ປະ­ທານ​ປະ­ເທດ​ເນັ້ນ​ຫຼາຍ​ບັນ­ຫາ​ສຳ­ຄັນ ໃຫ້​ລັດ­ຖະ­ບານ​ຊຸດ​ໃໝ່​ນຳ­ໄປ​ຈັດ​ຕັ້ງ​ຜັນ​ຂະ­ຫຍາຍ

ເນື່ອງໃນໂອ­ກາດເປີດກອງປະຊຸມຄັ້ງປະ­ຖົມມະລືກຂອງຄະ­ນະລັດຖະບານຊຸດທີ VIII ທີ່ໄດ້ມີຂຶ້ນໃນລະ­ຫວ່າງວັນທີ 29-30 ເມ­ສາຜ່ານມາຢູ່ສຳນັກງານນາ­ຍົກ ທ່ານປະ­ທານປະ­ເທດ ໄດ້ໃຫ້ກຽດໂອ້ລົ້ມພ້ອມເນັ້ນຫຼາຍບັນ­ຫາສຳ­ຄັນຂອງຊາດໃຫ້ຄະ­ນະລັດ­ຖະ­ບານຊຸດໃໝ່ນຳ­ໄປຈັດຕັ້ງຜັນຂະ­ຫຍາຍ ເພື່ອເປັນແນວ­ທາງໃນການພັດ­ທະ­ນາປະ ເທດຊາດໃນຕະ­ຫຼອດວາ­ລະ.

ທ່ານ ບຸນຍັງ ວໍ­ລະຈິດ  ປະ­ທານປະເທດແຫ່ງ ສປປ ລາວໃນໂອ­ກາດທີ່ເຂົ້າຮ່ວມກອງປະ­ຊຸມຄັ້ງປະ­ຖົມມະລືກຂອງຄະ­ນະລັດ­ຖະ­ບານຊຸດ ທີ VIII ທີ່ດຳ­ເນີນພາຍໃຕ້ການເປັນປະ ທານຂອງທ່ານ ທອງລຸນ ສີສຸລິດ ນາຍົກລັດ­ຖະ­ມົນ­ຕີແຫ່ງ ສປປ ລາວ ຊຶ່ງທ່ານໄດ້ໃຫ້ກຽດມີຄວາມເຫັນໂອ້ລົມວ່າ: ຕໍ່ກັບທິດທາງແຜນ­ການ­ເຄື່ອນ­ໄຫວ ຂອງລັດ­ຖະ­ບານໃນ­ຕໍ່­ໜ້າ ໂດຍພື້ນ­ຖານ ຂ້າ­ພະ­ເຈົ້າກໍມີຄວາມເປັນເອ­ກະພາບນຳ,  ແຕ່ຢາກມີຄວາມເຫັນຕື່ມບາງບັນ­ຫາສຳ ຄັນເປັນ­ຕົ້ນ ພວກເຮົາຕ້ອງມີຄວາມເຂົ້າ ໃຈຢ່າງຖືກ­ຕ້ອງ ແລະເອ­ກະພາບວ່າ ພວກເຮົາຢູ່ໃນຈຸດຫົວ­ລ້ຽວ­ຫົວ­ຕໍ່ໃນການປ່ຽນ­ແປງເນື້ອໃນ ແລະແບບ­ແຜນວິ­ທີນຳ­ພາຂອງສູນກາງພັກ, ດ້ານໜຶ່ງຕ້ອງເອົາ­ໃຈ­ໃສ່ເຕົ້າ­ໂຮມຄວາມສາ­ມັກ­ຄີຢູ່ ພາຍໃນໃຫ້ມີຄວາມໜັກແໜ້ນ, ການຕັດ ສິນໃຈປ່ຽນ­ແປງແກ້ໄຂສູ່ອັນໃໝ່ກໍແມ່ນຄວາມຈຳ­ເປັນທີ່ຕ້ອງໄດ້ເຮັດ, ອັນໃດທີ່ເປັນຜົນ­ສຳ­ເລັດ, ເປັນບົດ­ຮຽນອັນດີໃນໄລ­ຍະຜ່ານມາຕ້ອງຕັ້ງ­ໜ້າເສີມຂະຫຍາຍ, ອັນສຳ­ຄັນແມ່ນເຮັດແນວ­ໃດໃຫ້ ພ້ອມກັນຄົ້ນ­ຄວ້າ, ວາງມາດຕະ­ການຈຳ­ກັດຊ່ອງວ່າງຕ່າງໆ ເພື່ອສະ­ກັດກັ້ນການເກີດມີຈຸດອ່ອນໃໝ່ທີ່ເປັນບັນ­ຫາ ຊຳເຮື້ອ, ຕ້ອງຄົ້ນ­ຄວ້າຢ່າງລະ­ອຽດຮອບຄອບ ແລະດຳ­ເນີນການປັບ­ປຸງສັບຊ້ອນກົງ­ຈັກຂອງບັນ­ດາກະ­ຊວງ ແລະ ຄະ­ນະກຳ­ມະ­ການທຽບເທົ່າຂອງລັດຖະບານໄປພ້ອມໆກັບການປັບ­ປຸງກົງ­ຈັກບໍ­ລິ­ຫານຢູ່ຂັ້ນທ້ອງ­ຖິ່ນຮາກຖານ, ຈົ່ງເສີມຂະ­ຫຍາຍຄວາມຮັບ­ຜິດ­ຊອບສູງສຸດຂອງຕົນເພື່ອເຮັດໃຫ້­ການບໍ­ລິ­ຫານ-ຄຸ້ມຄອງມະ­ຫາພາກໃນດ້ານຕ່າງໆມີຄວາມເຂັ້ມ­ແຂງ ແລະມີປະ­ສິດ­ທິ­ພາບ.

