ຫຼວງ​ນໍ້າທາ​ ເລັ່ງ​ສ້ອມ­ແປງ​ທາງ​ຫຼວງແຫ່ງ​ຊາດ

ໂຄງ­ການສ້ອມ­ແປງທາງຫຼວງແຫ່ງຊາດ ແລະ ກໍ່ກັນເຈື່ອນຢູ່ພາຍໃນແຂວງຫຼວງນໍ້າທາສຳ­ເລັດແລ້ວ 15% ເພື່ອຮັບ­ປະ­ກັນແກ່ການຄົມ­ມະ­ນາ­ຄົມ ແລະ ຂົນ­ສົ່ງໃຫ້ມີຄວາມສະ­ດວກແກ່ການເຊື່ອມໂຍງກັບບັນ­ດາປະ­ເທດອະນຸພາກພື້ນໃນການພັດ­ທະ­ນາທາງດ້ານເສດ­ຖະ­ກິດ-ສັງ­ຄົມຂອງແຂວງຫຼວງນໍ້າທາໃຫ້ມີໂສມໜ້າໃໝ່, ຈະ­ເລີນຮຸ່ງ­ເຮືອງຂຶ້ນເລື້ອຍໆ.

ທ່ານ ອຸ­ໄລສັກ ຫັດ­ສະ­ດີ ວິ­ຊາການບໍ­ລິ­ສັດພັນ­ທະມິດກໍ່­ສ້າງຂົວ-ທາງຈຳ­ກັດໃຫ້ສຳ­ພາດຕໍ່ນັກຂ່າວວ່າ: ການຈັດຕັ້ງປະ­ຕິ­ບັດໂຄງ­ການສ້ອມ­ແປງທາງຫຼວງແຫ່ງຊາດ ແລະກໍ່ກັນເຈື່ອນຢູ່ພາຍໃນແຂວງຫຼວງນໍ້າທາແມ່ນມີເສັ້ນ­ທາງ R3,13N ແລະ 3A ຊຶ່ງເລີ່ມກໍ່­ສ້າງ ແລະ ສ້ອມ­ແປງມາແຕ່ວັນທີ 1 ມີ­ນາ 2016 ແລະໄດ້ປະ­ຕິ­ບັດໜ້າວຽກຄື: ວຽກສ້ອມ­ແປງໜ້າທາງ, ກໍ່ກັນເຈື່ອນ ແລະຮ່ອງລະ­ບາຍນໍ້າບາງຈຸດ, ມີຄວາມຍາວຂອງການສ້ອມ­ແປງໜ້າທາງທັງຫມົດ 158 ກວ່າກິ­ໂລ­ແມັດ, ຄວາມຍາວຂອງການກໍ່ກັນເຈື່ອນ 316 ແມັດ, ສະເລ່ຍລວງສູງ 4-8 ແມັດ, ມາຮອດປະ­ຈຸບັນສຳ­ເລັດ 15% ຂອງໜ້າວຽກທັງໝົດ, ໂດຍນຳໃຊ້ກອງທຶນພັດ­ທະ­ນາເສັ້ນທາງປະ­ມານ 34 ຕື້ກີບ ແລະຄາດວ່າ ໃນທ້າຍເດືອນກໍ­ລະ­ກົດ 2016 ນີ້ຈະໃຫ້ ສຳ­ເລັດ 100%.

ທ່ານ ພອນຈິດ ພູນສະ­ຫວ່າງ ວິ­ຊາການຕິດ­ຕາມພາກສະໝາມຂອງຫ້ອງການໂຍ­ທາທິການ ແລະ ຂົນ­ສົ່ງເມືອງຫຼວງນໍ້າທາກ່າວວ່າ: ຜ່ານການລົງກວດກາປະເມີນຫນ້າວຽກຕົວຈິງເຫັນວ່າ ການປະ­ຕິ­ບັດໂຄງ­ການກໍ່­ສ້າງດັ່ງ­ກ່າວ ແມ່ນໄດ້ຕາມມາດ­ຖານຕາມສັນ­ຍາຮັບ ເໝົາຂອງບໍ­ລິ­ສັດ ແລະ ທາງບໍ­ລິ­ສັດໄດ້ມີຄວາມຫ້າວ­ຫັນຕໍ່ການປະ­ຕິ­ບັດຂອງໂຄງ­ການ ແລະຍັງໄດ້ຮຽກ­ຮ້ອງໃຫ້ບໍລິສັດປະ­ຕິ­ບັດຕາມຂັ້ນຕອນຂອງເຕັກ­ນິກກໍ່­ສ້າງສ້ອມ­ແປງທີ່ໄດ້ວາງໄວ້ໃຫ້ມີຄຸນນະພາບ ແລະຮັບ­ປະ­ກັນໃນການສັນ­ຈອນໄປມາມີຄວາມສະ­ດວກຂຶ້ນກວ່າເກົ່າ.

ພາບ-ຂ່າວ: ນສພ ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.