ສາທາເນັ້ນສະຫວັນ ກຽມຮັບມືຫຼັງນໍ້າລົງ

 ໃນວັນທີ 26 ກັນຍາຜ່ານມາ, ທ່ານ ບຸນກອງ ສີຫາວົງ ລັດຖະມົນ ຕີກະຊວງສາທາລະນະສຸກພ້ອມຄະນະໄດ້ລົງຢ້ຽມຢາມ ແລະໃຫ້ກຳລັງໃຈຕໍ່ພໍ່ແມ່ປະຊາຊົນໃນເຂດທີ່ໄດ້ຮັບຜົນກະທົບຈາກໄພນໍ້າຖ້ວມ ແລະຕິດຕາມຊຸກຍູ້, ພ້ອມທັງໃຫ້ທິດຊີ້ນຳຕໍ່ຂະແໜງການສາທາລະນະສຸກໃນການຮັບມືກັບບັນຫາສຸຂະພາບຂອງພໍ່ແມ່ປະຊາ ຊົນທີ່ອາດຈະເກີດຂຶ້ນຈາກສະພາບຂອງນໍ້າຖ້ວມຫຼຸດລົງ.   ແຂວງສະຫວັນນະເຂດ ແມ່ນແຂວງ ໜຶ່ງໄດ້ຮັບຜົນກະທົບຕໍ່ສະພາບໄພນ້ຳ ຖ້ວມ ມີ 10 ເມືອງ 1 ນະຄອນ ແລະກວມເອົາປະຊາຊົນຫຼາຍກວ່າ 1 ແສນຄົນ ທີ່ໄດ້ ຮັບຜົນກະທົບຈາກສະພາບນ້ຳຖ້ວມ, ໃນນັ້ນ ຊົນນະບູລີເປັນເມືອງໜຶ່ງທີ່ໄດ້ ຮັບຜົນກະທົບຢ່າງໜັກເຮັດໃຫ້ມີຜົນ ເສຍຢ່າງຫຼວງຫຼາຍ, ມີ 48 ບ້ານຖືກ ຜົນກະທົບ ກວມເອົາປະຊາຊົນ 34 ພັນ ຄົນ, ວິດຖ່າຍເສຍຫາຍ 2,2 ພັນແຫ່ງ, ນ້ຳສ້າງ 175 ບໍ່, ນ້ຳບາດານ 47ແຫ່ງ ແລະສຸກສາລາ 3 ແຫ່ງ ຕໍ່ສະພາບດັ່ງ ກ່າວໄດ້ສົ່ງຜົນເສຍຫາຍພາຍຫຼັງນ້ຳ ຖ້ວມຫຼຸດລົງເຊັ່ນ: ສະພາບຂາດນ້ຳດື່ມນ້ຳໃຊ້ທີ່ສະອາດ, ຂາດສຸຂະອະນາໄມ, ສະຖານທີ່ບໍລິການສຸຂະພາບ ແລະອຸປະກອນຈຳນວນໜຶ່ງເສຍຫາຍເຮັດໃຫ້ມີບັນ ຫາຕໍ່ການປິ່ນປົວ ແລະອາດສົ່ງຜົນໃຫ້ ເກີດພະຍາດລະບາດຂຶ້ນໄດ້.   ໂອກາດທີ່ໄດ້ລົງມາຕິດຕາມຊຸກຍູ້ໃນ ຄັ້ງນີ້ ທ່ານ ບຸນກອງ ສີຫາວົງ ໄດ້ມີທິດ ຊີ້ນຳຕໍ່ຂະແໜງການສາທາລະນະສຸກໂດຍໃຫ້ເອົາໃຈໃສ່ຕໍ່ວຽກງານປ້ອງກັນພະຍາດບໍ່ໃຫ້ເກີດການລະບາດ ແລະວາງມາດຕະການໃນການຕອບໂຕ້ຢ່າງຮີບດ່ວນ ແລະຕໍ່ເນື່ອງ, ໃຫ້ທີມແພດກຽມພ້ອມໃນການໃຫ້ການບໍລິການປະຊາຊົນ 24 ຊົ່ວໂມງ, ໃຫ້ສູນນ້ຳສະອາດຜະລິດ ນ້ຳສະອາດ ເພື່ອສະໜອງໃຫ້ພໍ່ແມ່ປະຊາ ຊົນໄດ້ມີນ້ຳສະອາດໃຊ້ຢ່າງພຽງພໍ, ສ້ອມ ແປງສຸຂະພິບານໃຫ້ມານຳໃຊ້ໃຫ້ເປັນ ປົກກະຕິໂດຍໄວ, ໃຫ້ສືບຕໍ່ເຝົ້າລະວັງບັນດາພະຍາດລະບາດ, ສຸມໃສ່ວຽກງານສຸຂະສຶກສາທຳຄວາມເຂົ້າໃຫ້ແກ່ພໍ່ແມ່ປະຊາຊົນໃນການຮັກສາສຸຂະພາບ ແລະ ສຸຂະອະນາໄມ, ນອກຈາກນັ້ນ ເພິ່ນຍັງໄດ້ເນັ້ນໜັກໃນການປ້ອງກັນພະຍາດ ໄຂ້ຍຸງລາຍທີ່ຍັງລະບາດໜັກ ໂດຍສະ ເພາະໃນແຂວງສະຫວັນນະເຂດທີ່ມີອັດຕາການລະບາດສູງ, ໃຫ້ສົມທົບກັບອໍານາດການປົກຄອງ ແລະພໍ່ແມ່ປະຊາຊົນໃນການທໍາລາຍແຫຼ່ງເພາະພັນຍຸງລາຍ, ປ້ອງກັນບໍ່ໃຫ້ຍຸງກັດ ແລະໃຫ້ໄປພົບແພດໝໍຫາກມີອາການໄຂ້ຢ່າງຮີບດ່ວນເພື່ອປ້ອງກັນການເສຍຊີວິດຈາກໄຂ້ຍຸງລາຍ.  ໃນການລົງຢ້ຽມຢາມແຂວງສະຫວັນນະເຂດຄັ້ງນີ້, ທ່ານລັດຖະມົນຕີກະຊວງສາທາລະນະສຸກພ້ອມດ້ວຍຄະນະກໍຍັງໄດ້ລົງຢ້ຽມຢາມໃຫ້ກຳລັງໃຈພໍ່ແມ່ປະຊາຊົນ ແລະພະນັກງານແພດໝໍຜູ້ທີ່ພວມປະຕິບັດໜ້າທີ່ໃນການຊ່ວຍເຫຼືອປະຊາຊົນໃນເຂດໄພນຳຖ້ວມຢ່າງໃກ້ຊິດ ແລະ ໄດ້ມອບຢາພື້ນຖານຈຳນວນໜຶ່ງໃຫ້ແກ່ຫ້ອງການສາທາເມືອງຊົນນະບູລີ ເພື່ອຮອງຮັບການ ແລະໃຫ້ບໍລິການການເຈັບເປັນຂອງປະຊາຊົນອີກດ້ວຍ. ນສພ ເສດຖະກິດ-ສັງຄົມ