ນອກນີ້ ຕ້ອງຮີບຮ້ອນຜັນຂະ­ຫຍາຍ ແຜນພັດ­ທະ­ນາເສດ­ຖະ­ກິດ-ສັງ­ຄົມ, ທັງຮັບ­ປະ­ກັນສະກັດກັ້ນ ແລະແກ້ໄຂການກະທຳຂອງບັນ­ດາຂະ­ແໜງ­ການສູນກາງ ແລະທ້ອງ­ຖິ່ນທີ່ເປັນການບືນ­ເລິກລະເມີດວິໃນແຜນ­ການ-ການເງິນ,  ກໍໃຫ້ເກີດຄວາມສ່ຽງສູ່ວິກິດການເພີ່ມຂຶ້ນ, ຟື້ນຟູສ້າງໃຫ້ພື້ນ­ຖານເສດ­ຖະ­ກິດເຂົ້າສູ່ການພັດ­ທະ­ນາປົກ­ກະ­ຕິ ແລະສົມດູນໂດຍໄວ, ເອົາ­ໃຈ­ໃສ່ພັດ­ທະ­ນາທຸ­ລະກິດຂະ­ໜາດນ້ອຍ ແລະກາງ ໂດຍເນັ້ນໃສ່ການສ້າງມູນຄ່າເພີ່ມຈາກຂະ­ແໜງ­ການທີ່ບໍ່ນຳໃຊ້ຊັບ­ພະ­ຍາ­ກອນທຳມະຊາດໃຫ້ຫຼາຍຂຶ້ນ, ອີກບັນ­ຫາໜຶ່ງທີ່ມີລັກ­ສະ­ນະຮີບດ່ວນທີ່ລັດ­ຖະ­ບານຕ້ອງເອົາ­ໃຈ­ໃສ່ຢ່າງຈິງຈັງອີຫຼີນັ້ນແມ່ນການຄຸ້ມຄອງວິສາຫະກິດທຸກປະ­ເພດໃຫ້ເຂົ້າສູ່ລະ­ບົບການຖືບັນ­ຊີຢ່າງເຂັ້ມງວດ, ຈຳ­ກັດຊ່ອງວ່າງຂອງການຮົ່ວໄຫຼງົບ­ປະ­ມານໃນທຸກລະ­ດັບ, ທັງຕີຖອຍປາ­ກົດ­ການສວຍໃຊ້ໜ້າ­ທີ່, ສໍ້າລາດບັງຫຼວງ, ເຮັດເສື່ອມເສຍບົດ­ບາດອິດທິພົນຂອງພັກ ແລະລັດເຮົາ, ສຸມໃສ່ແກ້ໄຂບັນດາປາ­ກົດ­ການຫຍໍ້­ທໍ້ໃນສັງ­ຄົມໃຫ້ຫຼຸດໜ້ອຍຖອຍລົງ ແລະມີການຫັນ­ປ່ຽນຢ່າງຈະ­ແຈ້ງ.

