BUG 5 ທີມ​ຊາດ​ລາວ​ທຳ​ອິດຈະ​ເຂົ້າ​ແຂ່ງ­ຂັນ​ອີ​ເມ​ຈີນ​ຄັບລະ­ດັບ​ພາກ​ພື້ນ

ໄວ​ໜຸ່ມ​ລາວ​ກຳ­ລັງ​ສ້າງ​ປະ­ຫວັດ­ສາດ​ໜ້າໃໝ່​ໃຫ້ກັບປະ­ເທດ​ພາຍ­ຫຼັງ​ທີ່ 3 ໜຸ່ມ​ນັກ​ສຶກ​ສາວິ­ທະ­ຍາ­ສາດ​ຄອມ​ພິວ​ເຕີ​ຂອງ​ລາວ​ໄດ້​ເຂົ້າ​ຮອບ​ແຂ່ງ­ຂັນ​ຊີງ​ຊະ­ນະ​ເລີດ​ລະ­ດັບ​ພາກ​ພື້ນ​ທີ່​ຟີ​ລິບ​ປິນ ໂດຍ​ຜົນ­ງານ​ຂອງພວກ​ເຂົາຈະ​ມີ​ສ່ວນ​ຊ່ວຍ​ແກ້ໄຂ​ບັນ­ຫາ​ສຳ­ລັບ​ຜູ້​ພິ­ການ​ທາງ​ສາຍ­ຕາ​ໃຫ້​ສາມາດ​ນຳ​ໃຊ້​ສະ­ມາດ​ໂຟນຄື​ກັບ​ຄົນ​ທົ່ວ​ໄປ​ໄດ້.

ໂດຍ​ທັງ 3 ໜຸ່ມມີ​ຊື່​ທີມ​ວ່າ BUG5 ເປັນ​ທີມນັກ​ປະ­ດິດ​ໄວ​ໜຸ່ມ 3 ຄົນ ຈາກ​ປະ­ເທດລາວ​ທີ່​ໄດ້​ຮັບ​ການ​ຄັດ​ເລືອກ​ໃຫ້​ເປັນ​ຕົວ ແທນ​ຂອງ​ປະ­ເທດ​ລາວ​ເພື່ອ​ເຂົ້າ​ຮ່ວມ​ການ​ແຂ່​່ງ​ຂັນ Microsoft Imagine Cup 2017 ຄັ້ງ​ທີ 15 ຮອບ​ຊີງ​ຊະ­ນະ​ເລີດ​ປະ­ຈຳ​ພາກ​ພື້ນ​ອາ­ຊີ​ຕາ­ເວັນ​ອອກສຽງ​ໃຕ້, ໃນ​ໂຄງ­ການ​ເລັ່ງ​ສ້າງ​ວິ​ສາຫະ​ກິດ​ເລີ່ມ​ຕົ້ນ​ເພື່ອ​ການ​ເຕີບ​ໂຕ​ໃນ​ລະດັບ​ສາ­ກົນ, ສ້າງ​ຄວາມ​ເຂັ້ມ­ແຂງ​ໃຫ້​ນັກສຶກ​ສາ​ວິ­ທະ­ຍາ­ສາດ​ຄອມ​ພິວ​ເຕີ​ຮຸ່ນ​ໃໝ່ ນັກ​ສຶກ​ສາ​ກຸ່ມ​ນີ້​ຈະ​ສ້າງ​ປະ­ຫວັດ­ສາດໃນຖາ­ນະ​ປະ­ເທດ​ລາວ​ທີມ​ທຳ​ອິດ​ທີ່​ສາ­ມາດເຂົ້າ​ໄປ​ໃນ​ຮອບ​ຊີງ​ຊະ­ນະ​ເລີດ​ປະ­ຈຳ​ພາກ​ພື້ນ​ໃນ​ການ​ແຂ່ງ­ຂັນ Imagine Cup.