Read more

8 ບ້ານ ເມືອງນາຊາຍທອງຖືກນໍ້າຖ້ວມການສັນຈອນທາງ 13 ເໜືອຕິດຂັດຫຼາຍຊົ່ວໂມງ

ຈາກຝົນຕົກຕິດຕໍ່ກັນຫຼາຍວັນເຮັດໃຫ້ຫຼາຍພື້ນທີ່ຕໍ່າເກີດມີນໍ້າຖ້ວມຂັງບ້ານເຮືອນປະຊາຊົນ, ເສັ້ນທາງເປ່ເພເຊາະຂາດການສັນຈອນໄປ-ມາເກີດມີອຸປະສັກຫຍຸ້ງຍາກຕິດຂັດເຊັ່ນດຽວກັນກັບຢູ່ເມືອງນາຊາຍທອງນະຄອນຫຼວງວຽງຈັນ ໃນບໍ່ດົນມານີ້ເກີດນໍ້າ ຖ້ວມຂັງຢູ່ຕາມເສັ້ນທາງທີ 13 ເໜືອ ກວມເອົາ 8 ບ້ານ ໃນນັ້ນວັນທີ 26 ສິງຫາ ຢູ່ຈຸດກິໂລແມັດ 21-22 ມີນໍ້າຖ້ວມ ແລະ ໄຫຼແຮງ ສູງ 50 ຊັງຕີແມັດ ຍາວປະມານ 150 ແມັດ ເຮັດໃຫ້ເກີດການສັນຈອນໄປມາຫຍຸ້ງຍາກລົດຕິດແຖວຍາວແຕ່ເວລາ 15:00 ໂມງຫາ 24:00 ໂມງ.   ທ່ານ ບຸນເຮືອງ ແສງພົມມະຈັນ ຫົວໜ້າຫ້ອງການໂຍທາທິການ ແລະຂົນສົ່ງເມືອງນາຊາຍທອງ ໃຫ້ຮູ້ວ່າ: ສະພາບນໍ້າຖ້ວມຂັງຢູ່ຕາມເສັ້ນທາງ 13 ເໜືອ ເມືອງນາຊາຍທອງ ແມ່ນເກີດຂຶ້ນແຕ່ວັນທີ 25-27 ສິງຫາ 2019 ໃນນັ້ນ ກິໂລແມັດ 14-15 ນໍ້າຖ້ວມຂັງສູງ 30 ຊັງຕີແມັດ ປະມານ 200 ແມັດ ແລະ ກິໂລແມັດ 18-19 ນໍ້າໄຫຼຂ້າມທາງສູງ 30 ຊັງຕີແມັດ ປະມານ 150 ແມັດ ການສັນຈອນຕິດບາງຄັ້ງຄາວ; ສ່ວນກິໂລແມັດ 21-22 ນໍ້າຖ້ວມ 2 ຈຸດ ທາງເຂົ້າດ່ານຊີສູງ 50 ຊັງຕີແມັດປະມານ150 ແມັດ ນໍ້າໄຫຼແຮງການໄປມາຫຍຸ້ງຍາກລົດຕິດແຖວຍາວແຕ່ເວລາ 15 ໂມງ ຂອງວັນທີ 26 ສິງຫາ ຈົນຮອດເວລາ 24 ໂມງ; ກິໂລ ແມັດ 22-23 ຈຸດທາງຂຶ້ນທາງດ່ວນຖ້ວມທາງປະມານ 20 ຊັງຕີແມັດ ນໍ້າໄຫຼຂ້າມທາງລົດສາມາດໄປມາໄດ້ແຕ່ຕ້ອງໄດ້ເອົາລົດຈົກຕັດທາງດ່ວນ; ກິໂລແມັດ 30-31 ນໍ້າໄຫຼຂ້າມທາງຜົນກະທົບຈາກໂຄງການທາງລົດໄຟ.   ສ່ວນທາງເທສະບານເມືອງເສັ້ງທາງດົງຫຼວງ-ໂພນແກ້ວ-ໂພນສະຫວັນ ນໍ້າຖ້ວມສູງປະມານ 300 ແມັດ ເລິກ 50 ຊັງຕີແມັດລົດຕໍ່າບໍ່ສາມາດຜ່ານໄດ້;ທາງ 13 ຫາ ແຫຼ່ງທ່ອງທ່ຽວຕາດຊອນ ກໍເກີດນໍ້າຖ້ວມໂຮງຮຽນບ້ານນາຍາງ, ນາຊອນ ແລະບ້ານຫົວຂົວ, ນອກນີ້ ຍັງມີຜົນກະທົບຈາກໂຄງການກໍ່ສ້າງທາງດ່ວນຊຶ່ງເກີດມີນໍ້າຖ້ວມຢູ່ ກິໂລແມັດ 11 ແລະກິໂລແມັດ 21 ຄື: ບ້ານໜອງຄັນຄູນໍ້າຖ້ວມເຮືອນປະຊາຊົນ 4 ຫຼັງປະຈຸບັນໄດ້ນໍາໃຊ້ລົດຈົກຕັດທາງແລ້ວແຕ່ຍັງບໍ່ທັນແຫ້ງ ແລະ ມີນໍ້າຖ້ວມໜອງປາທີ່ຫ້ວຍຫຸມ.   ສັງລວມແລ້ວທົ່ວເມືອງນາຊາຍທອງ ມີນໍ້າຖ້ວມຂັງທັງໝົດ 8 ບ້ານຄື: ບ້ານຫົວຊ້າງ, ຫົວຂົວ, ນາຊອນ, ນາຍາງ, ໜອງຄັນຄູ, ຜາງແຫ້ງ, ນາລຽນ ແລະບ້ານ ນາຊາຍທອງເໜືອ, ສ່ວນວິທີແກ້ໄຂອົງການປົກຄອງບ້ານສົມທົບກັບ ປກສ, ປກຊ, ກຸ່ມບ້ານ ໄດ້ຊ່ວຍເຫຼືອລະບາຍລົດຕາມລຽບທາງຫຼວງ, ຈຸດນໍ້າຖ້ວມໄດ້ຊ່ວຍຄອບ ຄົວຜູ້ຖືກຜົນກະທົບຢູ່ບ້ານໜອງຄັນຄູ ຈໍານວນ4 ຄອບຄົວ ແລະພາຍຫຼັງນໍ້າບົກແຫ້ງແລ້ວຈະບູລະນະສ້ອມແປງເສັ້ນທາງໃຫ້ຢູ່ສະພາບປົກກະຕິ, ສ່ວນລາຍລະອຽດຜົນເສຍຫາຍແມ່ນຍັງບໍ່ທັນມີການຄິດໄລ່, ສະເພາະເສັ້ນທາງ 13 ເໜືອ ແມ່ນຖືກນໍ້າເຊາະເປ່ເພຫຼາຍຈຸດ. ຂຽນໂດຍ: ແປ ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

