ບຸນພະຈັນ ນັກເຕະອາຍຸນ້ອຍທີ່ສຸດໃນລາວພຣີເມຍລີກ

ບຸນພະຈັນ ບຸນກອງ ກາຍເປັນນັກເຕະທີ່ອາຍຸນ້ອຍທີ່ສຸດ ໃນການແຂ່ງຂັນບານເຕະລາວພຣີເມຍລີກ ຫຼັງຈາກທີ່ເຈົ້າຕົວເລື່ອນຂຶ້ນມາຫຼິ້ນໃນຊຸດໃຫຍ່ຂອງສະໂມສອນ ສະຫວັນ ຢູໄນເຕັດ ເມື່ອຕົ້ນລະດູການ 2015 ທີ່ຜ່ານມາ ດ້ວຍອາຍຸພຽງ 15 ປີເທົ່ານັ້ນ ແຕ່ວ່າສີຕີນນັ້ນບໍ່ເປັນຮອງລຸ້ນອ້າຍ ສາມາດສ້າງສີສັນໃຫ້ກັບແດນໜ້າ ແລະ ສ້າງຄວາມໜັກໃຈໃຫ້ຄູ່ແຂ່ງ ໂດຍສະເພາະກໍ່ແມ່ນໃນທີມຊາດລາວ ຮຸ່ນອາຍຸບໍ່ເກີນ 16 ປີເຈົ້າຕົວສ້າງຜົນງານໄດ້ຢ່າງໂດດເດັ່ນ ແລະ ເປັນທີ່ຮູ້ຈັກໃນລາຍການຊີງແຊັມອາຊຽນ ແລະ ຊີງແຊັມອາຊີ.

ບຸນພະຈັນ ເກີດວັນທີ 29 ພະຈິກປີ 2000 ສູງ 160 ຊັງຕີແມັດ ແລະ ໜັກ 50 ກິໂລກຣາມ ເກີດທີ່ບ້ານນາແກ ເມືອງໄກສອນພົມວິຫານ ແຂວງສະຫວັນນະເຂດ ເປັນລູກຊາຍຂອງ ທ່ານ ບຸນກອງ ແລະ ທ່ານ ນາງ ບຸນລັບ ມີນ້ອງຊາຍ 1 ຄົນ ອາຍຸ 13 ປີ ເຊິ່ງປັດຈຸບັນ ບຸນພະຈັນ ກໍາລັງຮຽນຢູ່ຊັ້ນມັດທະຍົມຕົ້ນ ຈອມແກ້ວ ຫ້ອງ ມ4 ຍອາຍຸພຽງ 15 ປີເທົ່ານັ້ນ ເຮັດໃຫ້ລາວກາຍເປັນນັກເຕະທີ່ອາຍຸນ້ອຍທີ່ສຸດ ໃນປະຫວັດບານເຕະລາວ ທີ່ຕິດຊຸດໃຫຍ່ໃນສະໂມສອນດັບລະລີກສູງສຸດຂອງປະເທດ.
ບຸນພະຈັນ ເລີ່ມຫຼິ້ນກີລາເຕະບານມາຕັ້ງແຕ່ນ້ອຍສະໄໝຮຽນປະຖົມ ດ້ວຍໃຈອັນຮັກມັກ ແລະ ຕິດພັນກັບກີລາຊະນິດນີ້ ເນື່ອງຈາກຜູ້ເປັນພໍ່ເຄີຍຫຼິ້ນມາກ່ອນ ແລະ ເຄີຍສ້າງຜົນງານໂດດເດັ່ນໄວ້ໃຫ້ກັບສະໂມສອນພາສີເຂດ 3 ແຂວງສະຫວັນນະເຂດ ເມື່ອໄລຍະ 7-8 ປີທີ່ຜ່ານມາ ເຊິ່ງພໍ່ເປັນແວ່ນແຍ່ງອັນດີສໍາລັບຕົນເອງ ຈົນມາເຖິງປີ 2007 ຕົວເອງໄດ້ຝຶກຊ້ອມກີລາຊະນິດນີ້ຢ່າງເປັນປະຈໍາ ຈົນກ້າວມາເຖິງສາມາດຕິດທີມໂຮງຮຽນຈອມແກ້ວ ແລະ ຕໍ່ມາກໍ່ພາທີມໂຮງຮຽນຍາດໄດ້ແຊັມລາຍການບານເຕະ 4 ເສົ້າ ( ລາຍການຊີງຂັນ 4 ແຂວງພາກໃຕ້ ). ຫຼ້າສຸດ ເມື່ອຕົ້ນປີທີ່ຜ່ານມາກໍ່ສາມາດພາທີມໂຮງຮຽນມັດທະຍົມຕົ້ນ ອຸທຸມພອນ ຄວ້າແຊັມບານເຕະໃນກີລານັກຮຽນ2016 ທີ່ເມືອງອຸທຸມພອນ ແຂວງສະຫວັນນະເຂດ.