ທີມ BUG5 ສາ­ມາດ​ເອົາ​ຊະ­ນະຫຼາຍ​ທີມ​ຈາກ​ຫຼາຍ​ປະ­ເທດ​ເຊັ່ນ: ມຽນມາ, ກຳ­ປູ­ເຈຍ ແລະ​ ບຣູ​ໄນ ​ທີມ​ດັ່ງ­ກ່າວ​ຈະເຂົ້າ​ຮ່ວມ​ແຂ່ງ­ຂັນ​ຮອບ​ຊິງ​ຊະ­ນະ​ເລີດທີ່​ຈັດ​ຂຶ້ນ​ໃນ​ລະ­ດັບ​ພາກ​ພື້ນ​ທີ່​ປະ­ເທດຟິ​ລິບ​ປິນນັບ​ແຕ່​ວັນ​ທີ 23-27 ເມ­ສາ  2017 ນີ້ ຊຶ່ງ​ຜົນ­ງານ​ປະ­ດິດ​ສ້າງ​ຂອງ​ພວກ​ເຂົາຈະ​ມີ​ສ່ວນ​ຊ່ວຍ​ແກ້​ໄຂ​ບັນ­ຫາ​ສຳ­ລັບ​ຜູ້​ພິ­ການ​ທາງ​ສາຍ­ຕາ​ໃຫ້​ສາ­ມາດ​ນຳ​ໃຊ້​ສະ­ມາດ​ໂຟນ​ຄື​ກັບ​ຄົນ​ທົ່ວ​ໄປ​ໄດ້. ສ່ວນ​ທີມ​ທີ່​ໄດ້​ອັນ​ດັບ​ສອງ​ໄດ້­ແກ່​ທີມ Arcane ຈາກ​ປະ­ເທດ​ກຳ­ປູ­ເຈຍ ແລະ ທີມ​ທີ່​ສາມ​ຈາກ​ປະ­ເທດ​ບຼູ​ໄນ.

ສະ­ມາ­ຊິກ​ຂອງ​ທີມ​ລາວ​ທີ່​ຊະ­ນະ​ໄດ້ແກ່: ທ້າວ ທະ​ນົງ​ສິນ ຈັນ­ທະ​ຄາມ, ທ້າວ ຄັດ​ທະ​ພອນ ທະ​ນົງ​ສຸ​ເມືອງ​ໄຊ ແລະ​ທ້າວ ສາຍ​ພິນ ເພັດ​ອຳ­ພອນ, ທັງ​ໝົດ​ແມ່ນ​ນັກສຶກ​ສາ​ຈາກ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດຄະ­ນະ​ວິ­ສະ­ວະ­ກຳ​ສາດ, ພາກ​ວິ­ຊາ​ຄອມພິວ​ເຕີ ແລະ​ຂໍ້​ມູນ​ຂ່າວ­ສານ.

ຫົວ­ໜ້າ​ທີມ​ຊຶ່ງ​ແມ່ນ​ທ້າວ ທະ​ນົງ​ສິນ ຈັນ­ທະ​ຄາມ ໄດ້​ກ່າວ​ວ່າ: ອີງ​ຕາມ​ຂໍ້​ມູນ ທີ່​ໄດ້​ຈາກ​ອົງ­ການ​ອະ­ນາ­ໄມ​ໂລກ “ມີ​ປະມານ 285 ລ້ານ​ຄົນ​ທີ່​ມີ​ຄວາມ​ພິ­ການ ທາງ​ສາຍ­ຕາ, ປະ­ມານ 39 ລ້ານ​ຄົນ ຕາ­ບອດ ແລະ 246 ລ້ານ​ຄົນ​ທີ່​ມີ​ຄວາມສາ­ມາດ​ທາງ​ວິ­ໄສ​ທັດ​ຕ່ຳ ຊຶ່ງ​ພວກ​ເຂົາດຳ­ລົງ​ຊີ­ວິດ​ໂດຍ​ປາ­ສະ­ຈາກ​ການ​ເບິ່ງ​ເຫັນ ຖ້າ​ບໍ່​ສາ­ມາດ​ເຫັນ​ໂລກ​ໄດ້, ໝາຍຄວາມ​ວ່າ​ພວກ​ເຂົາ​ຈະ​ມີ​ຄວາມ​ຫຍຸ້ງຍາກ​ໃນ​ການ​ໃຊ້​ຊີ­ວິດ​ປະ­ຈຳ​ວັນ​ສະ­ມາດໂຟນ​ບໍ່​ໄດ້​ອອກ​ແບບ​ມາ​ສຳ­ລັບ​ຄົນ​ທີ່​ມີຄວາມ​ບົກ­ພ່ອງ​ທາງ​ການ​ເບິ່ງ​ເຫັນ​ພວກເຮົາ​ຈິ່ງ​ຢາກ​ຫາ​ທາງ​ອອກ​ໃຫ້​ຜູ້​ພິ­ການດ້ວຍ​ການ​ນຳ​ໃຊ້​ເຕັກ​ໂນ​ໂລ​ຊີ​ສຳ­ລັບ​ຄົນ ພິ­ການ​ທາງ​ສາຍ­ຕາ ເພື່ອ​ໃຫ້​ພວກ​ເຂົາ ສາ­ມາດ​ນຳ​ໃຊ້​ສະ­ມາດ​ໂຟນ​ຄື ກັບ​ຄົນ ອື່ນໆ.”