Read more

ຊາຍແດນລາວ-ກຳປູເຈຍ ເຄັ່ງຕຶງເປັນພຽງຂ່າວປອມ

   ຈາກຂ່າວທີ່ແຜ່ກະຈາຍຕາມສື່ສັງຄົມອອນລາຍໃນອາທິດທີ່ຜ່ານມາກ່ຽວກັບສະຖານະການຄວາມເຄັ່ງຕຶງໃນບໍລິເວນຊາຍແດນລາວ-ກຳປູເຈຍ ເຂດຍອດເຊລຳເພົາເບື້ອງລາວທີ່ຂຶ້ນກັບເມືອງມູນລະປະໂມກ ແຂວງຈຳປາສັກ ແລະເບື້ອງກຳປູເຈຍແມ່ນເມືອງແສບ ແຂວງເພຣຍວິເຮຍ, ຕໍ່ກັບກະແສຂ່າວດັ່ງກ່າວກະຊວງການຕ່າງປະ ເທດກໍໄດ້ອອກມາຢືນຢັນກັບບັນດາສື່ມວນຊົນລາວ ວັນທີ 27 ສິງຫາ 2019 ວ່າຂ່າວທີ່ອອກມານັ້ນແມ່ນບໍ່ມີຄວາມເປັນຄວາມຈິງ, ປະຈຸບັນຊາຍແດນລາວ-ກຳປູ ເຈຍແມ່ນຢູ່ສະພາບປົກກະຕິກໍຄືມີຄວາມສະຫງົບດີຢູ່.  ທ່ານ ອານຸສິນ ຂັດຕິຍະລາດ ຮອງຫົວໜ້າຫ້ອງການຄະນະກຳມະການຊາຍແດນແຫ່ງຊາດກະຊວງການຕ່າງປະເທດກ່າວວ່າ: ຕາມສື່ສັງຄົມອອນລາຍທີ່ອອກຂ່າວກ່ຽວກັບສະຖານະການຄວາມເຄັ່ງຕຶງບໍລິເວນຊາຍແດນລາວ-ກຳປູເຈຍ ເຂດຍອດເຊລຳເພົາເບື້ອງລາວທີ່ຂຶ້ນກັບເມືອງມຸນລະປະໂມກ ແຂວງຈຳປາສັກ ແລະ ເບື້ອງກຳ ປູເຈຍແມ່ນເມືອງແສບ ແຂວງເພຣຍວິເຮຍ ໃນອາທິດທີ່ຜ່ານມາແມ່ນເປັນຂ່າວປອມໂດຍຄວາມຈິງບໍລິເວນຊາຍແດນ ລາວ-ກຳປູເຈຍ ແມ່ນຢູ່ໃນສະພາວະປົກກະຕິ, ບໍ່ໄດ້ມີການປະເຊີນໜ້າກັນ, ບໍ່ມີຄວາມເຄັ່ງຕຶງ, ບໍ່ມີບັນຫາຮ້າຍແຮງ, ບໍ່ມີການປະທະກັນດ້ວຍກຳລັງ ແລະບໍ່ມີເຫດການທີ່ບໍ່ເພ່ິງປາຖະໜາເກີດຂຶ້ນແຕ່ປະການໃດ.   ໃນນາມຕາງໜ້າໃຫ້ຄະນະກຳມະການຊາຍແດນແຫ່ງຊາດຢືນຢັນວ່າບັນຫາຊາຍແດນ ລາວ-ກຳປູເຈຍ ບໍ່ໄດ້ເປັນດັ່ງທີ່ສື່ບາງແຫ່ງທັງພາຍໃນ ແລະ ຕ່າງປະເທດທີ່ໄດ້ອອກຂ່າວຜ່ານທາງສື່ອອນລາຍໃນໄລຍະຜ່ານມາ ແລະຂ່າວທີ່ອອກໄປເປັນການສ້າງສະຖານະການເພື່ອເຮັດໃຫ້ສອງປະເທດລາວ ແລະ ກຳປູເຈຍ ມີຄວາມເຂົ້າໃຈຜິດຕໍ່ກັນ, ທັງເປັນການທຳລາຍພາບພົດທີ່ດີລະຫວ່າງສອງປະເທດທີ່ມີຕໍ່ກັນມາໂດຍຕະຫຼອດ ແລະສອງປະເທດຍາມໃດກໍຖືວ່າເປັນບ້ານແກ່ວເມືອງດອງ, ເປັນບ້ານໃກ້ເຮືອນຄຽງທີ່ດີ, ເຄີຍຮ່ວມທຸກຮ່ວມສຸກນຳກັນມາ, ທັງສອງປະເທດແມ່ນໃຫ້ຄວາມເຄົາລົບຄວາມເປັນເອກະລາດ, ອຳນາດອະທິປະໄຕ ແລະ ຜືນແຜ່ນດິນອັນຄົບ ຖ້ວນຂອງກັນ ແລະກັນ.   ສ່ວນການແກ້ໄຂບັນຫາຊາຍແດນລະຫວ່າງ ລາວ-ກຳປູເຈຍ, ສອງຝ່າຍແມ່ນຢືດໝັ້ນຕາມແນວທາງສັນຕິວິທີໂດຍຜ່ານການເຈລະຈາເພື່ອເຮັດໃຫ້ຊາຍແດນຮ່ວມຂອງສອງປະເທດກາຍເປັນຊາຍແດນແຫ່ງສັນຕິພາບ, ມິດຕະພາບແລະການຮ່ວມມື, ທ່ານ ອານຸສິນ ຂັດຕິຍະລາດ ກ່າວຢໍ້າຕື່ມ. ພາບ ແລະຂ່າວຈາກ: ໜັງສືພີມເສດຖະກິດຽສັງຄົມ

Read more

ໂພນໂຮງ ຈັບ 2 ຕ້ອງຫາ ພ້ອມຢາບ້າຄ່ມື 752 ເມັດ

ພາຍຫຼັງເຈົ້າໜ້າທີ່ ປກສ ເມືອງໂພນໂຮງ ແຂວງວຽງຈັນ ໄດ້ຮັບແຫຼ່ງຂ່າວຈາກພົນລະເມືອງດີວ່າມີການຊື້-ຂາຍຢາເສບຕິດປະເພດຢາບ້າຢູ່ຂອບເຂດບ້ານນາເຫຼົ່າ,ເມືອງໂພນໂຮງ ຈຶ່ງໄດ້ລົງຕິດຕາມເປົ້າໝາຍເຫັນວ່າມີມູນຄວາມຈິງໃນທີ່ສຸດກໍ່ສາມາດຈັບຕົວເປົ້າໝາຍໄດ້ 2 ຄົນຄື: ທ້າວ ແລວຄໍາ ອາຍຸ 43 ປີ, ຊາວນາ, ຢູ່ບ້ານນາເຫຼົ່າ ເມືອງໂພນໂຮງ, ແລະ ທ້າວ ເລ້ ອາຍຸ 22 ປີ ຊາວນາ ຢູ່ບ້ານວັງ ມົນ ເມືອງໂພນໂຮງທັງສອງຖືກກັກ ຕົວຄັ້ງວັນທີ 2 ສິງຫາ 2019 ພ້ອມຂອງ ກາງຢາບ້າຈໍານວນ 752 ເມັດ.   ຜ່ານການສືບສວນ-ສອບສວນຂອງເຈົ້າໜ້າທີ່ຕຳຫຼວດໃນເບື້ອງຕົ້ນທ້າວ ແລວຄໍາ ໄດ້ຮັບສາລະພາບວ່າ: ຢາບ້າ ຈຳນວນ37 ເມັດແມ່ນເປັນຂອງຜູ້ກ່ຽວ ແທ້ຜູ້ກ່ຽວໄດ້ຊື້ມາເພື່ອເສບ ແລະຂາຍໃຫ້ ກັບຊາວໜຸ່ມທົ່ວໄປຢູ່ພາຍໃນບ້ານໃນລາ ຄາເມັດລະ10 ພັນກີບ, ໃນຊ່ວງເດືອນກໍ ລະກົດ 2019 ຜ່ານມາ ຜູ້ກ່ຽວໄດ້ຊື້ຢາ ບ້ານຳທ້າວເລ້ຢູ່ບ້ານວັງມົນ ຈຳນວນ 1 ຖົງ ເທົ່າກັບ 200 ເມັດ ໃນລາຄາ 7 ແສນກີບ ຈຸດທີ່ຊື້ແມ່ນທ້າວ ເລ້ ໄດ້ມາສົ່ງ ຢູ່ຖຽງນາ ບ້ານນາເຫຼົ່າ ເມືອງໂພນໂຮງ ເມື່ອໄດ້ຢາມາແລ້ວຜູ້ກ່ຽວໄດ້ເອົາຢາບ້າມາຂາຍໃຫ້ກັບຊາວໜຸ່ມທົ່ວໄປເມັດລະ 10 ພັນກີບ ຈໍານວນຫຼາຍຄັ້ງຕົກມາຮອດວັນທີ 2 ສິງຫາ 2019 ຜູ້ກ່ຽວໄດ້ເສບຢາຈຳນວນ1 ເມັດ ພາຍ ຫຼັງເສບຢາບ້າແລ້ວກໍ່ໄດ້ນັງຫຼິ້ນຢູ່ຖຽງນາຈົນຮອດເວລາປະມານ 12 ໂມງຂອງວັນດຽວກັນຜູ້ກ່ຽວຈຶ່ງຖືກເຈົ້າໜ້າທີ່ຈັບຕົວໃນຂະນະກໍາລັງຈະຂາຍພ້ອມຂອງກາງຢາບ້າຈຳນວນ 37 ເມັດ.   ສ່ວນທ້າວ ເລ້ ຮັບສາລະພາບວ່າຢາຈໍານວນ 721 ເມັດ ແລະຢາໄອ 1 ຖົງນ້ອຍສີຂາວແມ່ນເປັນຂອງຜູ້ກ່ຽວແທ້ໃນເບື້ອງຕົ້ນຄັ້ງວັນທີ 2 ສິງຫາ ເວລາ ປະມານ11 ໂມງ, ຜູ້ກ່ຽວໄດ້ເອົາຢາບ້າ ນຳຄົນບໍ່ຮູ້ຊື່ຢູ່ບ້ານນາບອນ ເມືອງໂພນໂຮງ ແຂວງວຽງຈັນ ຈຳນວນ 721 ເມັດໃນລາຄາ 4,5 ແສນກີບ ແຕ່ ເງິນແມ່ນບໍ່ທັນໄດ້ຈ່າຍສ່ວນຢາໄອ 1 ຖົງນ້ອຍຜູ້ກ່ຽວແມ່ນໄດ້ຊື້ນໍາຄົນບໍ່ຮູ້ຊື່ໃນລາຄາ 2 ແສນກີບ ຈຸດປະສົງແມ່ນຊື້ມາເສບເອງຈາກນັ້ນກໍ່ໄດ້ເອົາຢາບ້າໄປສົ່ງທ້າວ ແລວຄໍາ ຢູ່ຖຽງນາບ້ານນາເຫຼົ່າ ແຕ່ຍັງບໍ່ທັນໄດ້ຂາຍຈຶ່ງຖືກເຈົ້າໜ້າທີ່ຈັບຕົວພ້ອມຂອງກາງຢາບ້າຈໍານວນ 721 ເມັດ, ຢາໄອ 1 ຖົງນ້ອຍ. ຂຽນໂດຍ: ທອງສີ  ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