ຫຼັງຈາກນັ້ນ ບຸນພະຈັນ ໄດ້ເຂົ້າຮ່ວມຄັດເລືອກໃນ ລຸ້ນອາຍຸບໍ່ເກີນ 16 ປີຂອງສະຫວັນເອຟຊີ ແລະ ທີມຊາດລາວ ຢູ16 ປີ ເມື່ອຕົ້ນປີ 2015 ທີ່ຜ່ານມາ ແລະ ຄູ່ຝຶກທັງສະໂມສອນ ສະຫວັນ ຢູໄນເຕັດ ແລະ ຄູຝຶກທີມຊາດ ເຫັນແວວ ແລະ ຄວາມສາມາດ ຈຶ່ງໄດ້ເອີ້ນມາເກັບຕົວຝຶກຊ້ອມກັບ ເພື່ອນຮ່ວມທີມຕັ້ງແຕ່ນັ້ນມາ. ຈາກເຫດການດັ່ງກ່າວສົ່ງຜົນໃຫ້ ບຸນພະຈັນ ກາຍນັກເຕະອາຍຸນ້ອຍທີ່ສຸດພຽງ 15 ປີໃນບານເຕະ ລາວພຣີເມຍລີກ ໂດຍເລີ່ມຕົ້ນຫຼິ້ນໃຫ້ກັບ ຊຸດເຍົາວະຊົນຂອງ ສະຫວັນ ຢູໄນເຕັດ ໃນໄລຍະບໍ່ເທົ່າໃດເດືອນ ເມື່ອຕົ້ນປີ 2015 ແຕ່ຄູຝຶກຂອງ ສະຫວັນ ເອຟຊີ ເຫັນແວວ ໄດ້ຈັບໃຫ້ລອງມາຫຼິ້ນໃນຊຸດໃຫຍ່ ລົງສະໜາມກັບຊຸດໃຫຍ່ນັດທໍາອິດນັດທີ່ເສຍໃຫ້ກັບ ຊ້າງນ້ອຍ 0-1 ຄ້າບ້ານເມື່ອເດືອນມີນາ 2015. ຢ່າງໃດກໍ່ຕາມ, ນັດດັ່ງກ່າວກໍ່ສ້າງຜົນງານໄດ້ຢ່າງໜ້າປະທັບໃຈແຟນບານຊາວແຂວງສະຫວັນນະເຂດ.
ໃນທີ່ສຸດ ບຸນພະຈັນ ໄດ້ເຂົ້າຮ່ວມຄັດເລືອກທີມຊາດລາວ ລຸ້ນອາຍຸບໍ່ເກີນ 16 ປີ ແລະ ກໍ່ຫຼິ້ນເຂົ້າຕາຫົວໜ້າຄູຝຶກຢ່າງ ທ່ານ ບຸນລັບ ເຄນກິຕິສັກ ລວມທັງຍັງເປັນ 1 ດຽວຂອງນັກເຕະຈາກສະໂມສອນ ສະຫວັນ ຢູໄນເຕັດ ທີ່ຕິດທີມຊາດຢູ 16 ປີນໍາອີກ .

ໃຊ້ເວລາບໍ່ດົນກໍ່ໄດ້ແຈ້ງເກີດຢ່າງເຕັມຕົວ ຫຼັງຈາກຍິງໄປທັງໝົດ 5 ປະຕູຈົນຊ່ວຍໃຫ້ທີມຊາດລາວ ສ້າງປະຫວັດສາດເຂົ້າເຖິງຮອບຮອງຊະນະເລີດ ໃນການແຂ່ງຂັນບານເຕະຊີງແຊັມອາຊຽນ ຢູ16 ທີ່ປະເທດກໍາປູເຈຍ ລະຫວ່າງເດືອນສິງຫາ-ເດືອນກັນຍາປີ 2015 ກ່ອນທີ່ຈະເສຍໃຫ້ກັບ ອົດສະຕຣາລີ ສົ່ງຜົນໃຫ້ໄດ້ອັນດັບ 4 ໄປຄອງ ແລະ ຫຼ້າສຸດຍິງໄດ້ 1 ປະຕູໃນການແຂ່ງຂັນບານເຕະຊີງແຊັມອາຊີ ຮອບຄັດເລຶອກ ທີລາວເປັນເຈົ້າພາບ ເມື່ອເດືອນກັນຍາປີ 2015 ທີ່ຜ່ານມາ ຈົນເຮັດໃຫ້ລາວຍິງປະຕູໃນນາມທີມຊາດໄປແລ້ວ 6 ປະຕູ.

ທີ່ມາ: ຫນັງສືພິມ ເສດຖະກິດ-ການຄ້າ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.