ນາ­ຍົກ​ຢືນ­ຢັນ​ຈະ​ແກ້​ບັນ­ຫາ​ປາກ​ທ້ອງພະ­ນັກ­ງານ ແລະ​ ປະ­ຊາ­ຊົນ​ເປັນ​ບຸ­ລິ­ມະ­ສິດ​ທຳ​ອິດ

ເລື່ອງບັນ­ຫາປາກທ້ອງພະ­ນັກ­ງານທີ່ມີເງິນ­ເດືອນໜ້ອຍ ແລະ ບໍ່ກຸ້ມຢູ່ກຸ້ມກິນແມ່ນບັນ­ຫາໜຶ່ງທີ່ຕິດພັນກັບການພັດ­ທະ­ນາເສດ­ຖະ­ກິດ-ສັງ­ຄົມຂອງປະ­ເທດ ຊຶ່ງລັດ­ຖະ­ບານຊຸດໃໝ່ຢືນ­ຢັນຈະແກ້ໄຂບັນ­ຫານີ້ເປັນບຸ­ລິ­ມະ­ສິດທຳອິດ ແຕ່ຂະ­ນະນີ້ຕ້ອງຂໍ­ເວ­ລາ ເຮັດວຽກກ່ອນຄວບຄູ່ໄປກັບຄວາມ­ທຸກຍາກຂອງປະ­ຊາ­ຊົນ.

ວັນທີ 29 ເມ­ສາຜ່ານມາທີ່ສຳ­ນັກ­ງານນາ­ຍົກ ທ່ານ ທອງລຸນ ສີສຸລິດ ນາ­ຍົກ­ລັດ­ຖະ­ມົນ­ຕີແຫ່ງ ສປປ ລາວ ໄດ້ຖະ­ແຫຼງຜົນ­ສຳ­ເລັດຂອງກອງປະ­ຊຸມຄັ້ງປະ­ຖົມມະລືກຂອງລັດ­ຖະ­ບານ ພ້ອມທັງເປີດໂອ­ກາດໃຫ້ສື່ມວນຊົນຖາມກ່ຽວກັບບັນ­ຫາຕ່າງໆ ໂດຍທ່ານນາ­ຍົກໄດ້ຕອບຄຳຊັກຖາມຂອງສື່ມວນຊົນວ່າ: ເລື່ອງບັນ­ຫາປາກທ້ອງພະ­ນັກ­ງານທີ່ມີເງິນ­ເດືອນໜ້ອຍ ແລະບໍ່ກຸ້ມຢູ່ກຸ້ມກິນ ແມ່ນບັນ­ຫາໜຶ່ງທີ່ຕິດພັນກັບການພັດ­ທະ­ນາລວມຂອງປະ­ເທດເຮົາ ຊຶ່ງເສດ­ຖະ­ກິດເຮົາຢູ່ໃນລະ­ດັບນີ້ ການເອົາ­ໃຈ­ໃສ່ດູແລພະນັກງານກໍບໍ່ໄດ້ດີເທົ່າທີ່ຄວນ ແຕ່ລັດ­ຖະ­ບານກໍບໍ່ໄດ້ນິ້ງນອນໃຈສືບ­ຕໍ່ເຮັດໃຫ້ເສດ­ຖະ­ກິດຂະ­ຫຍາຍ­ຕົວ, ເຮັດໃຫ້ລາຍຮັບເພີ່ມຂຶ້ນ ແລະເວ­ລານັ້ນລັດ­ຖະ­ບານກໍຈະພິ­ຈາ­ລະ­ນາໃຫ້ພະ­ນັກ­ງານຂອງພວກເຮົາມີຊີ­ວິດການເປັນຢູ່ດີຂຶ້ນເທື່ອລະກ້າວ.

ສ່ວນບັນ­ຫາການສໍ້ລາດບັງຫຼວງ ລັດ­ຖະ­ບານກໍໄດ້ມີກົດ­ໝາຍ, ມີນະ­ໂຍ­ບາຍ ແລະມາດຕະ­ການຄົບຊຸດ ມີແຕ່ຕໍ່ໄປຕ້ອງປະ­ຕິ­ບັດ ຊຶ່ງວ່າ­ການປະ­ຕິ­ບັດຕ້ອງໃຊ້ເວ­ລາ ເພື່ອເຮັດໃຫ້ເປັນໄປຕາມບາດກ້າວ, ພ້ອມທັງສຶກສາອົບ­ຮົມພະ­ນັກ­ງານໃຫ້ຮູ້ວ່າ­ການສໍ້ລາດບັງຫຼວງເປັນໄພຕໍ່ສັງ­ຄົມ, ຕໍ່ປະ­ເທດຊາດ ແລະການພັດ­ທະ­ນາປະ­ເທດຊາດ.

ແນວ­ໃດກໍດີສຳ­ລັບບັນ­ຫາທຳອິດທີ່ລັດ­ຖະ­ບານຈະແກ້ໄຂທ່ານ ທອງລຸນ ສີສຸລິດ ກ່າວຢໍ້າຕື່ມວ່າ ແມ່ນເລື່ອງປາກທ້ອງຂອງພະ­ນັກ­ງານ, ແກ້ໄຂຄວາມ­ທຸກຍາກຂອງປະ­ຊາ     ຊົນ, ພັດ­ທະ­ນາຊົນ­ນະ­ບົດເຂດຫ່າງໄກສອກ­ຫຼີກ, ສ້າງຖານລາຍຮັບໃຫ້ຫຼາຍຂຶ້ນ, ດຶງດູດເອົາການລົງ­ທຶນພາຍໃນ ແລະຕ່າງ­ປະ­ເທດໃຫ້ຫຼາຍຂຶ້ນ ພ້ອມທັງໃຫ້ລົງ­ທຶນໃສ່ໂຄງ ການທີ່ມີປະສິດ­ທິຜົນນຳເອົາຜົນປະ­ໂຫຍດໃຫ້ປະ­ເທດ ແລະ ປະ­ຊາ­ຊົນ ນອກນັ້ນຍັງຈະແກ້ໄຂບັນ­ຫາຕ່າງໆເປັນ­ຕົ້ນການເກັບລາຍຮັບເຂົ້າງົບ­ປະ­ມານ, ໂຄງ­ການນອກແຜນ ແລະອື່ນໆທີ່ເກີດ ຂຶ້ນໃນໄລ­ຍະຜ່ານມາ ແຕ່ລັດ­ຖະ­ບານ ຮຽກ­ຮ້ອງມາຍັງປະ­ຊາ­ຊົນຂໍ­ເວ­ລາໃນ ການເຮັດວຽກກ່ອນ.

ພາບ-ຂ່າວ: ສະ­ເຫຼີມໄຊ ນສພ ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.