Read more

ສາລີ 80% ທົ່ວປະເທດຖືກບົ້ງກິນສ່ວນລັດສົ່ງເສີມປູກພືດ 10 ຊະນິດທົດແທນ

ສະພາບການລະບາດຂອງບົ້ງຝູງສາລີໃນຂອບເຂດທົ່ວປະເທດທີ່ກົມປູກຝັງກະຊວງກະສິກຳ ແລະປ່າໄມ້ໄດ້ເກັບກຳມາຮອດວັນທີ 16 ສິງຫາ 2019 ໃນຈໍານວນ 12 ແຂວງ, 67 ເມືອງ, 778 ບ້ານ ການລະບາດກວມເອົາ 80% ຂອງພື້ນທີ່ປູກທັງໝົດ, ເສຍຫາຍຫຼາຍກວ່າ 40 ພັນເຮັກຕາ ແລະໜັກສຸດມີ 4 ແຂວງ,ຊຶ່ງອາດກະທົບຕໍ່ການສົ່ງອອກ ແລະເພື່ອເປັນການແກ້ໄຂສະເພາະໜ້າລັດຖະບານກໍຄືກະຊວງໄດ້ຫັນເອົາພືດເສດຖະກິດ 10 ຊະນິດທີ່ມີຕະຫຼາດຮອງຮັບປູກທົດແທນພື້ນທີ່ເສຍຫາຍໂດຍເລັ່ງໃສ່ 4 ແຂວງທີ່ລະບາດໜັກ.  ທ່ານ ສຸລາພອນ ອິນທະວົງ ຮອງຫົວໜ້າກົມປູກຝັງ, ຄະນະກຳມະການສະເພາະກິດເພື່ອແກ້ໄຂບັນຫາການລະບາດຂອງບົ້ງຝູງສາລີໃນຂອບເຂດທົ່ວປະເທດໃຫ້ສຳ ພາດກັບທີມຂ່າວໜັງສືພິມເສດຖະກິດ-ສັງຄົມໃນວັນທີ 20 ສິງຫາຜ່ານມາວ່າ: ບົ້ງຝູງສາລີ   ມີວົງຈອນຊີວິດ 30-35 ວັນ ຂຶ້ນກັບເງື່ອນໄຂຂອງແຕ່ລະພື້ນທີ່, ໂຕແກ່ສາມາດບິນໄກເຖິງ100 ກິໂລແມັດຕໍ່ຄືນ, ໂຕແມ່ສາມາດວາງໄຂ່ເປັນກຸ່ມໄດ້ 100-200 ໜ່ວຍຕໍ່ຄັ້ງ ແລະສາມາດວາງໄຂ່ໄດ້ສູງສຸດ 2 ພັນໜ່ວຍຕໍ່ໂຕ, ໃນລະດູໜຶ່ງສາມາດຂະຫຍາຍພັນໄດ້ 6-12 ລຸ້ນ, ຊຶ່ງນັບວ່າເປັນສັດຕູພືດຊະນິດໜຶ່ງທີ່ຮ້າຍແຮງທ້າ ທາຍສົມຄວນ ແລະສາມາດທຳລາຍພືດໄດ້ຫຼາຍກວ່າ 80 ຊະນິດ, ໂດຍການທຳລາຍຂອງບົ້ງຊະນິດດັ່ງກ່າວແມ່ນເລີ່ມແຕ່ມື້ແຕກງອກຫາໄລຍະສາລີເປັນຝັກແກ່ຊຶ່ງຈະກັດກິນໃບ, ຍອດ, ເຈາະລຳຕົ້ນ ແລະຝັກ, ຖ້າທຽບ ໃສ່ການລະບາດຂອງຕັກກະແຕນຝູງໄມ້ ປ່ອງໃນໄລຍະຜ່ານມາ ເຫັນວ່າການຂະ ຫຍາຍປະຊາກອນຂອງບົ້ງຝູງສາລີ ແມ່ນໄວກວ່າ 9-10 ເທື່ອ, ສະນັ້ນການທໍາລາຍຂອງບົ້ງຝູງສາລີໃນຈໍານວນ 12 ແຂວງທີ່ໄດ້ເກັບກຳມາຮອດວັນທີ 16 ສິງ ຫາ 2019 ເຫັນວ່າມີການລະບາດແລ້ວ 67 ເມືອງ, 778 ບ້ານ,ໃນເນື້ອທີ່ທັງໝົດ 1,04 ແສນເຮັກຕາເທົ່າກັບ 80% ຂອງເນື້ອທີ່ປູກສາລີທັງໝົດ 1,26 ແສນເຮັກຕາທົ່ວປະເທດ, ເສຍ ຫາຍ40,93 ພັນເຮັກຕາ, ຊຶ່ງມາຮອດປະຈຸບັນແມ່ນສາມາດຢັບຢັ້ງການລະບາດໄດ້ແລ້ວ.   ສາລີແມ່ນພືດເສດຖະກິດ 1 ໃນ 5 ພືດທີ່ລາວສົ່ງອອກ, ພາຍຫຼັງມີການລະບາດອາດສົ່ງຜົນກະທົບບໍ່ຫຼາຍກໍໜ້ອຍ, ດັ່ງນັ້ນເພື່ອເປັນການຫຼຸດຜ່ອນຜົນເສຍຫາຍຕໍ່ລາຍຮັບຂອງປະຊົນ,ລັດຖະບານກໍຄືກະຊວງຈຶ່ງໄດ້ຊອກທາງອອກຊ່ວຍເຫຼືອປະຊາຊົນດ້ວຍການແນະນຳຊຸກຍູ້ໃຫ້ປະຊາຊົນຜູ້ທີ່ໄດ້ຮັບຜົນກະທົບຕົ້ນຕໍແມ່ນ 4 ແຂວ ງຄື: ໄຊຍະບູລີ, ອຸດົມໄຊ, ຫົວພັນ ແລະ ແຂວງຊຽງຂວາງ ທີ່ເປັນແຂວງມີທ່າແຮງໃນການສົ່ງອອກສາລີ, ໃຫ້ຫັນປ່ຽນໄປປູກພືດ 10 ຊະນິດທົດແທນເປັນຕົ້ນຖົ່ວດິນ, ຖົ່ວເຫຼືອງ ແລະພືດຕະກຸນຖົ່ວຕ່າງໆທີ່ເປັນພືດໄລຍະສັ້ນ, ມີຄວາມຕ້ອງການນໍ້າໜ້ອຍເຕັກນິກສູງເພື່ອທົດແທນການສູນເສຍດັ່ງກ່າວໂດຍດ່ວນ ແລະ ຍັງເປັນພືດເສດຖະກິດທີ່ມີຕະຫຼາດຮອງຮັບທີ່ສຳຄັນການຫັນປ່ຽນໄປປູກພືດຊະນິດອື່ນຍັງຈະຊ່ວຍຕັດວົງຈອນຊີວິດຂອງບົ້ງຝູງສາລີໄດ້ອີກ.  ທ່ານ ສຸລາພອນ ອິນທະວົງ ກ່າວຕື່ມວ່າ: ການຫັນໃຫ້ປະຊາຊົນໄປປູກພືດຊະນິດອື່ນແທນແມ່ນເປັນການແກ້ໄຂໄລຍະສັ້ນ ແລະເພື່ອເປັນການຮັບມືທັງເປັນການແກ້ ໄຂໄລຍະກາງ ແລະຍາວກົມປູກຝັງໄດ້ໃຊ້ການປ້ອງກັນພືດແບບປະສົມປະສານຊຶ່ງຈະບໍ່ໃຊ້ສານເຄມີແຕ່ເນັ້ນໜັກຄວາມຮູ້ແບບທ້ອງຖິ່ນມາປະສົມປະສານກັບເຕັກໂນໂລຊີອັນໃໝ່ດ້ວຍການໃຊ້ເຊື້ອຊີວະວິທະຍາໃຊ້ແມງໄມ້ຂ້າແມງໄມ້ ແລະບ່ອນໃດທີ່ຮ້າຍແຮງສຸດແມ່ນຈະໃຊ້ເຄມີຢັບຢັ້ງ, ປະຈຸບັນນີ້ໃຊ້ແລ້ວ 16 ພັນກວ່າເຮັກຕາ ເພື່ອບໍ່ໃຫ້ມີການແຜ່ລະບາດໄປສູ່ເຂດອື່ນ, ພ້ອມທັງເລັ່ງສ້າງພະນັກງານວິຊາການຂັ້ນແຂວງ, ເມືອງ, ບ້ານ ແລະ ປະຊາຊົນເພື່ອໂຄສະນາເຜີຍແຜ່ຜົນຮ້າຍຂອງການລະ ບາດພະຍາດດັ່ງກ່າວສຳລັບການຮ່ວມມືກັບຫຼາຍຝ່າຍໂດຍສະເພາະການແລກປ່ຽນປະສົບການຈາກບັນດາປະເທດໃນອາຊຽນ,ອາຊຽນ+3, ຮ່ວມມືສອງຝ່າຍກັບ ສປ ຈີນ ໃນການແກ້ໄຂການລະບາດຂອງພະຍາດດັ່ງກ່າວ, ສ່ວນໃນຕໍ່ໜ້າລັດຈະມີການຫັນປ່ຽນ ແລະ ກຳນົດພືດເສດຖະກິດທີ່ເປັນບູລິມະສິດໃນການສົ່ງອອກຂອບເຂດທົ່ວປະເທດຄາດວ່າຈະມີການກຳນົດ ແລະ