ພ້ອມດຽວກັນນັ້ນລັດ­ຖະ­ບານຕ້ອງ ເອົາ­ໃຈ­ໃສ່ຮັບ­ປະ­ກັນໃນການຄຸ້ມຄອງ, ຂຸດຄົ້ນ ແລະນຳໃຊ້ຊັບ­ພະ­ຍາ­ກອນຂອງວົງ­ສາຄະ­ນາຍາດແຫ່ງຊາດມີປະສິດ­ທິຜົນສູງສຸດ ແລະຍືນຍົງ, ເພີ່ມທະ­ວີການຊີ້ ນຳບັນ­ຊາແຕ່ເທີງລົງລຸ່ມ ເພື່ອເຮັດໃຫ້ການ­ຈັດ­ຕັ້ງຜັນຂະ­ຫຍາຍບັນ­ດາວຽກງານຈຸດສຸມຕົ້ນ­ຕໍຂອງລັດໄດ້ຮັບການຈັດຕັ້ງປະ­ຕິ­ບັດຢ່າງຖືກ­ຕ້ອງ ແລະແຂງແຮງ, ຮັບ­ປະ­ກັນການປະ­ຕິ­ບັດບັນ­ດາ ຄາດ­ໝາຍສູ້ຊົນດ້ານຕ່າງໆໃຫ້ບັນ­ລຸຕາມທີ່ລັດ­ຖະ­ບານວາງອອກ, ສະ­ມາ­ຊິກລັດ­ຖະ­ບານແຕ່ລະສະ­ຫາຍ ຊຶ່ງສ່ວນໃຫຍ່ ກໍເປັນກຳ­ມະ­ການສູນກາງພັກຕ້ອງເປັນແບບ­ຢ່າງໃນການປ່ຽນ­ແປງສູ່ອັນໃໝ່, ຍົກລະ­ດັບຕົນເອງຢ່າງຕໍ່ເນື່ອງ, ສ້າງການຫັນ­ປ່ຽນແບບບຸກທະ­ລຸດ້ານຕ່າງໆ ໃນຂົງ­ເຂດວຽກງານຂອງຕົນ, ແຕ່ລະສະ­ຫາຍຕ້ອງເຊີດຊູສະ­ຕິຕໍ່ການຈັດຕັ້ງ­ໜ້າທີ່ວຽກງານ, ຄວາມຮັບ­ຜິດ­ຊອບການ­ເມືອງ, ມີຄວາມເດັດ­ຂາດເຂັ້ມງວດ ຕໍ່ການກຳ­ຈັດບັນ­ດາປາ­ກົດ­ການຫຍໍ້­ທໍ້ຕ່າງໆທີ່ເກີດຂຶ້ນ, ຍົກສູງຜົນປະ­ໂຫຍດສ່ວນລວມ, ຖືຜົນປະ­ໂຫຍດຂອງປະ­ຊາ ຊົນສູງກວ່າສິ່ງໃດແນ­ໃສ່ເພີ່ມຄວາມເຫຼື້ອມໃສສັດ­ທາຂອງປະ­ຊາ­ຊົນຕໍ່ພັກ-ລັດເຮົາ.

