ສະກັດກັກລົດກະບະວີໂກ້ຂົນສົ່ງກັນຊາ

ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ກອງບັນຊາການ ປກສ ແຂວງບໍລິຄຳໄຊ ໄດ້ນຳກຳລັງວິຊາສະເພາະລົງສະກັດກັກລົດເປົ້າໝາຍຂົນສົ່ງກັນຊາຢູ່ເສັ້ນທາງເລກ 13 ໃຕ້ ເຂດບ້ານຫ້ວຍສຽດ ເມືອງປາກຊັນ ໃນວັນທີ 25 ເມສາ 2016 ຜ່ານມາ ຜ່ານການຕິດຕາມຂອງເຈົ້າໜ້າທີ່ ສາມາດກັກລົດກະບະວີໂກ້ ພ້ອມກັນຊານ້ຳໜັກ 209 ກິໂລກຣາມ ແລະ ກັກຕົວຜູ້ຖືກຫາ 2 ຄົນ ມາສອບສວນຂະຫຍາຍຜົນ.

ເຈົ້າໜ້າທີ່ ປກສ ແຂວງບໍລິຄຳໄຊ ໃຫ້ຮູ້ວ່າ: ທັງສອງຄົນທີ່ຖືກກັກຕົວຄັ້ງນີ້ ຊື່ທ້າວ ຕົວຊົ່ງ ອາຍຸ 32 ປີຢູ່ບ້ານນ້ຳເດີນ ເມືອງຄຳເກີດ ແລະ ທ້າວ ເຕັ້ງ ຊົ່ງ ອາຍຸ 26 ປີຢູ່ບ້ານທົ່ງນາມີ ເມືອງປາກກະດິງ ແຂວງບໍລິຄຳໄຊ ໂດຍພວກກ່ຽວຮັບສາລະພາບໃນເບື້ອງຕົ້ນວ່າ: ເວລາປະມານ 21:00 ໂມງຂອງມື້ເກີດເຫດ ພວກກ່ຽວທັງສອງໄດ້ຂັບຂີ່ລົດກະບະວີໂກ້ໄປເອົາກັນຊາ ຈຳນວນ 209 ກິໂລກຣາມ ຢູ່ບ້ານຜາຂອດ ເມືອງວຽງທອງ ແຂວງບໍລິຄຳໄຊ ແລ້ວເອົາມາຂາຍຢູ່ທີ່ເມືອງປາກຊັນ ແຕ່ຖືກເຈົ້າໜ້າທີ່ກັກຕົວໄດ້ກ່ອນ.

ເຈົ້າໜ້າທີ່ຍັງໃຫ້ຮູ້ຕື່ມວ່າ: ພາຍຫຼັງໄດ້ຮັບລາຍງານຈາກພົນລະເມືອງດີ ວ່າຈະມີການເຄື່ອນໄຫວຂົນສົ່ງຢາເສບຕິດ (ປະເພດກັນຊາ) ເຂົ້າມາໃນຂອບເຂດເມືອງປາກຊັນ ຈຶ່ງໄດ້ນຳກຳລັງລົງຕິດຕາມ ຈົນຮອດເວລາ 20:00 ໂມງຂອງວັນທີ 25 ເມສາ 2016 ໄດ້ພົບເຫັນລົດກະບະທີ່ຖືກສົງໄສ ຂັບຂີ່ດ້ວຍຄວາມໄວມຸ່ງໜ້າໄປທາງເມືອງປາກຊັນ ຈຶ່ງໄດ້ຕິດຕາມໄປຮອດເຂດບ້ານຫ້ວຍສຽດ ເມືອງປາກຊັນ ຈຶ່ງໄດ້ເຂົ້າກັກລົດຄັນດັ່ງກ່າວ ພ້ອມທັງກັນຊາ ແລະ ຜູ້ຂັບຂີ່ 2 ຄົນ ມາດຳເນີນຄະດີຕາມຂັ້ນຕອນຂອງກົດໝາຍ.

ທີ່ມາ: ນສພ ວຽງຈັນໃໝ່

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.