Read more

ວັດຊຽງຄວນຄຶກຄັກ ປີນີ້ນັກທ່ອງທ່ຽວເກືອບ 2 ແສນຄົນແລ້ວ

  ສວນວັດທະນະທຳຊຽງຄວນເປັນອີກສະຖານທີ່ທ່ອງທ່ຽວທາງວັດທະນະທຳຂອງນະຄອນຫຼວງວຽງຈັນທີ່ກຳລັງກາຍເປັນທີ່ສົນໃຈຂອງນັກທ່ອງທ່ຽວທັງພາຍໃນແລະຕ່າງປະເທດຂະນະທີ່ປະຈຸບັນກ້າວເຂົ້າສູ່ລະດູຝົນແຕ່ບັນຍາກາດຂອງການທ່ອງທ່ຽວຍັງຄົງຄຶກຄື້ນຄືກັບລະດູແລ້ງປິນີ້ຕົວເລກບັນລຸແລ້ວເກືອບ 2 ແສນຄົນ ໂດຍນັກທ່ອງ ທ່ຽວສ່ວນໃຫຍ່ແມ່ນມາຈາກປະເທດຈີນ, ຫວຽດນາມ, ເກົາຫຼີ ແລະພາຍໃນປະເທດ. ທ່ານນາງ ສ້ອຍສຸດາ ອິນເມືອງໄຊ ປະທານບໍລິສັດສວນວັດທະນະທຳຊຽງຄວນຈຳກັດໃຫ້ສຳພາດວ່າ: ສວນວັດທະນະທຳຊຽງຄວນເປັນສະຖານທີ່ທ່ອງທ່ຽວອີກຈຸດໜຶ່ງຂອງນະຄອນຫຼວງວຽງຈັນ ໂດຍສະເພາະໄດ້ສ້າງສິ່ງອຳນວຍຄວາມສະດວກຕ່າງໆໃຫ້ນັກທ່ອງທ່ຽວເຂົ້າມານັບມື້ນັບຫຼາຍຂຶ້ນຈາກເກົ່າ, ສຳລັບປີທ່ອງທ່ຽວລາວ-ຈີນກໍເປັນອີກປີ ໜຶ່ງທີ່ມີຄວາມສຳຄັນໃນການດຶງດູດເອົານັກທ່ອງທ່ຽວຈາກຈີນທີ່ເຂົ້າມາທ່ຽວລາວໃຫ້ເຂົ້າມາທ່ຽວຊົມທີ່ສວນວັດທະນະທຳຊຽງຄວນນັບມື້ຫຼາຍຂຶ້ນ.   ປະຈຸບັນເຫັນວ່ານັກທ່ອງທ່ຽວເຂົ້າມາເພີ່ມຂຶ້ນຢ່າງຕໍ່ເນື່ອງເມື່ອທຽບໃສ່ປີທ່ອງທ່ຽວລາວຜ່ານມາ, ໃນແຕ່ລະເດືອນແມ່ນມີນັກທ່ອງທ່ຽວເພີ່ມຂຶ້ນສະເລ່ຍນັກທ່ອງທ່ຽວເຂົ້າມາທ່ຽວຊົມ 800 ຄົນຕໍ່ມື້ພິເສດໃນວັນເສົາ-ອາທິດຈະມີເຖິງພັນກວ່າຄົນຊຶ່ງສ່ວນໃຫຍ່ແມ່ນນັກທ່ອງທ່ຽວຈີນ, ຮອງລົງມາແມ່ນເກົາຫຼີ, ຫວຽດນາມ, ໄທ ແລະຄົນລາວເຮົາ, ທີ່ມາແບບທົວ, ແບບຄອບຄົວແລະອື່ນໆ, ນອກນັ້ນຍັງມີບັນດາໂຮງຮຽນທີ່ພານັກຮຽນມາທັດສະນະສຶກສາສະເລ່ຍເດືອນມີ10 ກວ່າໂຮງຮຽນ, ສຳລັບລາ ຄາເຂົ້າຊົມຄົນລາວແມ່ນ 10 ພັນກີບ, ຄົນຕ່າງປະເທດ 15 ພັນກີບ, ສ່ວນນັກຮຽນທີ່ມີອາຍຕໍ່າກວ່າ 10 ປີ, ຜູ້ເຖົ້າ ແລະພະສົງແມ່ນຈະບໍ່ໄດ້ເສຍຄ່າເຂົ້າຊົມ, ໂດຍລວມບັນຍາກາດການທ່ອງທ່ຽວໃນສວນວັດທະນະທຳຊຽງຄວນໃນລະດູຝົນນີ້ຍັງຄົງຄືກຄື້ນຄືກັບລະດູແລ້ງຜ່ານມາດຽວບັນລຸແລ້ວເກືອບ 2 ແສນຄົນ ໝົດປີອາດບັນລຸແຜນທີ່ວາງໄວ້. ຂຽນໂດຍ: ສ. ອາສາ ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