ຂະ­ນະທີ່ ທ່ານ ທອງລຸນ ສີສຸລິດ ກໍໄດ້ລາຍງານກ່ຽວກັບວຽກງານໜ້າ­ທີ່ຈຸດສຸມຂອງລັດ­ຖະ­ບານຊຸດໃໝ່ໂດຍຕັ້ງເປົ້າຊຸກ­ຍູ້ໃຫ້ມີເສດ­ຖະ­ກິດຂະ­ຫຍາຍ­ຕົວບໍ່ໃຫ້ຫຼຸດ 7,5% ຕໍ່ປີ, ຈີດີພີຕໍ່ຫົວຄົນໃນປີ 2020 ໃຫ້ບັນ­ລຸ 3.190 ໂດລາສະຫະລັດ, ລາຍຮັບງົບ­ປະ­ມານໃຫ້ບັນ­ລຸ 23-25% ຂອງ ຈີດີພີ, ໃຫ້ມູນຄ່າການສົ່ງອອກຂະ­ຫຍາຍ­ຕົວບໍ່ຫຼຸດ 15%, ອັດຕາຄວາມ­ທຸກຍາກຂອງປະ­ຊາ­ກອນໃຫ້ຫຼຸດ 10%, ນອກນັ້ນຍັງໄດ້ກຳ­ນົດຕົວເລກຄາດ­ໝາຍທາງສັງ­ຄົມອື່ນໆອີກ, ໜຶ່ງໃນ ບັນ­ດາຄາດ­ໝາຍຕົວເລກທີ່ວາງອອກທີ່ເປັນ­ຄວາມທ້າທາຍສົມ­ຄວນນັ້ນແມ່ນ ການຂະ­ຫຍາຍເນື້ອ­ທີ່ປ່າ­ໄມ້ໃຫ້ໄດ້ 70% ຂອງເນື້ອ­ທີ່ທົ່ວປະ­ເທດ, ໂຄງປະ­ກອບຂອງຈີດີພີທີ່ມີທ່າອ່ຽງຫັນໄປສູ່ອຸດສາ ຫະກຳ ແລະທັນສະ­ໄໝ.

ຢ່າງ­ໃດກໍຕາມການດຳ­ເນີນກອງປະ ຊຸມຂອງລັດ­ຖະ­ບານຊຸດໃໝ່ນີ້ ນອກ­ຈາກການວາງທິດທາງວຽກງານໜ້າ­ທີ່ຈຸດ ສຸມ ແລະບັນ­ຫາສຳ­ຄັນທີ່ພະ­ນະທ່ານເລ ຂາທິການໃຫຍ່ໄດ້ຊີ້ນຳແລ້ວ, ຄະ­ນະລັດຖະບານຍັງໄດ້ປຶກ­ສາຫາ­ລືແນວ­ທາງພັດ ທະນາປະ­ເທດຊາດຫຼາຍດ້ານບໍ່ວ່າຈະເປັນການສ້າງລາຍຮັບແບບຍືນຍົງໃຫ້ ປະ­ຊາ­ຊົນບັນ­ດາ­ເຜົ່າ, ການປັບ­ປຸງແຜນລາຍຮັບ-ລາຍຈ່າຍທີ່ຍັງບໍ່ລົງຕົວ, ແບບແຜນວິ­ທີເຮັດວຽກໃຫ້ເຂັ້ມ­ແຂງ, ທັນສະໄໝ ແລະຄ່ອງຕົວຫຼາຍຂຶ້ນ, ຫາ­ລືແກ້ໄຂຜົນເສຍຫາຍທີ່ອາດຈະເກີດຂຶ້ນຈາກສາພາບການປ່ຽນ­ແປງຂອງດິນຟ້າອາດກາດລວມເຖິງບັນ­ຫາສຳ­ຄັນອື່ນໆນຳອີກ.

ຂ່າວ: ໂອຫຼົດ ນສພ ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.