ໂດຍ​ການ​ແຂ່ງ­ຂັນ​ຄັ້ງ​ນີ້ 10 ທີມ​ທີ່ ຊະ­ນະ​ທີ່​ມາ​ຈາກ​ແຕ່​ລະ​ປະ­ເທດ​ຄື: ອິນໂດ​ເນ​ເຊຍ, ມາ​ເລ​ເຊຍ, ຟິ​ລິບ​ປິນ, ໄທ, ຫວຽດ­ນາມ, ສີ​ລັງ­ກາ, ເນ​ປານ, ລາວ ແລະ​ບັງ​ກະ­ລາ​ເທດ​ຈະ​ເຂົ້າ​ຮ່ວມ​ແຂ່ງຂັນ​ທີ່ນະ­ຄອນ­ຫຼວງ​ມະ­ນີ​ລາ, ປະ­ເທດ​ຟິລິບ​ປິນ ຈາກ​ນັ້ນ 7 ທີມ​ທຳ​ອິດ​ທີ່​ເຂົ້າຮອບ​ໃນ​ການ​ແຂ່ງ­ຂັນ​ຂັ້ນ​ພາກ​ພື້ນ​ອາ­ຊີຕາ­ເວັນ​ອອກ​ສ່ຽງ​ໃຕ້​ຈະ​ໄດ້​ເຂົ້າ​ໄປ​ແຂ່ງ​ລະ­ດັບ​ໂລກ.

ທ່ານ ມີ​ເຊລ ໄຊ​ມອນ, ຜູ້​ບໍ­ລິ­ຫານ​ຕະຫຼາດ​ໃໝ່​ອາ­ຊີ​ຕາ­ເວັນ​ອອກ​ສ່ຽງ​ໃຕ້ Microsoft APAC ກ່າວ​ວ່າ: “Imagine Cup ເປັນ​ໂຄງ­ການ​ທີ່​ສຳ­ຄັນ​ເພື່ອ ຝຶກ​ນັກ​ປະ­ດິດ​ໄວ​ໜຸ່ມ​ຜູ້​ມີ​ພອນ​ສະ­ຫວັນ ແລະ​ເນັ້ນ​ໃຫ້​ເຫັນ​ເຖິງ​ການ​ແກ້​ໄຂ​ບັນ­ຫາທີ່​ແປກ​ໃໝ່​ຕາມ​ຄວາມ​ໄຝ່​ຝັນ​ຂອງ​ພວກ ເຂົາ​ທີ່​ຢາກ​ຈະ​ປ່ຽນ­ແປງ​ໂລກ​ຕະ­ຫຼອດໄລ­ຍະ​ການ​ດຳ­ເນີນ​ການ​ຄັດ​ເລືອກ​ໃນ ການ​ແຂ່ງ­ຂັນ Imagine Cup ໃນ​ແຕ່ລະ​ປີ, ພວກ​ເຮົາ​ໄດ້​ຮັບ​ແຮງ​ບັນ­ດານ​ໃຈ ຈາກ​ຄວາມ​ຄິດ​ປະ­ດິດ​ສ້າງ, ພອນ​ສະ ຫວັນ, ທັກ​ສະ ແລະ​ວິ­ໄສ​ທັດ​ທີ່​ອອກ​ມາ ຈາກ​ນັກ​ສຶກ​ສາ​ຮຸ່ນ​ໜຸ່ມ​ຂ້າ­ພະ­ເຈົ້າ​ມີຄວາມ​ດີ­ໃຈ​ທີ່​ປີ​ນີ້​ພວກ​ເຮົາ​ໄດ້​ທີມ​ຊະ­ນະເລີດ​ຈາກ​ປະ­ເທດ​ລາວ ຊຶ່ງ​ເປັນ​ຄັ້ງ​ທຳອິດ​ທີ່​ປະ­ເທດ​ລາວ​ຈະ​ໄດ້​ເຂົ້າ​ຮ່ວມ​ແຂ່ງຂັນ​ກັບ​ອີກ 9 ທີມ​ຈາກ​ປະ­ເທດ​ຕ່າງໆ​ໃນ ພາກ​ພື້ນ​ຂ້າ­ພະ­ເຈົ້າ​ຂໍ​ອວຍ­ພອນ​ໃຫ້​ທີມ BUG5 ແລະ​ທີມ​ອື່ນໆ​ຈົ່ງ​ປະ­ສົບ​ຜົນ​ສຳ ເລັດ​ໃນ​ການ​ແຂ່ງ­ຂັນ​ຮອບ​ຊິງ​ຊະ­ນະ​ເລີດປະ­ຈຳ​ພາກ​ພື້ນ​ອາ­ຊີ​ຕາ­ເວັນ​ອອກ​ສ່ຽງ​ໃຕ້.”