Read more

ເຂື່ອນນໍ້າຂອງໄຊຍະ ຈະສ້າງຜົນປະໂຫຍດໃຫ້ປະຊາຊົນ ແລະປະເທດຊາດ

 ໂຄງການກໍ່ສ້າງເຂື່ອນໄຟຟ້າພະລັງງານນໍ້າໄຊຍະບູລີເປັນໂຮງໄຟຟ້າພະລັງນໍ້າແບບຝາຍນໍ້າລົ້ນ, ມີກໍາລັງການຜະລິດຕິດຕັ້ງ 1.285 ເມກາວັດ, ມີຄວາມຍາວຂ້າມລໍານໍ້າຂອງຕອນລຸ່ມ 820 ແມັດ, ຊຶ່ງຖືເປັນຕົ້ນແບບໂຮງໄຟຟ້າພະລັງງານນໍ້າແຫ່ງທໍາອິດເທິງແມ່ນໍ້າຂອງທີ່ໄດ້ໃຊ້ເຕັກໂນໂລຊີທີ່ທັນສະໄໝ, ເປັນທີ່ຍອມຮັບຈາກຜູ້ຜະລິດຊັ້ນນໍາທົ່ວໂລກ, ເພື່ອສ້າງຄວາມສົມດູນລະຫວ່າງທຸລະກິດ ແລະ ຄວາມຍືນຍົງທີ່ສອດຄ່ອງກັບຂໍ້ກໍານົດຂອງຄະນະກໍາມາທິການແມ່ນໍ້າຂອງ, ຂະນະທີ່ການກໍ່ສ້າງຮອດປະຈຸບັນສຳເລັດກວ່າ 99% ແລະມີແຜນກໍານົດຈ່າຍໄຟໃນຕົ້ນເດືອນຕຸລາ ແລະຄາດວ່າຈະມີພິທີເປີດຢ່າງເປັນທາງການໃນເດືອນພະຈິກ2019 ນີ້.   ທ່ານນາງ ບຸນພັກ ອິນທະປັນຍາ ຮອງເຈົ້າແຂວງໄຊຍະບູລີ ໄດ້ໃຫ້ສໍາພາດຕໍ່ທີມງານຂ່າວໃນວັນທີ 20 ສິງຫາ 2019 ຮູ້ວ່າ: ໂຮງໄຟຟ້າພະລັງງານນໍ້າ ໄຊຍະບູລີເປັນແຜນຍຸດທະສາດເພື່ອການພັດທະນາໂດຍຫັນເອົາທໍາມະຊາດມາຮັບໃຊ້ໃຫ້ແກ່ສັງຄົມ, ຊຶ່ງນໍາເອົາຜົນປະໂຫຍດມາໃຫ້ກັບປະຊາຊົນ ແລະ ປະເທດຊາດໃນອານາ ຄົດ.  ເຂື່ອນໄຟຟ້າໄຊຍະບູລີ ໄດ້ລິເລີ່ມຄົ້ນຄວ້າ ແລະເຂົ້າສູ່ການຍົກຍ້າຍຈັດສັນປະຊາຊົນອອກຈາກພື້ນທີ່ກໍ່ສ້າງນັບແຕ່ປີ 2011 ເປັນຕົ້ນມາ, ເພື່ອອໍານວຍຄວາມສະດວກໃນການຈັດຕັ້ງປະຕິບັດໂຄງການດັ່ງກ່າວ, ຊຶ່ງກວມເອົາເນື້ອທີ່ຂອງແຂວງຫຼວງພະບາງ ແລະແຂວງໄຊຍະບູລີ, ມີບ້ານທີ່ຖືກໂຄງການທັງໝົດ 19 ບ້ານ.  ສໍາລັບແຂວງໄຊຍະບູລີ ແມ່ນມີ 6 ບ້ານລຽບແຄມແມ່ນໍ້າຂອງ, ໃນນັ້ນໄດ້ຍົກຍ້າຍ 1 ບ້ານຄື: ບ້ານຫ້ວຍຊຸຍ ແລະ 5 ບ້ານແມ່ນຍັບຍ້າຍຈາກບ່ອນຕໍ່າຂຶ້ນສູ່ບ່ອນສູງ, ລວມປະຊາຊົນ 219 ຄອບຄົວ, ພົນລະເມືອງ 1.143 ຄົນ, ຍິງ 537 ຄົນ, ເຊິ່ງຜົນກະທົບດັ່ງກ່າວທາງບໍລິສັດທີ່ຮັບເໝົາກໍ່ສ້າງແມ່ນໄດ້ຊົດເຊີຍຄືນໃຫ້ທັງໝົດເປັນຕົ້ນແມ່ນ: ປຸກສ້າງເຮືອນ, ຈັດສັນທີ່ດິນທໍາການຜະລິດ ແລະຈັດສັນອາຊີບເຊັ່ນ: ປູກຝັງ-ລ້ຽງສັດ, ເຮັດການປະມົງ, ເຮັດວຽກນໍາໂຄງການ, ຕົ້ມເຫຼົ້າຜະລິດເປັນສິນຄ້າໂອດ໋ອບ, ຕັດຫຍິບ, ສ້ອມແປງ, ຂັບລົດ, ເສີມຄວາມງາມ, ຄ້າ-ຂາຍ, ປຸງແຕ່ງອາຫານ ແລະ ອື່ນໆ ມາຮອດປະຈຸບັນຊີວິດການເປັນຢູ່ຂອງປະຊາຊົນດັ່ງກ່າວແມ່ນດີຂຶ້ນ, ລາຍຮັບສະເລ່ຍບ້ານຫ້ວຍຊຸຍ 604 ໂດລາຕໍ່ຄົນຕໍ່ປີ, ເມື່ອກ່ອນແມ່ນ 412 ໂດລາຕໍ່ຄົນຕໍ່ປີ, ບ້ານຕາລານ 2.179 ໂດລາຕໍ່ຄົນຕໍ່ປີ, ເມື່ອກ່ອນແມ່ນ593 ໂດລາຕໍ່ຄົນຕໍ່ປີ.    ນອກຈາກການສ້າງລາຍຮັບໃຫ້ກັບປະຊາຊົນແລ້ວທ່ານ ນາງ ບຸນພັກ ອິນທະປັນຍາ ຍັງໃຫ້ຮູ້ຕື່ມອີກວ່າ: ໄດ້ສ້າງລາຍຮັບໃຫ້ແຂວງອີກເປັນຕົ້ນແມ່ນ: ຮັບຈາກອາ ກອນເງິນເດືອນຂອງກໍາມະກອນ, ການສ້າງຖະໜົນຫົນທາງ ແລະການຊື້-ຂາຍຕາມທ້ອງຕະຫຼາດສໍາລັບປະເທດຊາດແມ່ນ: ໄດ້ຮັບຜົນສໍາເລັດທີ່ວາງແຜນວິໄສທັດ ແລະ ຍຸດທະສາດໃນອະນາຄົດໄດ້ຮັບການຈັດຕັ້ງປະຕິບັດ, ໄດ້ມີຊື່ສຽງ, ມີລາຍຮັບເຂົ້າປະເທດຈາກການຂາຍໄຟຟ້າໄປຕ່າງປະເທດແລະຈຸດດັ່ງກ່າວຈະກາຍເປັນແຫຼ່ງທ່ອງທ່ຽວຊຶ່ງຈະສ້າງຜົນປະໂຫຍດຢ່າງໃຫຍ່ຫຼວງໃຫ້ປະເທດຊາດໃນອະນາຄົດ.  ຂຽນໂດຍ: ອຸ່ນເຮືອນ ໂພທິລັກ ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ     

