນື່ອງ. ຂຽນໂດຍ: ສອນມະນີ ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

Read more

ຈະລາຈອນອັດຕະປື ເລີ່ມໃຊ້ກ້ອງຈັບຄວາມໄວ

 ປະຕິບັດຕາມກົດລະບຽບຈະລາຈອນເພື່ອປົກປ້ອງສັງຄົມຜູ້ນຳໃຊ້ລົດໃຊ້ຖະໜົນມີສະຕິໃນການຂັບຂີ່ທັງຫຼີກເວັ້ນຜົນເສຍຫາຍແກ່ຊັບສິນຂອງສ່ວນລວມ, ບຸກຄົນກໍ່ຄືຮ່າງ ກາຍ, ສຸຂະພາບ ແລະຊີວິດຂອງຜູ້ຂັບຂີ່ປະຈຸບັນຕໍາຫຼວດຈະລາຈອນແຂວງອັດຕະປື ໄດ້ເລີ່ມຈັດຕັ້ງຈຸດກວດກາຢູ່ 3 ຈຸດ ເພື່ອຈັບຄວາມໄວຂອງລົດໂດຍນໍາໃຊ້ກ້ອງຈັບຄວາມໄວເພື່ອຫຼຸດຜ່ອນອຸບັດຕິເຫດ.   ໃນຫວ່າງບໍ່ດົນມານີ້ກອງບັນຊາການ ປກສ ແຂວງອັດຕະປື ໄດ້ອອກແຈ້ງການເຖິງບັນດາພະແນກການ, ຂະແໜງການທຽບເທົ່າ, ບັນດາເມືອງ, ອົງການຈັດຕັ້ງຕ່າງໆ, ບັນດາບຸກຄົນ, ນິຕິບຸກຄົນ, ພະນັກງານທະຫານຕຳຫຼວດ ແລະພໍ່ແມ່ປະຊາຊົນໃນທົ່ວແຂວງໄດ້ຮັບຊາບແລ້ວດັ່ງນັ້ນຈື່ງໄດ້ເລີ່ມຈັດຕັ້ງປະຕິບັດລະບົບການຕິດຕັ້ງຈັບຄວາມໄວຢູ່ 3 ຈຸດໃນເມືອງສາມັກຄີໄຊຄື: 1) ເສັ້ນທາງຖະໜົນຫຼວງ 1 (I) ເລີ່ມແຕ່ຫຼັກກິໂລແມັດທີ 9 ເຂດ ບ້ານກະຍືຫາປ້ອມຕຳຫຼວດຫຼັກ 7 ເປັນຈຸດກວດກາ; 2) ເສັ້ນທາງຖະໜົນຫຼວງ 18 B ເລີ່ມແຕ່ຫຼັກກິໂລແມັດທີ 4 ເຂດ ນາພອກຫາປ້ອມຕຳຫຼວດຈະລາຈອນນາພອກເປັນຈຸດກວດກາ; 3) ຈຸດກວດກາຈັບຄວາມໄວຂາອອກມີ 1 ຈຸດຄື: ເສັ້ນທາງຖະໜົນ 18 B ເລີ່ມແຕ່ຫຼັກກິໂລແມັດທີ 5 ເຂດຂົວພອກຫາເຂດ ບ້ານຄັນໝາກກ່ອງ ເມືອງໄຊເສດຖາເປັນບ່ອນຈຸດກວດກາ.  ອັດຕະປືແມ່ນອີກແຂວງໜຶ່ງທີ່ເກີດມີບັນຫາອຸບັດຕິເຫດທາງທ້ອງຖະໜົນຫຼາຍເຊັ່ນດຽວກັນໂດຍບັນຫາສ່ວນໃຫຍ່ແມ່ນມາຈາກການນໍາໃຊ້ຄວາມໄວຂອງຍານພາຫານະຍັງກວມເອົາອັດຕາສູງບັນດາຜູ້ນຳໃຊ້ລົດ, ໃຊ້ຖະໜົນຖືເບົາ, ຂາດສະຕິບໍ່ເຄົາລົບປະຕິບັດກົດລະບຽບຂອງຈະລາຈອນເຮັດໃຫ້ອຸບັດຕິເຫດເກີດຂຶ້ນຢ່າງຕໍ່ເນື່ອງຢູ່ໃນແຕ່ລະປີ. ຂຽນໂດຍ: ສາຍນໍ້າ ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

Read more
Copy Protected by Chetan's WP-Copyprotect.