ໃນ​ປີ​ນີ້, ຄາດ​ວ່າ​ມີ​ຫຼາຍ​ກວ່າ 100 ປະ­ເທດ​ທີ່​ໄດ້​ແຂ່ງ­ຂັນ​ກັນ​ໃນ​ຮອບ​ຕ່າງໆ ແລະ30 ທີມ​ທຳ​ອິດ​ຈາກ​ທົ່ວ​ໂລກ​ຈະ​ໄດ້ ເຂົ້າ​ໄປ​ແຂ່ງ­ຂັນ​ໃນ​ຮອບ​ຊິງ​ແຊ້ມ​ໂລກ​ທີ່ Redmond ການ​ແຂ່ງ­ຂັນ Microsoft Imagine Cup ເປັນ​ການ​ແຂ່ງ­ຂັນ​ລະ­ດັບ ໂລກ​ທີ່​ມີ​ເປົ້າ​ໝາຍ​ສ້າງ​ຄວາມ​ເຂັ້ມ­ແຂງໃຫ້​ນັກ​ສຶກ​ສາ​ວິ­ທະ­ຍາ­ສາດ​ຄອມ​ພິວ​ເຕີຮຸ່ນ​ໃໝ່​ໄດ້​ນຳ​ໃຊ້​ຄວາມ​ສາ­ມາດ, ຄວາມຄິດ​ປະ­ດິດ​ສ້າງ, ຄວາມ​ມັກ ແລະ​ຄວາມຮູ້​ຂອງ​ຕົນ​ກ່ຽວ​ກັບ​ເຕັກ​ໂນ​ໂລ​ຊີ​ມາ​ສ້າງເປັນ​ແອບ​ພີ​ເຄ​ຊັນ ເພື່ອ​ຊ່ວຍ​ປ່ຽນ­ແປງ​ວິຖີ​ການ​ໃຊ້​ຊີ​ວີດ​ການ​ເຮັດ​ວຽກ ແລະ​ການຫຼິ້ນ​ຂອງ​ຄົນ​ໃນ​ແຕ່​ລະ​ປີ​ມີ​ນັກ­ຮຽນ​ຫຼາຍກວ່າ 10.000 ຄົນ​ຈາກ​ຫຼາຍ​ປະ­ເທດ​ໃນທົ່ວ​ໂລກ​ໄດ້​ເຂົ້າ​ຮ່ວມ​ແຂ່ງ­ຂັນ​ເພື່ອ​ຊີງເງິນ​ລາ­ງວັນລາ­ງວັນ​ທ່ອງ​ທ່ຽວ ແລະ ລາ­ງວັນ​ອື່ນໆ ແລະ​ກໍ​ເພື່ອ​ຄວ້າ​ເອົາ​ລາງວັນ​ກຽດ­ຕິ­ຍົດ Imagine Cup ກັບ​ບ້ານ.

ເປັນ​ເວ­ລາ​ຫຼາຍ​ປີ​ມາ​ແລ້ວ​ທີ່​ການ ແຂ່ງ­ຂັນ​ດັ່ງ­ກ່າວ ໄດ້​ກາຍ­ເປັນ​ເວ­ທີ​ສ້າງ ນັກ​ປະ­ດິດ ແລະ​ນັກ­ທຸ­ລະ­ກິດ​ໜຸ່ມ​ເພື່ອ​ໃຫ້ ເຂົາ​ໄດ້​ໃຊ້​ຄວາມ​ຄິດ​ຂອງ​ຕົນ​ເອງ​ແລ້ວນຳ­ໄປ​ໃຊ້​ໃນ​ອະ­ນາ­ຄົດ​ມັນ​ໄດ້​ກາຍ­ເປັນ ໂຄງ­ການ​ໃຫຍ່​ທີ່​ສຸດ​ອັນ​ໜຶ່ງ​ຂອງ​ໂລກ ໂດຍ​ການ​ສະ­ໜັບ­ສະ­ໜູນ​ຂອງ​ໄມ​ໂຄຊອບ ຊຶ່ງ​ໜຶ່ງ​ໃນ​ນະ​ວັດ­ຕະ​ກຳ​ເຕັກ​ໂນ​ໂລຊີ​ຍັກ​ໃຫຍ່​ຂອງ​ໂລກ.

ໂດຍ: ຈັນ​ສີ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.