Read more

ເມືອງສັງທອງ ມີຫຼາຍທ່າແຮງດຶງດູດນັກລົງທຶນ

  ທີ່ຕັ້ງຂອງເມືອງສັງທອງກາຍເປັນທ່າແຮງສຳຄັນໃນການດຶງດູດນັກລົງທຶນໃຫ້ເຂົ້າມາລົງທຶນໃນເມືອງຫຼາຍຂຶ້ນເປັນຕົ້ນການຄົມມະນາຄົມສະດວກ, ມີເນື້ຶອທີ່ເໝາະ ສົມແກ່ການປູກຝັງ ແລະລ້ຽງສັດ, ການບໍລິການດ້ານຕ່າງໆ, ພ້ອມນັ້ນຍັງມີບັນດາແຮ່ທາດທີ່ມີລາຄາຫຼາຍຊະນິດ,ອັນໄດ້ສ້າງຄວາມສົນໃຈໃຫ້ກັບຜູ້ປະກອບການເຂົ້າ ມາລົງທຶນ, ຂະນະທີ່ນະຄອນຫຼວງກໍຄືເມືອງເປີດກວ້າງໃຫເຂົ້າສຶກສາຄວາມເປັນໄປໄດ້ໃນທຸກດ້ານທີ່ເຫັນວ່າເປັນທ່າແຮງໃນການພັດທະນາເມືອງໃຫ້ນັບມື້ດີຂຶ້ນ.   ທ່ານ ພູວົງ ພະມີສິດ ເຈົ້າຂອງສວນພືດສາສາດໃຫ້ສຳພາດໂອກາດເຂົ້າຮ່ວມກອງປະຊຸມຊຸກຍູ້ຂະບວນການແຂ່ງຂັນຮັກຊາດ ແລະພັດທະນາຂອງນັກທຸລະກິດເຂົ້າສູ່ເມືອງສັງທອງ ໃນອາທິດທີ່ຜ່ານມາຮູ້ວ່າ: ສັງທອງເປັນເມືອງໜຶ່ງທີ່ມີທ່າແຮງຫຼາຍດ້ານເປັນຕົ້ນຈຸດທີ່ຕັ້ງຢູ່ບໍ່ຫ່າງຈາກນະຄອນຫຼວງວຽງຈັນ, ໂຄງລ່າງດ້ານຄົມມະ ນາຄົມສະດວກສະບາຍ, ອົງລວມຂອງທີ່ດິນຍັງເປັນທຳມະຊາດຢູ່ ແລະ ມີສາຍນໍ້າຂອງຊຶ່ງເປັນແມ່ນໍ້າຫຼັກໃນການສະໜອງນໍ້າແກ່ການເຮັດກະສິກຳໄດ້ດີທີ່ສຳຄັນທຳ ມະຊາດໃນເຂດນີ້ຍັງມີຄວາມອຸດົມສົມບູນຫຼາຍທີ່ສຸດ, ພ້ອມເໝາະສົມແກ່ການລົງທຶນດ້ານການບໍລິການທ່ອງທ່ຽວ-ເຮືອນພັກ, ໂດຍໃນນາມ ສ່ວນຕົວແມ່ນໄດ້ເຂົ້າມາສຶກສາສຳຫຼວດຫຼາຍຄັ້ງແລ້ວ.   ສ່ວນທ່ານ ບຸນທ່ຽງ ລັດຕະນະວົງ ປະທານບໍລິສັດເມືອງລາວຟຸດ ໃຫ້ສຳພາດໂອກາດເຂົ້າຮ່ວມໃນກອງປະຊຸມດັ່ງກ່າວເຊ່ັນກັນວ່າ: ການລົງທຶນຂອງບໍລິສັດໃນໄລຍະຜ່ານມາແມ່ນຢູ່ເມືອງໄຊທານີ ນະຄອນຫຼວງວຽງຈັນ ແລະເມືອງທຸລະຄົມ ແຂວງວຽງຈັນ, ພ້ອມນັ້ນຍັງໄດ້ຮ່ວມມືກັບກຸ່ມຜູ້ຜະລິດຕ່າງໆເພາະວ່າກຸ່ມຜະລິດມີກຳລັງການຜະລິດ,ແຕ່ຍັງຂາດການເຊື່ອມຍົງກັບຕະຫຼາດ,ຂະນະທີ່ບໍລິສັດມີຕະຫຼາດແຕ່ຍັງຂາດຜົນຜະລິດ,ສະເພາະເມືອງສັງທອງນັບວ່າເປັນເມືອງໜຶ່ງທີ່ມີທ່າແຮງຫຼາຍດ້ານໂດຍສະເພາະກະສິກຳ, ມີດິນທີ່ດີສາມາດຜະລິດໄດ້ຫຼາຍ, ເປັນດິນທຳມະຊາດບໍ່ມີສານຜິດ, ຖ້າຫາກມີການສົ່ງເສີມການຜະລິດຕົ້ນຕໍດ້ານກະສິກຳກໍຈະສາມາດເຂົ້າເຖິງຕະຫຼາດນະຄອນຫຼວງ, ເພາະເມືອງມີໄລຍະທາງບໍ່ໄກຈາກນະຄອນຫຼວງຊຶ່ງຈະເປັນຈຸດໄດ້ປຽບທາງດ້ານການຂົນສົ່ງ, ສ່ວນການຈະຂະຫຍາຍຖານ ຫຼືເພີ່ມການລົງທຶນມາເມືອງນີ້ທາງບໍລິສັດພວມຢູ່ໃນຂັ້ນຕອນຂອງການກະກຽມ,ເນື່ອງຈາກຜ່ານມາບໍລິສັດໄດ້ຍື່ນເອກະສານຫາເມືອງກໍຄືຂະແໜງທີ່ກ່ຽວຂ້ອງໂດຍທຸກຝ່າຍເຫັນດີໃຫ້ການຮ່ວມມື ແລະການລົງທຶນໃນເມືອງນີ້ແມ່ນຈະເນັ້ນເອົາປະຊາຊົນມີສ່ວນຮ່ວມຫຼາຍທີ່ສຸດ,ບໍລິສັດຈະເປັນຫຼັກດ້ານນຳໃຊ້ເຕັກນິກວິຊາການ,ນຳໃຊ້ເຄື່ອງມືທີ່ທັນສະໄໝເພື່ອໃຫ້ຜົນຜະລິດທີ່ໄດ້ມີປະສິດທິພາບສູງຂຶ້ນ ແລະປະຊາຊົນມີລາຍຮັບທີ່ເພີ່ມຂຶ້ນເຊັ່ນກັນ. ຂຽນໂດຍ: ພິມພອນ ໜັງສືພິມເສດຖະກິດ-ສັງຄົມ

