ລັດຖະບານໃຫ້ເຂັ້ມງວດການເກັບລາຍຮັບ ແລະ ປົກປັກສາປ່າແບບຍືນຍົງ

ຂປລ. ຜົນກອງປະຊຸມລັດຖະບານສະໄໝສາມັນປະຈຳເດືອນພຶດສະພາ 2016 ພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ຕົກລົງຮັບຮອງເອົາບັນຫາສຳຄັນ 3 ຢ່າງຄື: ບັນຫາຈັດເຈັບລາຍຮັບງົບປະມານ ແລະ ສ້າງສະຖຽນລະພາບໝັ້ນທ່ຽງ ໃຫ້ແກ່ເສດຖະກິດການເງິນ; ບັນຫາການຜະລິດກະສິກຳ-ປົກປັກຮັກສາປ່າໄມ້ແບບຢືນຍົງ ແລະ ບັນຫາແກ້ໄຂວຽກງານບາງກະຊວງທີ່ມີການຊໍ້າຊ້ອນກັນ.

ກອງປະຊຸມລັດຖະບານສະໄໝສາມັນປະຈຳເດືອນພຶດສະພາ 2016 ໄດ້ດຳເນີນມາເປັນເວລາ 2 ວັນ (ວັນທີ 24-25 ພຶດສະພາ) ທີ່ຫ້ອງວ່າການສຳນັກງານນາຍົກລັດຖະມົນຕີ ເຊິ່ງຜົນກອງປະຊຸມຄັ້ງນີ້ໄດ້ພິຈາລະນາ ແລະ ຮັບຮອງເອົາບົດລາຍງານ ສະພາບການຈັດຕັ້ງປະຕິບັດ ແຜນລາຍຮັບງົບປະມານ ແລະ ມາດຕະການຕ່າງໆ ໃນການຈັດເຈັບລາຍຮັບຂອງເດືອນ 6,7,8 ແລະ 9 ແລະ 3 ເດືອນຂ້າມຜ່ານ (10,11 ແລະ 12) ປີ 2016, ບົດລາຍງານກ່ຽວກັບການແກ້ໄຂສະພາບຄ່ອງ ຂອງເສດຖະກິດມະຫາພາກ ແຕ່ນີ້ຮອດປີ 2016 ແລະ ແຜນການປັບປຸງເສດຖະກິດໄລຍະສັ້ນ ແລະ ປັບປຸງໂຄງສ້າງເສດຖະກິດໄລຍະກາງ.

ຕໍ່ກັບບັນຫາດັ່ງກ່າວ ກອງປະຊຸມໄດ້ມີທິດຊີ້ນຳ ໃຫ້ກັບພາກສ່ວນທີ່ກ່ຽວຂ້ອງນຳໄປປັບປຸງຕາມການປະກອບຄຳຄິດເຫັນ ຂອງສະມາຊິກລັດຖະບານເປັນຕົ້ນ ໃຫ້ເອົາໃຈໃສ່ໃນການເຈັບລາຍຮັບ ເພື່ອຮັບປະກັນໃຫ້ສາມາດ ປະຕິບັດຕາມແຜນການ ທີ່ສະພາແຫ່ງຊາດຮັບຮອງ, ສືບຕໍ່ຄົ້ນຄວ້າ ບັນດາມາດຕະການຄຸ້ມຄອງການເບີກຈ່າຍ-ການໃຊ້ຈ່າຍກອງທຶນ ໃຫ້ເຂັ້ມງວດ ແລະ ຮັດກຸມຫລາຍກວ່າເກົ່າ, ຄົ້ນຄວ້າ ແລະ ປັບປຸງ ບັນດາມາດຕະການກ່ຽວກັບການຍົກເວັ້ນພາສີ-ອາກອນ ໃນການນຳເຂົ້ານ້ຳເຊື້ອໄຟຄືນໃໝ່.

ນອກຈາກນີ້ ກອງປະຊຸມຍັງໄດ້ພິຈາລະນາຮັບຮອງເອົາບົດລາຍງານກ່ຽວກັບແຜນການຈັດຕັ້ງປະຕິບັດການຜະລິດລະດູແລ້ງ ແລະ ແຜນການຜະລິດລະດູຝົນ ປະຈຳສົກປີ 2015-2016; ບົດລາຍງານນະໂຍບາຍ, ມາດຕະການກ່ຽວກັບການຄຸ້ມຄອງປ່າໄມ້ແບບຢືນຍົງ; ຮັບຮອງເອົາບົດລາຍງານກ່ຽວກັບການປັບປຸງ ສັບຊ້ອນບາງວຽກງານຂອງລັດຖະບານທີ່ມີການຊໍ້າຊ້ອນກັນເປັນຕົ້ນວຽກງານການຄຸ້ມຄອງປ່າໄມ້, ການຄຸ້ມຄອງແຮ່ທາດ, ການຄຸ້ມຄອງທີ່ດິນ; ວຽກງານຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ສປປ ລາວ.

ຂ່າວ: ກິດຕາ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.