ລາວເຊັນສັນຍາຊື້ໄຟຟ້າຈາກຈີນ

ວັນທີ 5 ພຶດສະພາ 2016 ທີ່ຫ້ອງ ປະຊຸມຂອງລັດວິສາຫະກິດໄຟຟ້າລາວ ສາຂາແຂວງຫຼວງນໍ້າທາ ໄດ້ມີພິທີເຊັນສັນຍາຊື້-ຂາຍໄຟຟ້າລະຫວ່າງລັດວິສາຫະກິດໄຟຟ້າລາວສາຂາແຂວງຫຼວງນໍ້າທາ  ກັບບໍລິສັດສະໜອງໄຟຟ້າເມືອງຫຼ້າ ຈຳກັດ ສປ ຈີນ, ເຂົ້າຮ່ວມມີ ທ່ານ ບຸນມາ ມະນີວົງ ຮອງຜູ້ອຳນວຍການໃຫຍ່ລັດວິສາຫະກິດໄຟຟ້າລາວ, ມີທ່ານ ນາງ ຫຼີ່ ໂກເມີ້ຍ ຮອງຫົວໜ້າບໍລິສັດສະໜອງໄຟຟ້າເມືອງຫຼ້າ ຈຳກັດ, ມີທ່ານ ສີສະຫວາດ ນານທິລັດ ຫົວໜ້າສາຂາລັດວິສາຫະກິດໄຟຟ້າລາວ, ມີຮອງຫົວໜ້າລັດວິສາຫະກິດໄຟຟ້າລາວສາຂາແຂວງຫຼວງນໍ້າທາ  ຕະຫຼອດຮອດພະນັກງານວິຊາການທັງສອງຝ່າຍເຂົ້າຮ່ວມ.

ທ່ານ ບຸນຫອມ ອິນລໍຢິກ ຮອງຫົວໜ້າລັດວິສາຫະກິດໄຟຟ້າລາວ ສາຂາແຂວງຫຼວງນໍ້າທາ ໄດ້ລາຍງານການ ຮ່ວມມືຈັດຕັ້ງປະຕິບັດກ່ຽວກັບວຽກງານໄຟຟ້າຂອງສອງຝ່າຍໃນໄລຍະ ຜ່ານມາ ເລີ່ມແຕ່ເດືອນພຶດສະພາ 2013 ສະຖານີປາງທອງໄດ້ກໍ່ສ້າງສຳເລັດ ແລະ ນຳໃຊ້ຈົນເຖິງປະຈຸບັນ ໄລຍະເລີ່ມ ຕົ້ນລັດວິສາຫະກິດໄຟຟ້າລາວກໍຄືແຂວງຫຼວງນໍ້າທາໄດ້ຮັບການສະໜອງໄຟ ຈາກບໍລິສັດສະໜອງໄຟຟ້າເມືອງຫຼ້າ ຈຳກັດ 4,34 ລ້ານກິໂລວັດໂມງ ຄຽງຄູ່ກັບເສດຖະກິດຂອງ ສປປ ລາວ ນັບມື້ ນັບຂະຫຍາຍຕົວຢ່າງບໍ່ຢຸດຢັ້ງ, ມາຮອດ ປີ 2015 ແຂວງຫຼວງນໍ້າທາໄດ້ຮັບການ  ສະໜອງໄຟ 14,6 ລ້ານກິໂລວັດໂມງ ທຽບໃສ່ປີ 2003 ອັດຕາເພີ່ມຂຶ້ນເທົ່າ ກັບ 236,83% ແຕ່ມາຮອດປີ 2016 ນີ້ ທາງລັດວິສາຫະກິດໄຟຟ້າລາວໄດ້ມີແຫຼ່ງພະລັງງານໄຟຟ້າພາຍໃນພຽງພໍກັບຄວາມຕ້ອງການຈິ່ງໄດ້ຫຼຸດການນຳເຂົ້າພະລັງງານໄຟຟ້າເບື້ອງເມືອງມາງ-ປາງທອງລົງຈຳນວນເຄິ່ງໜຶ່ງຂອງປີຜ່ານມາ ຈິ່ງມີການເຊັນສັນຍາໃນມື້ນີ້ເກີດຂຶ້ນ.

ຊຶ່ງການເຊັນສັນຍາຊື້-ຂາຍຮ່ວມກັນ ໃນຄັ້ງນີ້ແມ່ນຊື້-ຂາຍໃນຈຳນວນເຄິ່ງໜຶ່ງຂອງສັນຍາຄັ້ງກ່ອນໃຫ້ກຽດເຊັນສັນຍາໂດຍແມ່ນ ທ່ານ ບຸນມາ ມະນີວົງ ຮອງຜູ້ອຳນວຍການໃຫຍ່ລັດວິສາຫະກິດໄຟຟ້າລາວ ແລະ ທ່ານ ນາງ ຫຼີ່ໂກ ເມີ້ຍ ຮອງຫົວໜ້າບໍລິສັດສະໜອງໄຟຟ້າ ເມືອງຫຼ້າ ຈຳກັດ.

ພາບ-ຂ່າວ: ມຸນຕີ ນສພ ເສດຖະກິດ-ສັງຄົມ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.