Read more

ທະນາຄານໂລກ ຄາດຄະເນເສດຖະກິດລາວຈະກັບຄືນມາຟື້ນຕົວທີ່ລະດັບ 6,5% ໃນປີນີ້

  12 ສິງຫາ ທີ່ນະຄອນຫຼວງວຽງຈັນ ທະນາຄານໂລກປະຈຳລາວໄດ້ເຜີຍແຜ່ບົດລາຍງານສະພາບເສດຖະກິດ ສປປລາວ ຊຶ່ງຄາດວ່າຈະກັບມາຟື້ນຕົວຄືນຢູ່ລະດັບ6,5% ໃນປີ 2019, ເພີ່ມຈາກ 6,3% ໃນປີ 2018 ໂດຍຂະແໜງກໍ່ສ້າງຈາກການລົງທຶນໃສ່ໂຄງການກໍ່ສ້າງໂຄງລ່າງຂະໜາດໃຫຍ່ ແລະ ຂະແໜງການບໍລິ ການທີ່ຍັງຈະສືບຕໍ່ຂະຫຍາຍຕົວເປັນຕົ້ນແມ່ນການຄ້າຂາຍຍົກ ແລະຂາຍຍ່ອຍຈະເປັນຕົວຂັບເຄື່ອນທີ່ສຳຄັນຂະນະທີ່ສະພາບການຫຍຸ້ງຍາກທັງພາຍໃນ ແລະຕ່າງປະເທດ, ລັດຖະບານຍັງຄົງສືບຕໍ່ດໍາເນີນນະໂຍບາຍຄຸມເຂັ້ມທາງດ້ານການເງິນງົບປະມານດ້ວຍການຮັດກຸມທາງດ້ານລາຍຈ່າຍ ແລະ ປັບປຸງທາງດ້ານການບໍລິຫານຈັດເກັບລາຍຮັບ.   ທັງນີ້ທະນາຄານໂລກຄາດວ່າ: ນະໂຍບາຍຄຸມເຂັ້ມທາງດ້ານການເງິນຈະສົ່ງຜົນໃຫ້ການຂາດດຸນງົບປະມານຫຼຸດລົງຢູ່ໃນລະດັບ 4,3% ຂອງລວມຍອດຜະລິດຕະ ພັນ ຫຼື GDP ໃນປີ 2019 ຈາກ 4,4% ໃນປີ 2018 ເນື່ອງຈາກມີການຄວບຄຸມລາຍຈ່າຍທາງດ້ານເງິນເດືອນ ແລະ ລາຍຈ່າຍດ້ານການລົງທຶນຢ່າງຮັດກຸມຂຶ້ນກວ່າເກົ່າຊຶ່ງສິ່ງດັ່ງກ່າວຄາດວ່າຈະເຮັດໃຫ້ລາຍຈ່າຍພາກລັດຢູ່ໃນລະດັບຄົງທີ່ປະມານ 20% ຂອງ GDP ໃນປີ 2019 ແຕ່ລາຍຮັບຕໍ່ GDP ຄາດວ່າຈະດີຂຶ້ນກວ່າເກົ່າເລັກນ້ອຍເນື່ອງຈາກຜົນຂອງຄວາມພະຍາຍາມໃນການຍົກລະດັບການບໍລິຫານດ້ານການຈັດເກັບລາຍຮັບ ແລະຂອບນິຕິກໍາທີ່ເຂັ້ມແຂງກວ່າເກົ່າ.   ຂະນະທີ່ໃນຕໍ່ໜ້າທະນາຄານໂລກເຫັນວ່າ: ໜີ້ສິນສາທາລະນະຄາດວ່າຈະຫຼຸດລົງຈາກ 57,2% ຂອງ GDP ໃນປີ 2018 ມາເປັນ 55,5% ຂອງ GDP ໃນປີ 2021 ແຕ່ການຄາດຄະເນຮອດປີ 2021 ກໍ່ອາດຕ້ອງໄດ້ຮັບຜົນກະທົບຈາກຄວາມສ່ຽງທີ່ເພີ່ມຂຶ້ນໃນອະນາຄົດໄດ້ເຊັ່ນດຽວກັນ. ທ່ານ ນິໂຄລາ ພອນທາຣາ, ຫົວໜ້າຫ້ອງການທະນາຄານໂລກປະຈໍາ ສປປ ລາວ ກ່າວວ່າ: “ການເພີ່ມຄວາມເຂັ້ມແຂງໃນວຽກງານຈັດເກັບລາຍຮັບເປັນສິ່ງທີ່ຈໍາເປັນເພື່ອສ້າງຄວາມຄ່ອງຕົວດ້ານນະໂຍບາຍການເງິນງົບປະມານ ແລະ ຫຼຸດຜ່ອນບັນຫາທາງດ້ານໜີ້ສິນສາທາລະນະ”.“ໃນຕໍ່ໜ້າ, ສິ່ງສໍາຄັນແມ່ນການປັບປຸງສະພາບແວດລ້ອມດ້ານການດຳເນີນທຸລະກິດເພື່ອສົ່ງເສີມການພັດທະນາຂອງພາກເອກະຊົນລວມທັງການຂະຫຍາຍຕົວຂອງວິສາຫະກິດຂະໜາດນ້ອຍ ແລະກາງ. ມາດຕະການເຫຼົ່ານີ້ສາມາດປະກອບສ່ວນເຂົ້າໃນການຮັກສາສະພາບເສດຖະກິດມະຫາພາກໃຫ້ມີສະຖຽນລະພາບ, ສົ່ງເສີ່ມການສ້າງວຽກເຮັດງານທໍາ ແລະຫຼຸດຜ່ອນຄວາມທຸກຍາກ ແລະ ຄວາມບໍ່ສະເໝີພາບລົງໄດ້.”  ແນວໃດກໍດີບົດລາຍງານນີ້ຍັງປະກອບມີພາກທີສອງທີ່ໄດ້ສະຫຼຸບຄວາມຄິດເຫັນຂອງວິສາຫະກິດຂະໜາດນ້ອຍ ແລະ ກາງກ່ຽວກັບສະພາບແວດລ້ອມທາງດ້ານທຸລະ ກິດທີ່ອີງຕາມຂໍ້ມູນຈາກການສໍາຫຼວດວິສາຫະກິດຂອງທະນາຄານໂລກຂໍ້ຫຍຸ້ງຍາກຕົ້້ນຕໍທີ່ທາງວິສາຫະກິດຂະໜາດນ້ອຍ ແລະ ກາງໄດ້ລາຍງານໃຫ້ຮູ້ລວມມີການເຂົ້າເຖິງແຫຼ່ງທຶນ, ການແຂ່ງຂັນກັບທຸລະກິດທີ່ບໍ່ເປັນທາງການ-ເຊັ່ນບັນດາບໍລິສັດທີ່ບໍ່ໄດ້ຈົດທະບຽນ ແລະບໍ່ສອດຄ່ອງກັບລະບຽບການ ແລະໄຟຟ້າທີ່ບໍ່ມາປົກກະຕິ. ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

Read more

ຫຼາຍບ້ານເມືອງແບ່ງ ຮັບຜົນກະທົບຈາກເຫດນໍ້າໄຫຼຊຸ

 ເລີ່ມແຕ່ເວລາ 5:00-8:00 ໂມງຂອງວັນທີ 17 ສິງຫາ ຢູ່ເມືອງແບງ ແຂວງອຸດົມໄຊ ໄດ້ເກີດຝົນຕົກໜັກແລ້ວເກີດມີນໍ້າໄຫຼຊຸຖ້ວມເນື້ອທີ່ການຜະລິດ, ເຮືອນຊານບ້ານຊ່ອງ, ລວມເຖິງພື້ນຖານໂຄງລ່າງຈຳນວນໜຶ່ງພາຍໃນເມືອງແບງແຂວງອຸດົມໄຊໄດ້ຮັບຜົນເສຍຫາຍໜັກ.     ຜ່ານການລົງກວດກາຂອງການນຳເມືອງຮ່ວມກັບການນຳແຂວງໃນເບື້ອງຕົ້ນເຫັນວ່າມີບັນດາບ້ານ, ສຳນັກງານອົງການທີ່ໄດ້ຮັບຜົນກະທົບໜັກສົມຄວນໃນນັ້ນລວມມີ: ໂຮງໝໍເມືອງຖືກນໍ້າຖ້ວມອຸປະກອນການແພດໄດ້ຮັບຄວາມເສຍຫາຍ; ບ້ານຫ້ວຍລານໍ້າຖ້ວມເຮືອນ, ນໍ້າເຊາະເຈື່ອນເຮືອນຈຳນວນ 1 ຫຼັງ; ບ້ານນາຫ້ວຍເຮືອນຖືກນໍ້າເຊາະເຈື່ອນເສຍຫາຍ 4 ຫຼັງ ໃນນີ້: ເຊາະເຈື່ອນຫາຍໄປກັບນໍ້າ 2 ຫຼັງ; ບ້ານທ່າກາດນໍ້າຖ້ວມເຮືອນປະຊາຊົນ ແລະ ຫຼາຍບ້ານເຂດລຽບທາງຫຼວງແຫ່ງຊາດ, ເນື້ອທີ່ນາເຂດລ່ອງນໍ້າແບງ, ນໍ້າຫາວ,ເຂດນາໂຮມຫຼາຍບ້ານຖືກນໍ້າຖ້ວມ,ເຊາະເຈື່ອນ,ເສັ້ນທາງເຂດນາໂຮມຂາດ3 ຈຸດ, ຂົວນໍ້າຫາວທາງເລກ 2 w ຖືກເຊາະເຈື່ອນ, ນໍ້າປະປາໃນເທດສະບານເມືອງຖືກຕັດຂາດ,ໜອງປາ,ສັດລ້ຽງຂອງປະຊາຊົນຈຳນວນໜຶ່ງຖືກເສຍຫາຍສ່ວນປະຊາຊົນແມ່ນປອດໄພບໍ່ມີລາຍງານຜູ້ໄດ້ຮັບບາດເຈັບ ແລະເສຍຊີວິດ.   ຈາກເຫດການດັ່ງກ່າວທາງເມືອງກໍ່ໄດ້ຈັດສົ່ງກຳລັງທະຫານ, ຕຳຫຼວດ, ພະນັກງານ-ລັດຖະກອນ ລົງຊ່ວຍເຫຼືອ ປະຊາຊົນທີ່ໄດ້ຮັບຜົນກະທົບ, ສ່ວນຕົວເລກຜົນເສຍຫາຍຍັງຢູ່ໃນຂັ້ນຕອນລວບລວມຂອງພາກສ່ວນກ່ຽວຂ້ອງ. ຂຽນໂດຍ: ໄມພອນ ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

Read more
Copy Protected by Chetan's WP-Copyprotect.